ചെന്നൈ: (KVARTHA) എസ് ജെ സൂര്യയെ നായകനാക്കി ശ്രീ ഗോകുലം മൂവീസ് നിർമ്മിക്കുന്ന 'കില്ലർ' എന്ന ബഹുഭാഷാ ചിത്രത്തിൻ്റെ സെറ്റില്‍ വൻ അപകടം.

ചെന്നൈയിലെ ബിന്നി മില്‍സ് കോമ്പൗണ്ടില്‍ നടന്ന ആക്ഷൻ രംഗങ്ങളുടെ ചിത്രീകരണത്തിനിടെ സിലിൻഡർ പൊട്ടിത്തെറിച്ചാണ് അപകടമുണ്ടായത്. ബുധനാഴ്ച, 2026 ജൂണ്‍ മൂന്നിന് നടന്ന ഈ അപകടത്തില്‍ സിനിമാ സംഘത്തിലെ ഒരാള്‍ മരിച്ചതായും മറ്റ് മൂന്ന് പേർക്ക് ഗുരുതരമായി പരിക്കേറ്റതായും പോലീസ് വ്യക്തമാക്കി. മധൻ എന്ന 25 കാരനായ ടെക്നീഷ്യനാണ് മരിച്ചത്.

അപകടത്തില്‍ പരിക്കേറ്റ നാല് പേരെയും അടിയന്തര ചികിത്സയ്ക്കായി ചെന്നൈയിലെ രാജീവ് ഗാന്ധി സർക്കാർ ആശുപത്രിയില്‍ പ്രവേശിപ്പിച്ചിരുന്നു. ഇതില്‍ ഒരാള്‍ ചികിത്സയിലിരിക്കെ മരിച്ചതായി ആശുപത്രി വൃത്തങ്ങള്‍ അറിയിച്ചു. സംഭവത്തില്‍ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ചിത്രീകരണത്തിന് ഉപയോഗിച്ച ഉപകരണങ്ങളുടെ സുരക്ഷാ മാനദണ്ഡങ്ങള്‍ അന്വേഷണ സംഘം പരിശോധിച്ചുവരികയാണെന്നാണ് റിപ്പോർട്ടുകള്‍. അസ്വാഭാവിക മരണമെന്ന നിലയിലാണ് അന്വേഷണം പുരോഗമിക്കുന്നത്.

സ്ഫോടനത്തെ തുടർന്ന് സിനിമാ പ്രവർത്തകർ വലിയ ഞെട്ടലിലാണ്. ഇതേത്തുടർന്ന് ചിത്രീകരണം താല്‍ക്കാലികമായി നിർത്തിവെച്ചതായി നിർമ്മാതാക്കളോട് അടുത്ത വൃത്തങ്ങള്‍ അറിയിച്ചു. തമിഴ് സിനിമയിലെ ഏറ്റവും പ്രതീക്ഷയർപ്പിക്കുന്ന പ്രോജക്റ്റുകളിലൊന്നായ 'കില്ലർ', എസ് ജെ സൂര്യ വർഷങ്ങള്‍ക്ക് ശേഷം സംവിധാനത്തിലേക്ക് തിരിച്ചെത്തുന്ന ചിത്രം കൂടിയാണ്. കഴിഞ്ഞ ജൂലൈയിലാണ് സിനിമയുടെ ഫസ്റ്റ് ലുക്ക് പോസ്റ്റർ പുറത്തുവിട്ടത്.

ശ്രീ ഗോകുലം മൂവീസാണ് ഈ പാൻ ഇന്ത്യ ചിത്രം നിർമ്മിക്കുന്നത്. ഓസ്കാർ ജേതാവ് എ ആർ റഹ്മാൻ സംഗീതം നല്‍കുന്ന ചിത്രത്തില്‍ 'അയോത്തി' ഫെയിം പ്രീതി അസ്രാണിയാണ് പ്രധാന വേഷത്തിലെത്തുന്നത്. കോവിഡ് ലോക്ക്ഡൗണ്‍ കാലത്താണ് എസ് ജെ സൂര്യ ഈ ചിത്രത്തിൻ്റെ കഥ തയ്യാറാക്കിയത്. ഇന്ത്യക്ക് പുറമെ മെക്സിക്കോയിലും ചിത്രീകരണമുള്ള ഈ സിനിമ അഞ്ച് ഭാഷകളിലായാണ് റിലീസിനെത്തുക.