ജനവാസ മേഖലകളെയും കൃഷിയിടങ്ങളെയും പരിസ്ഥിതി ലോല പരിധിയില്‍ നിന്ന് പൂർണ്ണമായും ഒഴിവാക്കണമെന്നാണ് സർക്കാരിന്റെ പ്രധാന ആവശ്യം. നിലവിലെ പട്ടികയിലുള്ള 131 വില്ലേജുകളില്‍ നിന്ന് 33 വില്ലേജുകള്‍ ഒഴിവാക്കണമെന്നും, കരട് വിജ്ഞാപനത്തിലെ 9,993.7 ചതുരശ്ര കിലോമീറ്റർ വിസ്തീർണ്ണം 8,590 ചതുരശ്ര കിലോമീറ്ററായി നിജപ്പെടുത്തണമെന്നും വ്യക്തമാക്കി. ഇടുക്കി ജില്ലയിലെ 54 വില്ലേജുകളും കോട്ടയത്തെ 4 വില്ലേജുകളും ഉള്‍പ്പെടെ ജനവാസമുള്ള നിരവധി പ്രദേശങ്ങള്‍ പട്ടികയിലുണ്ട്. ഇതില്‍ ചില വില്ലേജുകളെ ഒഴിവാക്കാനാണ് സംസ്ഥാന സർക്കാരിന്റെ നീക്കം. പൊതുജനങ്ങള്‍ക്ക് അഭിപ്രായം രേഖപ്പെടുത്താനുള്ള സമയപരിധിയും ഇന്ന് പൂർത്തിയാകും.