ദിവ്യ. ഒരു കരയില്‍നിന്ന് മറ്റൊരു കരയിലേക്ക് എത്താൻ സഹായിച്ച ചങ്ങാടത്തെ ജീവിതകാലം മുഴുവൻ ചുമന്നുനടക്കേണ്ടതില്ലെന്നും അത് ഉപേക്ഷിക്കുന്നത് നന്ദികേടായി കാണേണ്ടതില്ലെന്നുമുള്ള ദിവ്യയുടെ വാക്കുകളാണ് ശ്രദ്ധ നേടുന്നത്.

''നമ്മെ ഒരു കരയില്‍നിന്ന് മറ്റൊരു കരയിലേക്ക് എത്തിക്കാൻ സഹായിച്ച ചങ്ങാടത്തെ ജീവിതകാലം മുഴുവൻ ചുമന്നുനടക്കേണ്ടതില്ല. അതിനെ ഉപേക്ഷിക്കുന്നത് നന്ദികേടല്ല; മറിച്ച്‌, ജീവിതം നമ്മെ പഠിപ്പിച്ച പാഠത്തെ തിരിച്ചറിയലാണ്'' എന്നാണ് ദിവ്യയുടെ കുറിപ്പ്. ഒരിക്കല്‍ ശരിയെന്നു തോന്നിയ കാര്യങ്ങളെല്ലാം എക്കാലവും ശരിയായിരിക്കണമെന്നില്ലെന്നും കുറിപ്പില്‍ പറയുന്നു.

കണ്ണൂർ എഡിഎം ആയിരുന്ന നവീൻ ബാബുവിന്റെ മരണവുമായി ബന്ധപ്പെട്ട വിവാദങ്ങള്‍ക്കു പിന്നാലെയാണ് പി.പി. ദിവ്യ ജില്ലാ പഞ്ചായത്ത് പ്രസിഡന്റ് സ്ഥാനം രാജിവച്ചത്. സംഭവത്തില്‍ ദിവ്യക്കെതിരെ വലിയ വിമർശനങ്ങള്‍ ഉയർന്നിരുന്നു. തുടർന്ന് നടന്ന ജില്ലാ പഞ്ചായത്ത് പ്രസിഡന്റ് തിരഞ്ഞെടുപ്പിലും സിപിഎം ദിവ്യയെ പരിഗണിച്ചിരുന്നില്ല.

ഈ സാഹചര്യത്തില്‍ ദിവ്യയുടെ പുതിയ കുറിപ്പ് രാഷ്ട്രീയ വൃത്തങ്ങളില്‍ ചർച്ചകള്‍ക്ക് വഴിവച്ചിരിക്കുകയാണ്. സിപിഎമ്മുമായുള്ള ബന്ധത്തില്‍ അകല്‍ച്ചയുണ്ടെന്ന സൂചനയാണോ കുറിപ്പിലുള്ളതെന്ന ചോദ്യവും ഉയരുന്നുണ്ട്. എന്നാല്‍, കുറിപ്പിലൂടെ ദിവ്യ ഉദ്ദേശിച്ചത് എന്താണെന്ന് വ്യക്തമാക്കിയിട്ടില്ല.

കുറിപ്പിന്റെ പൂർണ രൂപം:

ഓരോ ജീവിതത്തിനും പറയാൻ ഒരു കഥയുണ്ട്...
ഓരോ കഥയിലും തിരിച്ചറിയാൻ ഒരു സത്യവും.
ജീവിതത്തിന്റെ ഏതോ വഴിത്തിരിവില്‍ കണ്ടുമുട്ടിയ മനുഷ്യർ… കടന്നുപോയ സാഹചര്യങ്ങള്‍… ഹൃദയത്തില്‍ മായാതെ കിടക്കുന്ന ചില ഓർമകള്‍… കാലം മായ്ച്ചുകളയാത്ത ചില മുറിവുകള്‍… ഇതെല്ലാം മനസ്സില്‍ അവശേഷിപ്പിച്ച ചിന്തകളുണ്ട്. ചില അനുഭവങ്ങള്‍ ചിരിയുടെ പൂക്കാലം സമ്മാനിച്ചു. ചിലത് കണ്ണീരിന്റെ നനവുള്ള ഓർമകളായി മാറി. മറ്റു ചിലത് മനുഷ്യരെ തിരിച്ചറിയാനും ബന്ധങ്ങളുടെ ആഴം അളക്കാനും സത്യത്തിന്റെയും നീതിയുടെയും വില മനസ്സിലാക്കാനും പഠിപ്പിച്ചു.

അങ്ങനെയിരിക്കെ, അടുത്തിടെ വായിച്ച ഒരു കഥ മനസ്സില്‍ ആഴത്തില്‍ പതിഞ്ഞു. ബുദ്ധൻ തന്റെ ശിഷ്യന്മാരോടു പറഞ്ഞതായി കേട്ടിട്ടുള്ള ഒരു കഥ…
ഒരു മനുഷ്യൻ യാത്രയ്ക്കിടയില്‍ ആഴമേറിയ ഒരു നദിക്കരയിലെത്തി. മറുകരയിലെത്താൻ പാലമില്ല, വള്ളമില്ല, സഹായിക്കാൻ ആരുമില്ല. ഒടുവില്‍ അവിടെക്കണ്ട മരത്തടികളും കമ്പുകളും ചേർത്ത് അയാള്‍ ഒരു ചങ്ങാടമുണ്ടാക്കി. പ്രതിബന്ധങ്ങളെ അതിജീവിച്ചു സുരക്ഷിതമായി മറുകരയിലെത്തി. തന്റെ ജീവൻ രക്ഷിക്കാൻ സഹായിച്ച ആ ചങ്ങാടത്തോട് അയാള്‍ക്ക് വല്ലാത്ത നന്ദി തോന്നി. അതിനെ ഉപേക്ഷിക്കാൻ മനസ്സുവരാതെ, ഇനി എവിടെപ്പോയാലും ചങ്ങാടം കൂടെ കൊണ്ടുപോകാൻ അയാള്‍ തീരുമാനിച്ചു. അങ്ങനെ, യാത്ര സുഗമമാക്കിയ ആ ചങ്ങാടം തലയിലേറ്റി അയാള്‍ വീണ്ടും യാത്ര തുടർന്നു.

കഥ പറഞ്ഞുതീർത്ത ബുദ്ധൻ ശിഷ്യന്മാരോട് ചോദിച്ചു:
'അയാള്‍ ചെയ്യുന്നത് ശരിയാണോ?'
ശിഷ്യന്മാർ ഒരേ സ്വരത്തില്‍ പറഞ്ഞു: 'അല്ല.'
ഒന്ന് ആലോചിച്ചുനോക്കൂ… നമ്മുടെ ജീവിതത്തിലും ഇങ്ങനെയുള്ള ചില ചങ്ങാടങ്ങളില്ലേ?
ഒരിക്കല്‍ നമ്മെ ചേർത്തുപിടിച്ച ചില ബന്ധങ്ങള്‍ ഇന്നു നമ്മെ വേദനിപ്പിക്കുന്നുണ്ടാകാം. ഒരുകാലത്ത് തുണയായിരുന്ന ചില ശീലങ്ങള്‍ ഇന്നു നമ്മുടെ മുന്നോട്ടുള്ള യാത്രയ്ക്ക് തടസ്സമാകുന്നുണ്ടാകാം. ഒരിക്കല്‍ നമുക്ക് ശരിയെന്നു തോന്നിയതെല്ലാം എക്കാലവും ശരിയായിരിക്കണമെന്നില്ല. ചിലതിനോട് നാം നന്ദിയുള്ളവരായിരിക്കണം… ചിലതിനെ സ്നേഹത്തോടെ യാത്രയാക്കണം. നമ്മെ ഒരു കരയില്‍നിന്ന് മറ്റൊരു കരയിലേക്ക് എത്തിക്കാൻ സഹായിച്ച ചങ്ങാടത്തെ ജീവിതകാലം മുഴുവൻ ചുമന്നുനടക്കേണ്ടതില്ല. അതിനെ ഉപേക്ഷിക്കുന്നത് നന്ദികേടല്ല; മറിച്ച്‌, ജീവിതം നമ്മെ പഠിപ്പിച്ച പാഠത്തെ തിരിച്ചറിയലാണ്.

ജീവിതത്തിലും അങ്ങനെതന്നെ… ചില മനുഷ്യർ നമ്മുടെ ജീവിതത്തിലേക്ക് കടന്നുവരുന്നത് ഒരു പാഠം പഠിപ്പിക്കാനായിരിക്കാം. ചില അനുഭവങ്ങള്‍ നമ്മെ തകർക്കാനല്ല, കൂടുതല്‍ കരുത്തുള്ളവരാക്കാനായിരിക്കാം. ചില വേർപിരിയലുകള്‍ നഷ്ടങ്ങളല്ല; പുതിയ വഴികളിലേക്കുള്ള തുടക്കങ്ങളായിരിക്കാം.
എല്ലാറ്റിനെയും മുറുകെപ്പിടിക്കുന്നതല്ല ജീവിതം; വിട്ടുപോകേണ്ടതിനെ തിരിച്ചറിയാനുള്ള വിവേകം കൂടിയാണ് ജീവിതം.
പ്രിയ സുഹൃത്തുക്കളേ,
ഇവിടെ ഞാൻ പങ്കുവയ്ക്കുന്നത് വെറും സങ്കല്‍പ്പകഥകളല്ല. ജീവിതയാത്രയില്‍ കണ്ടുമുട്ടിയ മനുഷ്യരും അനുഭവിച്ച സാഹചര്യങ്ങളും മനസ്സില്‍ അവശേഷിപ്പിച്ച ചിന്തകളും ചോദ്യങ്ങളുമാണ്. ചില കഥകളില്‍ നിങ്ങള്‍ക്ക് പരിചിതമായ മുഖങ്ങള്‍ തെളിഞ്ഞേക്കാം. ചില അനുഭവങ്ങളില്‍ നിങ്ങളുടെ തന്നെ ജീവിതത്തിന്റെ നിഴലുകള്‍ കണ്ടേക്കാം. ഓർമ്മകളുടെ വഴികളിലൂടെ… മനുഷ്യബന്ധങ്ങളുടെ ഉള്ളറകളിലൂടെ… സത്യത്തിന്റെയും നീതിയുടെയും അർഥങ്ങള്‍ തേടി ഒരു യാത്ര.
കാരണം, ഓരോ കഥയ്ക്കു പിന്നിലും ഒരു ജീവിതമുണ്ട്… ഓരോ ജീവിതത്തിനുള്ളിലും പറയാതെപോയ ഒരു സത്യവും.'Justice may be delayed, but the voice of truth will never fade.' സത്യം പറയാനുള്ള ധൈര്യത്തോടെയും നീതി തിരിച്ചറിയാനുള്ള വിവേകത്തോടെയും… ഈ യാത്ര ഇവിടെ തുടരുന്നു. ..വായിക്കണം. ..അഭിപ്രായങ്ങള്‍ അറിയിക്കണം