തിരുവനന്തപുരം: സംസ്ഥാനത്ത് വൈദ്യുതി പ്രതിസന്ധി ഇന്നും തുടരുമെന്ന് കെ.എസ്.ഇ.ബിയുടെ മുന്നറിയിപ്പ്. എല്നിനോ പ്രതിഭാസത്തെ തുടർന്നുള്ള മഴക്കുറവും കനത്ത ചൂടും കാരണം
ദേശീയ തലത്തില് ഗ്രിഡ് കണ്ട്രോളർ ഓഫ് ഇന്ത്യ അറിയിച്ച 12,000 മെഗാവാട്ടിന്റെ ലഭ്യതക്കുറവ് പൂർണ്ണമായി പരിഹരിക്കാൻ സാധിച്ചിട്ടില്ല. സെൻട്രല് ജനറേറ്റിംഗ് സ്റ്റേഷനില് നിന്നുള്ള വിഹിതത്തിലും അപ്രതീക്ഷിതമായി കുറവുണ്ടായിട്ടുണ്ട്.
കഴിഞ്ഞ ദിവസം രാത്രി 10:30-ന് രേഖപ്പെടുത്തിയ 5,349 മെഗാവാട്ട് ഡിമാൻഡ് സാധാരണ വേനല്ക്കാലങ്ങളില് അനുഭവപ്പെടുന്നതിന് തുല്യമാണ്. മുൻവർഷങ്ങളിലെ സെപ്റ്റംബർ മാസത്തെ ഡിമാൻഡിനേക്കാള് ഏകദേശം 1,100 മെഗാവാട്ടിന്റെ വർദ്ധനവാണ് ഇത്തവണ രേഖപ്പെടുത്തിയത്. മധ്യപ്രദേശില് നിന്നുള്ള കൈമാറ്റകരാര് വഴിയുള്ള 200 മെഗാവാട്ട് വൈദ്യുതിയുടെ ലഭ്യത ഇന്ന് മുടങ്ങിയതോടെ പ്രതിസന്ധി കൂടുതല് രൂക്ഷമായി. മൊത്തത്തില് 900 മുതല് 1,000 മെഗാവാട്ട് വരെ വൈദ്യുതിയുടെ ലഭ്യതക്കുറവാണ് സംസ്ഥാനത്ത് നിലവിലുള്ളത്.