തിരുവനന്തപുരം: (KVARTHA) അങ്കണവാടിയില്‍ ബിരിയാണിയും പൊരിച്ച കോഴിയും വേണമെന്ന് ആവശ്യപ്പെട്ട് സംസ്ഥാനത്ത് വലിയ ശ്രദ്ധ നേടിയ കൊച്ചുമിടുക്കൻ ശങ്കു വീണ്ടും വാർത്തകളില്‍ ഇടംപിടിച്ചു.

മന്ത്രി ബിന്ദു കൃഷ്ണ തൻ്റെ മുത്തശ്ശിയുടെ പേര് തെറ്റായി പറഞ്ഞതിനെ തിരുത്തിക്കൊണ്ട് ശങ്കു പുറത്തിറക്കിയ വീഡിയോയാണ് ഇപ്പോള്‍ സമൂഹമാധ്യമങ്ങളില്‍ വൈറലായത്.

മന്ത്രിയുടെ അവകാശവാദം

കഴിഞ്ഞ ദിവസങ്ങളില്‍ അങ്കണവാടികളിലെ ഭക്ഷണ മെനു പരിഷ്കരിക്കുന്നതുമായി ബന്ധപ്പെട്ട് നടന്ന ഒരു വാർത്താസമ്മേളനത്തിലാണ് മന്ത്രി ബിന്ദു കൃഷ്ണ ശങ്കുവിനെക്കുറിച്ച്‌ പരാമർശിച്ചത്. കൊല്ലം ചവറയിലെ മഹിളാ കോണ്‍ഗ്രസ് ജില്ലാ സെക്രട്ടറിയായ രാധാമണിയുടെ കൊച്ചുമോനാണ് ശങ്കു എന്നായിരുന്നു മന്ത്രിയുടെ വാദം. ഈ അവകാശവാദമാണ് ശങ്കു ഇപ്പോള്‍ തൻ്റെ നിഷ്കളങ്കമായ ശൈലിയില്‍ തിരുത്തിയിരിക്കുന്നത്.

അമ്മൂമ്മ രാധാമണിയല്ലെന്ന് ശങ്കു

ഒരു മന്ത്രി താൻ രാധാമണി ചേച്ചിയുടെ കൊച്ചുമോനാണെന്ന് പറഞ്ഞുവെന്നും എന്നാല്‍ താൻ അവരുടെ കൊച്ചുമോനല്ലെന്നും ശങ്കു വീഡിയോയില്‍ പറയുന്നു. 'ഞാൻ രാധാമണി ചേച്ചീടെ കൊച്ചുമോനല്ല. എൻ്റെ അപ്പാവിടെ പേര് ഓമനേനും, എൻ്റെ അമ്മാവിടെ പേര് വീണാകൻ തങ്കപ്പൻ. ഇത്രയേ ഉള്ളൂ കാര്യം', ശങ്കു തൻ്റെ കുസൃതി നിറഞ്ഞ മുഖഭാവത്തോടെ വീഡിയോയില്‍ വ്യക്തമാക്കുന്നു. തൻ്റെ അമ്മൂമ്മയെ മാറ്റിയത് അവന് ഇഷ്ടമായില്ലെന്നാണ് പ്രതികരണത്തില്‍ നിന്ന് വ്യക്തമാകുന്നത്.

വീഡിയോ പങ്കുവെച്ച്‌ വീണാ ജോർജ്

ശങ്കുവിൻ്റെ ഈ മറുപടി വീഡിയോ ഇതിനോടകം വലിയ രീതിയില്‍ ട്രോളുകള്‍ക്കും ചർച്ചകള്‍ക്കും വഴിവെച്ചിട്ടുണ്ട്. മുൻ വനിതാ ശിശുവികസന ആരോഗ്യ വകുപ്പ് മന്ത്രി വീണാ ജോർജ് തൻ്റെ ഫേസ്ബുക്ക് പേജില്‍ ഈ വീഡിയോ പങ്കുവെച്ചിട്ടുണ്ട്. 'സാരമില്ല മോനേ കേട്ടോ' എന്ന അടിക്കുറിപ്പോടെയാണ് മുൻമന്ത്രി വീഡിയോ ഷെയർ ചെയ്തിരിക്കുന്നത്.

ബിരിയാണി ചോദിച്ച കൊച്ചുമിടുക്കൻ

നേരത്തെ അങ്കണവാടിയില്‍ ബിരിയാണി വേണമെന്ന് ശങ്കു ആവശ്യപ്പെട്ടത് കേരളത്തില്‍ വലിയ ചർച്ചയായിരുന്നു. ഈ ആവശ്യം പരിഗണിച്ച്‌ മുൻ ആരോഗ്യമന്ത്രിയും വനിതാ ശിശുവികസന വകുപ്പ് മന്ത്രിയുമായിരുന്ന വീണാ ജോർജ് അങ്കണവാടികളിലെ മെനുവില്‍ മാറ്റം വരുത്തുകയും, ബിരിയാണിയും പൊരിച്ച കോഴിയും ഉള്‍പ്പെടുത്തി പ്രത്യേക വിജ്ഞാപനം ഇറക്കുകയും ചെയ്തിരുന്നു. ഈ വിവാദങ്ങള്‍ക്ക് പിന്നാലെയാണ് കൊച്ചുമിടുക്കൻ തൻ്റെ കുടുംബ പശ്ചാത്തലം വ്യക്തമാക്കി വീണ്ടും എത്തിയിരിക്കുന്നത്.