തിരുവനന്തപുരം : എച്ച്എല്എല് ലൈഫ്കെയർ ലിമിറ്റഡിന്റെ (എച്ച്എല്എല്) വജ്രജൂബിലിയോടനുബന്ധിച്ച് 60 രൂപയുടെ സ്മരണിക നാണയം പുറത്തിറക്കി.
എച്ച്എല്എല് പേരൂർക്കട ഫാക്ടറിയിലെ
തിരുവനന്തപുരം : എച്ച്എല്എല് ലൈഫ്കെയർ ലിമിറ്റഡിന്റെ (എച്ച്എല്എല്) വജ്രജൂബിലിയോടനുബന്ധിച്ച് 60 രൂപയുടെ സ്മരണിക നാണയം പുറത്തിറക്കി. എച്ച്എല്എല് പേരൂർക്കട ഫാക്ടറിയിലെ സർഗം ഹാളില് നടന്ന വജ്രജൂബിലി ആഘോഷങ്ങളുടെ സമാപന സമ്മേളനത്തില് പുറത്തിറക്കിയ പ്രത്യേക സ്മരണിക നാണയം കേന്ദ്ര ആരോഗ്യ-കുടുംബക്ഷേമ മന്ത്രാലയം സെക്രട്ടറി പുണ്യ സലില ശ്രീവാസ്തവ ഐഎഎസ് പ്രകാശനം ചെയ്തു.
രാജ്യത്തിന്റെ പൊതുജനാരോഗ്യ മേഖലയില് എച്ച്എല്എല് നല്കുന്ന സേവനങ്ങള് തികച്ചും മാതൃകാപരമാണെന്ന് ചടങ്ങില് സംസാരിച്ച സെക്രട്ടറി പറഞ്ഞു. രാജ്യത്തിന് മികച്ച സേവനം നല്കാൻ എച്ച്എല്എല്ലിനുള്ള കരുത്തില് കേന്ദ്ര ആരോഗ്യ-കുടുംബക്ഷേമ മന്ത്രി ജഗത് പ്രകാശ് നഡ്ഡയ്ക്ക് പൂർണ വിശ്വാസമാണുള്ളത്. എച്ച്എല്എല്ലിന്റെ ‘അമൃത്’ ഫാർമസി ശൃംഖല വഴി കാൻസർ മരുന്നുകളും ബ്രാൻഡഡ് ഔഷധങ്ങളും മെഡിക്കല് ഉപകരണങ്ങളും രോഗികള്ക്ക് 50 ശതമാനം വരെ വിലക്കിഴിവില് ലഭ്യമാക്കാൻ കഴിഞ്ഞത് മന്ത്രാലയത്തിന്റെ അഭിമാന നേട്ടമാണ്. ‘ഓപ്പറേഷൻ സിന്ദൂർ’ ദൗത്യത്തില് സർജിക്കല് സാമഗ്രികള്, മരുന്നുകള്, ഭീഷ്മ ക്യൂബുകള് എന്നിവയുള്പ്പെടെയുള്ള അത്യാവശ്യ മെഡിക്കല് ഉല്പ്പന്നങ്ങള് കൃത്യസമയത്ത് എത്തിക്കാൻ എച്ച്എല്എല്ലിന് സാധിച്ചു. കോവിഡ് മഹാമാരിയുടെ കടുത്ത പ്രതിസന്ധി ഘട്ടത്തിലും അവശ്യമരുന്നുകളും ആരോഗ്യസുരക്ഷാ സാമഗ്രികളും തടസ്സമില്ലാതെ ലഭ്യമാക്കുന്നതില് സ്ഥാപനം നിർണായക പങ്കാണ് വഹിച്ചത്. രാജ്യം കടുത്ത പ്രതിസന്ധികളെ അഭിമുഖീകരിച്ചപ്പോഴൊക്കെയും മാതൃകാപരമായ സേവനവുമായി എച്ച്എല്എല് എപ്പോഴും മുന്നില് നിന്നിട്ടുണ്ടെന്നും സെക്രട്ടറി കൂട്ടിച്ചേർത്തു.
രാജ്യത്തിന്റെ ആരോഗ്യരംഗത്ത് വിപ്ലവകരമായ മുന്നേറ്റങ്ങളുമായി ആറ് പതിറ്റാണ്ടിന്റെ ജനസേവനം പൂർത്തിയാക്കുമ്പോള്, ജനങ്ങളോടുള്ള തങ്ങളുടെ പ്രതിബദ്ധതയും ഉത്തരവാദിത്തവും ഇരട്ടിയാകുകയാണെന്ന് എച്ച്എല്എല് ചെയർമാനും മാനേജിംഗ് ഡയറക്ടറുമായ ഡോ. അനിത തമ്പി പറഞ്ഞു. വരും നാളുകളില് കാലഘട്ടത്തിനനുസരിച്ചുള്ള മാറ്റങ്ങളോടെ കൂടുതല് വിപുലമായ പദ്ധതികളിലേക്ക് എച്ച്എല്എല് ചുവടുവെക്കും. ന്യൂട്രീഷൻ, നിർമ്മിത ബുദ്ധി പ്രയോജനപ്പെടുത്തിയുള്ള അത്യാധുനിക ആരോഗ്യ പരിഹാരങ്ങള് തുടങ്ങിയ മേഖലകളിലേക്ക് പ്രവർത്തനം വ്യാപിപ്പിക്കാനാണ് കമ്പനി ലക്ഷ്യമിടുന്നത്. ഇതിലൂടെ രാജ്യത്തെ കൂടുതല് ജനവിഭാഗങ്ങളിലേക്ക് മികച്ച ആരോഗ്യസേവനങ്ങള് എത്തിക്കാൻ സാധിക്കുമെന്നും ഡോ. അനിത തമ്പി കൂട്ടിച്ചേർത്തു. എച്ച്എല്എല് ഡയറക്ടർമാരായ എൻ. അജിത് (മാർക്കറ്റിങ്), പി. രമേഷ് (ഫിനാൻസ്), ബെന്നി ജോസഫ് (ടി ആൻഡ് ഒ) എന്നിവരും ചടങ്ങില് സന്നിഹിതരായിരുന്നു.
സെക്യൂരിറ്റി പ്രിന്റിംഗ് ആൻഡ് മിന്റിംഗ് കോർപ്പറേഷൻ ഓഫ് ഇന്ത്യ ലിമിറ്റഡിന്റെ (SPMCIL) കീഴിലുള്ള ഹൈദരാബാദിലെ ഇന്ത്യ ഗവണ്മെന്റ് മിന്റാണ് സ്മരണിക നാണയങ്ങളും, അവയുടെ എക്സിക്യൂട്ടീവ് സ്റ്റാൻഡുകളും ഉദ്ഘാടന ഫ്രെയിമുകളും നിർമ്മിച്ചത്.
ചടങ്ങില്, ഐഐടി മദ്രാസുമായി സഹകരിച്ചുള്ള ‘ഹെല്ത്ത് ഇന്നൊവേഷൻ ട്രാൻസ്ലേഷൻ സ്കെയില്-അപ്പ് സെന്റർ’, ‘എച്ച്എല്എല് പരിവർത്തൻ – വെല്നസ് ക്ലിനിക്’ എന്നീ പുതിയ പദ്ധതികള്ക്ക് തുടക്കം കുറിച്ചു. ‘സെറിഡ്രെയിൻ ഹൈഡ്രോസെഫാലസ് ഷണ്ട്’, പരിസ്ഥിതി സൗഹൃദ സാനിറ്ററി നാപ്കിനായ ‘എച്ച്എല്എല് ഹാപ്പി ഡേയ്സ് – എർത്ത്’, പാക്കേജ്ഡ് ഡ്രിങ്കിംഗ് വാട്ടർ ബ്രാൻഡായ ‘എച്ച്എല്എല് വാട്ടർ’ എന്നീ ഉല്പ്പന്നങ്ങളും പുറത്തിറക്കി. കൂടാതെ, ആരോഗ്യരംഗത്തെ സാങ്കേതിക പങ്കാളിത്തം ശക്തമാക്കുന്നതിനായി ഐഐടി ബോംബെയുമായി ചടങ്ങില് ധാരണാപത്രത്തില് ഒപ്പുവച്ചു.
കേന്ദ്ര ആരോഗ്യ-കുടുംബക്ഷേമ മന്ത്രാലയത്തിന് കീഴിലുള്ള മിനിരത്ന പൊതുമേഖലാ സ്ഥാപനമാണ് എച്ച്എല്എല്.