ന്യൂഡല്‍ഹി∙ സിബിഎസ്‌ഇയുടെ പുതിയ ഓണ്‍-സ്ക്രീൻ മാർക്കിങ് (ഒഎസ്‌എം) സംവിധാനത്തെ ചുറ്റിപ്പറ്റിയ വിവാദങ്ങള്‍ക്കിടെ, സംവിധാനത്തില്‍ വ്യാപക സാങ്കേതിക തകരാറുകളുണ്ടെന്ന ആരോപണം നിഷേധിച്ച്‌ സേവനദാതാക്കളായ കോഎംപ്റ്റ് എഡ്യു ടെക് രംഗത്ത്.
ഉയർന്ന പരാതികള്‍ അപൂർവമായ സംഭവങ്ങളാണെന്നും സിസ്റ്റം തകരാറല്ലെന്നും കമ്പനിയുടെ സിഇഒ വി.എസ്.എൻ. രാജു വ്യക്തമാക്കി.
2026ലെ ക്ലാസ് 12 പരീക്ഷ മുതല്‍ സിബിഎസ്‌ഇയ്ക്ക് ഡിജിറ്റല്‍ മൂല്യനിർണയ സേവനം നല്‍കുന്നത് ഹൈദരാബാദ് ആസ്ഥാനമായ കോഎംപ്റ്റാണ്. ഉത്തരക്കടലാസുകള്‍ മങ്ങിയ നിലയില്‍ ലഭിച്ചത്, പേജുകള്‍ മാറിപ്പോയത്, പോർട്ടല്‍ പ്രവർത്തിക്കാതിരുന്നത് തുടങ്ങിയ ആരോപണങ്ങള്‍ വിദ്യാർഥികള്‍ ഉയർത്തിയിരുന്നു. എന്നാല്‍, 'മുഴുവൻ സംവിധാനവും പാളിച്ചയാണെന്ന വിലയിരുത്തല്‍ തെറ്റാണ്' എന്ന് രാജു വ്യക്തമാക്കി.
ഡല്‍ഹി സ്വദേശിയായ വിദ്യാർഥി വേദാന്ത് ശ്രീവാസ്തവയ്ക്ക് ലഭിച്ച ഫിസിക്സ് ഉത്തരക്കടലാസ് മറ്റൊരാളുടേതാണെന്ന പരാതിയിലും കമ്പനി വിശദീകരണം നല്‍കി. പ്രാഥമിക അന്വേഷണത്തില്‍ സ്കാനിങ് ഘട്ടത്തിലെ മനുഷ്യപ്പിഴവാണ് കണ്ടെത്തിയതെന്നും സാങ്കേതിക തകരാർ ഇല്ലെന്ന കാര്യത്തില്‍ പൂർണ വിശ്വാസമുണ്ടെന്നും രാജു പറഞ്ഞു. പിഴവ് നടന്ന കേന്ദ്രവും ബന്ധപ്പെട്ട ജീവനക്കാരനെയും കണ്ടെത്തിയതായും അന്വേഷണം തുടരുകയാണെന്നും അദ്ദേഹം കൂട്ടിച്ചേർത്തു.
ഉത്തരക്കടലാസുകളുടെ പകർപ്പിനായി അപേക്ഷിച്ച വിദ്യാർഥികളില്‍ 95 ശതമാനം പേർക്കും ഇതിനകം കോപ്പി നല്‍കിയതായി കമ്പനി അവകാശപ്പെട്ടു. ഇൻഡസ്ട്രി സ്റ്റാൻഡേർഡ് സ്കാനറുകളാണ് ഉപയോഗിക്കുന്നതെന്നും മങ്ങിയ കോപ്പികള്‍ സംബന്ധിച്ച പരാതികള്‍ സിബിഎസ്‌ഇ പരിഹരിച്ചുകൊണ്ടിരിക്കുകയാണെന്നും രാജു അറിയിച്ചു.
തെലങ്കാന പരീക്ഷാ വിവാദങ്ങളില്‍പ്പെട്ട സ്ഥാപനത്തിന് സിബിഎസ്‌ഇ കരാർ നല്‍കിയതിനെതിരെ കോണ്‍ഗ്രസ് നേതാവ് Rahul Gandhi ഉയർത്തിയ വിമർശനവും കമ്പനി തള്ളി. ജനറല്‍ ഫിനാൻഷ്യല്‍ റൂള്‍സ് പാലിച്ചാണ് ടെൻഡർ നടപടികള്‍ പൂർത്തിയാക്കിയതെന്ന് സിബിഎസ്‌ഇ വിശദീകരിച്ചു. 2025 ഓഗസ്റ്റില്‍ ടെൻഡർ ക്ഷണിക്കുകയും നവംബറില്‍ അന്തിമ ഘട്ടം പൂർത്തിയാക്കുകയും ചെയ്തതായി ബോർഡ് അറിയിച്ചു.
പ്ലാറ്റ്ഫോം ഹാക്ക് ചെയ്യപ്പെട്ടെന്ന ആരോപണവും കമ്പനി നിഷേധിച്ചു. സിബിഎസ്‌ഇയുടെ പ്രധാന സെർവർ സുരക്ഷിതമാണെന്നും പരീക്ഷണ ആവശ്യങ്ങള്‍ക്ക് മാത്രം ഉപയോഗിച്ചിരുന്ന ഡമ്മി സെർവറിലാണ് അനധികൃത പ്രവേശനം നടന്നതെന്നും രാജു വ്യക്തമാക്കി.
2019ലെ തെലങ്കാന ഇന്റർമീഡിയറ്റ് പരീക്ഷാ വിവാദത്തില്‍ ഉള്‍പ്പെട്ട ഗ്ലോബറീന ടെക്നോളജീസാണ് പിന്നീട് കോഎംപ്റ്റ് എഡ്യു ടെക് എന്ന പേരിലേക്ക് മാറിയത്. പേര് മാറ്റം വിവാദത്തില്‍നിന്ന് ഒഴിയാനല്ലെന്നും എല്ലാ ക്ലയന്റ്സിനും ഇക്കാര്യം അറിയാമെന്നും കമ്പനി വ്യക്തമാക്കി. ആ കേസില്‍ ഹൈക്കോടതിയും സുപ്രീംകോടതിയും കമ്പനിയെ കുറ്റവിമുക്തമാക്കിയിരുന്നുവെന്നും രാജു ചൂണ്ടിക്കാട്ടി.
അതേസമയം, ഒഎസ്‌എം സംവിധാനം രാജ്യവ്യാപകമായി നടപ്പാക്കുന്നതിന് മുൻപ് പര്യാപ്തമായ പരീക്ഷണങ്ങള്‍ നടത്തിയില്ലെന്ന ആരോപണവും കമ്പനി നിഷേധിച്ചു. ജനുവരി മുതല്‍ രാജ്യത്തെ വിവിധ ഭാഗങ്ങളിലായി ആയിരക്കണക്കിന് അധ്യാപകരെ പങ്കെടുപ്പിച്ച്‌ ഡ്രൈ റണ്ണുകള്‍ നടത്തിയതായും ഒരു ദിവസം 40,000 അധ്യാപകർ വരെ ഓണ്‍ലൈനായി മൂല്യനിർണയത്തില്‍ പങ്കെടുത്തതായും കമ്പനി അറിയിച്ചു.