ഉപയോക്താക്കളുടെ വ്യക്തിഗത വിവരങ്ങളോ തിരിച്ചറിയല്‍ രേഖകളോ ചോരാതെതന്നെ പ്രായത്തിനനുയോജ്യമായ കണ്ടന്‍റുകളും ആപ്പ് ഫീച്ചറുകളും ലഭ്യമാക്കാൻ ഇത് ആപ്പ് ഡെവലപ്പർമാരെ സഹായിക്കും.

ഗൂഗിളിന്‍റെ നിലവിലുള്ള 'ഫാമിലി ലിങ്ക്' ആപ്പുമായി ബന്ധിപ്പിച്ചാണ് ഇത് പ്രവർത്തിക്കുന്നത്. രക്ഷിതാക്കള്‍ അവരുടെ കുട്ടികളുടെ പ്രായപരിധി സെറ്റ് ചെയ്താല്‍ ഇതനുസരിച്ച്‌ ആ പ്രായക്കാർക്ക് അനുയോജ്യമായ ആപ്പുകളും ഉള്ളടക്കങ്ങളും മാത്രം നല്‍കാൻ ആപ്പ് ഡെവലപ്പർമാർക്കു കഴിയും. പൂർണമായും ഓപ്ഷണല്‍ ആയ ഈ സിസ്റ്റം രക്ഷാകർത്താക്കള്‍ക്ക് ഏതു സമയത്തും മാറ്റാനോ ഓഫ് ചെയ്യാനോ സാധിക്കും.

അമേരിക്കയിലെ വിവിധ സംസ്ഥാനങ്ങളില്‍ ആപ്പ് സ്റ്റോറുകള്‍ കേന്ദ്രീകരിച്ച്‌ ഏജ് വെരിഫിക്കേഷൻ നിയമങ്ങള്‍ കർശനമാക്കിയ പശ്ചാത്തലത്തിലാണ് ഗൂഗിള്‍ ഈ മാറ്റം അവതരിപ്പിക്കുന്നത്. കഴിഞ്ഞ വർഷം ബീറ്റ പതിപ്പായി അവതരിപ്പിച്ച ഈ സിസ്റ്റം നിലവില്‍ ബ്രസീലില്‍ ലഭ്യമാണ്. ഓഗസ്റ്റ് പകുതിയോടെ ഓസ്‌ട്രേലിയ, കാനഡ എന്നീ രാജ്യങ്ങളിലേക്കും തുടർന്ന് വർഷാവസാനത്തോടെ മറ്റു രാജ്യങ്ങളിലേക്കും സേവനം വ്യാപിപ്പിക്കാനാണ് ഗൂഗിള്‍ ലക്ഷ്യമിടുന്നത്.

എന്നാല്‍, ഇത് എത്രത്തോളം ഫലപ്രദമാകുമെന്നതിലും സ്വകാര്യതയെ ബാധിക്കുമോ എന്നതിലും ആശങ്ക നിലനില്‍ക്കുന്നുണ്ട്. കുട്ടികള്‍ തെറ്റായ വിവരങ്ങള്‍ നല്‍കി പുതിയ അക്കൗണ്ട് ഉണ്ടാക്കാൻ സാധ്യതയുണ്ടെന്ന ആശങ്ക നിലനില്‍ക്കുന്നുണ്ടെങ്കിലും കുട്ടികളുടെ സുരക്ഷ ഉറപ്പാക്കാനുള്ള വലിയൊരു ചുവടുവയ്പ്പായാണ് ഗൂഗിള്‍ ഇതിനെ കാണുന്നത്.