ന്യൂഡല്‍ഹി: വിദേശകാര്യമന്ത്രി എസ്. ജയശങ്കറിന്റെ അമ്മ സുലോചന സുബ്രഹ്മണ്യന്‍ നിര്യാതയായി.വാര്‍ദ്ധക്യ സഹജമായ അസുഖങ്ങളെ തുടര്‍ന്ന് ചികിത്സയിലിരിക്കേ കഴിഞ്ഞ ദിവസം വൈകീട്ടോടെയായിരുന്നു അന്ത്യം. മാതാവിന്റെ മരണവിവരം മന്ത്രിതന്നെയാണ് ട്വിറ്ററിലൂടെ അറിയിച്ചത്.
80 കളില്‍ എടുത്ത മാതാവിന്റെ ചിത്രത്തോട് കൂടിയായിരുന്നു അദ്ദേഹം മരണ വിവരം ട്വീറ്റ് ചെയ്തത്. മാതാവ് സുലോചന സുബ്രമണ്യം അന്തരിച്ച വിവരം വ്യസനസമേതം അറിയിച്ചുകൊള്ളുന്നു. അസുഖബാധിതയായ സമയത്ത് പിന്തുണ നല്‍കിയ എല്ലാവര്‍ക്കും നന്ദി അറിയിക്കുന്നതായും അദ്ദേഹം ട്വിറ്ററില്‍ കുറിച്ചു.
വിദേശകാര്യവിദഗ്ധനും മുന്‍ സിവില്‍ സര്‍വീസ് ഉദ്യോഗസ്ഥനുമായ പരേതനായ കെ. സുബ്രഹ്മണ്യന്‍റെ ഭാര്യയാണ്. എസ്. വിജയകുമാര്‍, സഞ്ജയ് സുബ്രഹ്മണ്യം എന്നിവരാണു മറ്റു മക്കള്‍. നിര്യാണത്തില്‍ കേന്ദ്രമന്ത്രി കിരണ്‍ റിജ്ജുജു, ബിജെപി നേതാവ് രാം മാധവ്, നീതി ആയോഗ് സിഇഒ അമിതാഭ് കാന്ത് തുടങ്ങിയവര്‍ അനുശോചനം രേഖപ്പെടുത്തി.