കണ്ണുകളില്‍ ചൊറിച്ചിലോ അസ്വസ്ഥതയോ തോന്നുമ്പോള്‍ കൈകള്‍ കൊണ്ട് കണ്ണ് തിരുമ്മുന്നത് പലരുടെയും ഒരു പൊതുവായ ശീലമാണ്.

എന്നാല്‍, സാധാരണയായി നമ്മള്‍ ചെയ്യുന്ന ഈ കുഞ്ഞു ശീലം കണ്ണിന്റെ ആരോഗ്യത്തെ ഗുരുതരമായി ബാധിക്കുമെന്നാണ് നേത്രരോഗ വിദഗ്ദ്ധർ മുന്നറിയിപ്പ് നല്‍കുന്നത്. കണ്ണുകള്‍ അമിതമായി തിരുമ്മുന്നത് കാഴ്ചയെപ്പോലും ബാധിക്കുന്ന പലവിധ പ്രശ്നങ്ങള്‍ക്ക് കാരണമാകുന്നു.

കണ്ണ് തിരുമ്മുന്നത് കൊണ്ടുള്ള പ്രധാന ആരോഗ്യപ്രശ്നങ്ങള്‍

അണുബാധയ്ക്കുള്ള സാധ്യത: നമ്മുടെ കൈകളില്‍ നിരവധി അണുക്കളും ബാക്ടീരിയകളുമുണ്ട്. കണ്ണ് തിരുമ്മുമ്പോള്‍ ഇവ എളുപ്പത്തില്‍ കണ്ണിലെത്തുകയും കടുത്ത അണുബാധയ്ക്ക് (Infections) കാരണമാകുകയും ചെയ്യും.

കണ്ണുകള്‍ക്ക് ചുറ്റുമുള്ള കറുത്ത പാടുകള്‍: കണ്ണുകള്‍ക്ക് ചുറ്റുമുള്ള ചർമ്മവും രക്തധമനികളും വളരെ നേർത്തതാണ്. അമിതമായി തിരുമ്മുമ്പോള്‍ ഈ ചെറിയ രക്തധമനികള്‍ക്ക് കേടുപാടുകള്‍ സംഭവിക്കുകയും ഇത് കണ്ണിന് ചുറ്റും കറുത്ത പാടുകള്‍ (Dark circles) വരാൻ കാരണമാകുകയും ചെയ്യുന്നു.

കോർണിയയ്ക്ക് കേടുപാടുകള്‍: കണ്ണ് നിരന്തരം തിരുമ്മുന്നത് കോർണിയയുടെ ഘടനയെ ബാധിക്കുകയും കാഴ്ച മങ്ങുന്നതുള്‍പ്പെടെയുള്ള ഗുരുതരമായ അവസ്ഥകളിലേക്ക് നയിക്കുകയും ചെയ്യാം.

സബ്കോണ്‍ജങ്ക്റ്റിവല്‍ രക്തസ്രാവം (Subconjunctival Hemorrhage): ശക്തമായി തിരുമ്മുമ്പോള്‍ കണ്ണിന്റെ ഉപരിതലത്തിലുള്ള ചെറിയ രക്തക്കുഴലുകള്‍ പൊട്ടാൻ സാധ്യതയുണ്ട്. ഇത് കണ്ണ് പെട്ടെന്ന് കടും ചുവപ്പ് നിറമാകാൻ കാരണമാകുന്നു.

എന്തുകൊണ്ടാണ് കണ്ണുകളില്‍ ചൊറിച്ചില്‍ അനുഭവപ്പെടുന്നത്?

നേത്രരോഗ വിദഗ്ദ്ധരെ ആളുകള്‍ സമീപിക്കുന്നതിനുള്ള ഏറ്റവും പ്രധാനപ്പെട്ട കാരണം കണ്ണിലെ ചൊറിച്ചിലും അസ്വസ്ഥതയുമാണ്. ഇതിന് പിന്നിലെ പ്രധാന വില്ലന്മാർ താഴെ പറയുന്നവയാണ്:

അലർജി കണ്‍ജങ്ക്റ്റിവിറ്റിസ് (Allergic Conjunctivitis): കണ്‍പോളകളുടെ ഉള്‍ വശത്തെ ചർമ്മത്തിലുണ്ടാകുന്ന അലർജി പ്രതികരണമാണിത്. ചൊറിച്ചില്‍ അനുഭവപ്പെടുന്നവരില്‍ 50 ശതമാനം പേരിലും കാരണം ഇതാണ്. ഇതിലൂടെ കണ്ണ് ചുവക്കുക, വീക്കം, കണ്‍പോളകളുടെ ഉള്ളില്‍ ചെറിയ മുഴകള്‍ എന്നിവ അനുഭവപ്പെടാം.