തമിഴ്നാട് വമ്പന് പ്രഖ്യാപനങ്ങളുമായി ടിവികെ സര്ക്കാര്
കേന്ദ്രമന്ത്രിമാരുടെ വസതികള് മോടിപിടിപ്പിക്കാന് ചെലവാക്കിയത് 92 കോടി
ഡല്ഹിയില് കനത്ത മഴയെയും ഇടിമിന്നലിനെയും തുടര്ന്ന് ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ നിരവധി സര്വീസുകള് റദ്ദാക്കി. ലാന്ഡ് ചെയ്യാനുള്ള 15 വിമാനങ്ങള് വഴിതിരിച്ചുവിട്ടതായും ഡല്ഹി ഇന്റര്നാഷണല് എയര്പോര്ട്ട് ലിമിറ്റഡ് അറിയിച്ചു. കനത്ത മഴ, ശക്തമായ കാറ്റ്, കാഴ്ചപരിധി കുറഞ്ഞത് എന്നിവയെ തുടര്ന്നാണ് സര്വീസുകള് തിരിച്ചുവിട്ടത്. പത്ത് ആഭ്യന്തര വിമാനങ്ങളും അഞ്ച് അന്താരാഷ്ട്ര വിമാനങ്ങളുമാണ് വഴിതിരിച്ചുവിട്ടത്. 12 എണ്ണം ജയ്പൂരിലേക്കും രണ്ടെണ്ണം ചണ്ഡിഗഢിലേക്കും ഒരെണ്ണം ലക്നൗവിലേക്കുമാണ് തിരിച്ചുവിട്ടത്.
കാലാവസ്ഥ മോശമായതോടെ വിമാന സര്വീസുകളുടെ സമയക്രമത്തിലും കമ്പനികള് മാറ്റം വരുത്തിയിട്ടുണ്ട്. സര്വീസുകള് വൈകുകയോ റദ്ദാക്കുകയോ ചെയ്യാനുള്ള സാദ്ധ്യതയുണ്ടെന്ന് വിമാനക്കമ്പനികള് അറിയിച്ചു. ഡല്ഹിയിലെ മോശം കാലാവസ്ഥ വിമാന സര്വീസുകളെ ബാധിച്ചേക്കാമെന്ന് ഇന്ഡിഗോ, എയര് ഇന്ത്യ, സ്പൈസ്ജെറ്റ് തുടങ്ങിയ കമ്പനികള് യാത്രക്കാര്ക്ക് മുന്നറിയിപ്പ് നല്കിയിട്ടുണ്ട്. വിമാനത്താവളത്തിലേക്ക് പുറപ്പെടുന്നതിന് മുമ്പ് തങ്ങളുടെ വിമാന സര്വീസിന്റെ നിലവിലെ സ്ഥിതി വെബ്സൈറ്റിലൂടെയോ മൊബൈല് ആപ്പിലൂടെയോ പരിശോധിക്കണമെന്നും കമ്പനി അറിയിച്ചു.
ഡല്ഹിയിലും സമീപ പ്രദേശങ്ങളിലും ശക്തമായ മഴ പെയ്തതിനെ തുടര്ന്ന് നഗരത്തിന്റെ വിവിധ ഭാഗങ്ങളില് വെള്ളക്കെട്ടും ഗതാഗതക്കുരുക്കും രൂക്ഷമായി. ഇതോടെയാണ് വിമാനത്താവളത്തിന്റെ പ്രവര്ത്തനങ്ങളും അവതാളത്തിലായത്. കനത്ത മഴ തുടരാന് സാദ്ധ്യതയുള്ളതിനാല് ഡല്ഹിയിലെ ചില പ്രദേശങ്ങളില് കേന്ദ്ര കാലാവസ്ഥാ വകുപ്പ് റെഡ് അലര്ട്ടും മറ്റ് മേഖലകളില് യെല്ലോ അലര്ട്ടും പ്രഖ്യാപിച്ചിട്ടുണ്ട്.