രാജ്യത്തെ ധനകാര്യ സ്ഥാപനങ്ങളുടെ(എന്.ബി.എഫ്.സി) സ്വര്ണ പണയ വായ്പകള് മേയില് 69.9 ശതമാനം വര്ദ്ധനയോടെ 3.30 ലക്ഷം കോടി രൂപയിലെത്തി. ഹൗസിംഗ് ഫിനാന്സ് കമ്പനികളടക്കം മികച്ച വളര്ച്ചയാണ് സ്വര്ണ വായ്പകളില് നേടിയത്. എന്.ബി.എഫ്.സികളുടെ മൊത്തം വായ്പ 14.2 ശതമാനം ഉയര്ന്ന് 58.61 ലക്ഷം കോടി രൂപയായി. മൊത്തം വായ്പയുടെ 43 ശതമാനം വിഹിതവുമായി റീട്ടെയില് മേഖലയാണ് ഒന്നാം സ്ഥാനത്ത്. കഴിഞ്ഞ വര്ഷം മേയില് സ്വര്ണാഭരണങ്ങള് പണയം വെച്ച് ഉപഭോക്താക്കള് 1.94 ലക്ഷം കോടി രൂപയുടെ വായ്പകളാണ് വാങ്ങിയിരുന്നത്. കണ്സ്യൂമര് ഡ്യൂറബിള് വായ്പകളില് 42 ശതമാനവും വാണിജ്യ റിയല് എസ്റ്റേറ്റ് വായ്പകളില് 40.2 ശതമാനവും വളര്ച്ചയുണ്ടായി. മൊത്തം റീട്ടെയില് വായ്പകളില് 19.5 ശതമാനം വര്ദ്ധനയുണ്ട്.