വി. ശിവൻകുട്ടിയെ കുറിച്ച് നിർണായകമായ ഫേസ്ബുക്ക് കുറിപ്പ് പങ്കു വച്ച് ബിനീഷ് കോടിയേരി. അദ്ദേഹത്തിന്റെ ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ;-
അക്ഷരമുറ്റത്ത് സ്നേഹത്തിന്റെ കൈയൊപ്പ് ചാർത്തിയ സഖാവ്! പദവികളല്ല, താൻ ചെയ്ത പ്രവർത്തനങ്ങളാണ് ഒരാളെ ചരിത്രത്തില് അടയാളപ്പെടുത്തുന്നത്. കേരളം കണ്ട ഏറ്റവും മികച്ച വിദ്യാഭ്യാസ മന്ത്രിമാരില് ഒരാളായി സഖാവ് വി. ശിവൻകുട്ടി എന്നും ഓർമ്മിക്കപ്പെടും. കേവലം ഒരു മന്ത്രി എന്നതിലുപരി, കുട്ടികളുടെയും രക്ഷിതാക്കളുടെയും പ്രിയപ്പെട്ട 'ശിവൻകുട്ടി അപ്പുപ്പൻ' ആയി അദ്ദേഹം മാറിയത് ആത്മാർത്ഥമായ ഇടപെടലുകളിലൂടെയാണ്.
അക്ഷരമുറ്റത്തെ കരുതലിന്റെ മുഖം, ദുരന്തങ്ങള് തളർത്തിയ കുട്ടികള്ക്ക് പഠനം മുടങ്ങില്ലെന്ന് ഉറപ്പുവരുത്തിയ ആ വലിയ മനസ്സ് നമ്മള് കണ്ടതാണ്. "പണമില്ലാത്തതിന്റെ പേരില് ഒരു കുട്ടി പോലും വിനോദയാത്രകളില് നിന്ന് ഒഴിവാക്കപ്പെടരുത്" എന്ന കർശന നിർദ്ദേശം നല്കിയപ്പോള്, അത് സാധാരണക്കാരായ ആയിരക്കണക്കിന് വിദ്യാർത്ഥികള്ക്ക് നല്കിയ ആത്മവിശ്വാസം ചെറുതല്ല. ക്ലാസ് മുറികളില് മറ്റ് കുട്ടികളുടെ മുന്നില് വെച്ച് ഫീസ് ചോദിച്ച് ഒരു കുഞ്ഞുമനസ്സും വേദനിക്കാൻ പാടില്ലെന്ന അദ്ദേഹത്തിന്റെ നിലപാട് വിപ്ലവകരമായിരുന്നു.