ഹൈദരാബാദ്: ഹൈദരാബാദിലെ രാജീവ് ഗാന്ധി ഇന്റർനാഷണല്‍ സ്റ്റേഡിയത്തില്‍ ഇന്ന് തീപാറുന്ന പോരാട്ടം. ഐപിഎല്ലിലെ ആവേശകരമായ മത്സരത്തില്‍ പോയിന്റ് ടേബിളിലെ ഒന്നാം സ്ഥാനക്കാരായ പഞ്ചാബ് കിങ്‌സും മൂന്നാം സ്ഥാനത്തുള്ള സണ്‍റൈസേഴ്‌സ് ഹൈദരാബാദും നേർക്കുനേർ വരുന്നു.

ഈ സീസണില്‍ നേരത്തെ ഏറ്റുമുട്ടിയപ്പോള്‍ സണ്‍റൈസേഴ്‌സിനെ തോല്‍പ്പിച്ചതിന്റെ ആത്മവിശ്വാസത്തിലാണ് പഞ്ചാബ് ഇറങ്ങുന്നത്. എന്നാല്‍ സ്വന്തം തട്ടകത്തില്‍ ആ തോല്‍വിക്ക് പകരം വീട്ടാനും പോയിന്റ് പട്ടികയില്‍ ഒന്നാമതെത്താനുമാണ് പാറ്റ് കമ്മിൻസും സംഘവും ലക്ഷ്യമിടുന്നത്.

സീസണിന്റെ തുടക്കത്തില്‍ അല്‍പ്പം പതറിയ ഹൈദരാബാദ്, പഞ്ചാബിനോട് കഴിഞ്ഞ മാസം തോറ്റതോടെയാണ് ഉണർന്നു കളിച്ചത്. ആ തോല്‍വിക്ക് ശേഷം ബോളിങ് നിരയില്‍ വരുത്തിയ മാറ്റങ്ങള്‍ ടീമിന് തുടർച്ചയായ അഞ്ച് വിജയങ്ങള്‍ സമ്മാനിച്ചു. പരിചയസമ്പന്നരായ ജയ്‌ദേവ് ഉനദ്കട്ടിനും ഹർഷല്‍ പട്ടേലിനും പകരം യുവതാരങ്ങളായ പ്രഫുല്‍ ഹിംഗെയെയും സാക്കിബ് ഹുസൈനെയും ഉള്‍പ്പെടുത്തിയത് വഴിത്തിരിവായി. അരങ്ങേറ്റത്തില്‍ തിളങ്ങിയ ഹിംഗെ പിന്നീട് അല്‍പ്പം മങ്ങിയെങ്കിലും 22.55 ശരാശരിയില്‍ 9 വിക്കറ്റുകള്‍ വീഴ്ത്തിയ സാക്കിബ് ഹുസൈൻ ഹൈദരാബാദിന്റെ തുറുപ്പുചീട്ടാണ്.

ഒപ്പം ട്രാവിസ് ഹെഡ് ഫോമിലേക്ക് തിരിച്ചെത്തിയതും ഇഷാൻ മലിംഗയുടെ മികച്ച പ്രകടനവും ടീമിന് കരുത്തേകുന്നു. എന്നാല്‍ കഴിഞ്ഞ മത്സരത്തില്‍ കൊല്‍ക്കത്ത നൈറ്റ് റൈഡേഴ്‌സിനോട് തോറ്റത് അവരുടെ കുതിപ്പിന് ചെറിയൊരു തടസ്സമായിട്ടുണ്ട്. അഭിഷേക് ശർമ്മ, ട്രാവിസ് ഹെഡ്, ഇഷാൻ കിഷൻ, ഹെൻറിച്ച്‌ ക്ലാസൻ തുടങ്ങിയ താരങ്ങള്‍ അടങ്ങുന്ന ഹൈദരാബാദ് ബാറ്റിംഗ് നിര മികച്ച സ്‌കോർ പടുത്തുയർത്താൻ കെല്‍പ്പുള്ളവരാണ്.

ഒമ്പത് മത്സരങ്ങളില്‍ ആറ് വിജയങ്ങളുമായി പോയിന്റ് പട്ടികയില്‍ തലപ്പത്താണ് പഞ്ചാബ് കിങ്‌സ്. തുടർച്ചയായ ഏഴ് മത്സരങ്ങളില്‍ അപരാജിതരായി മുന്നേറിയ അവർക്ക് കഴിഞ്ഞ രണ്ട് കളികളിലേറ്റ തോല്‍വി അല്പം തിരിച്ചടിയായി. രാജസ്ഥാൻ റോയല്‍സിനോടും ഗുജറാത്ത് ടൈറ്റൻസിനോടുമാണ് പഞ്ചാബ് പരാജയപ്പെട്ടത്. രാജസ്ഥാനെതിരെ 222 റണ്‍സ് നേടിയിട്ടും ബോളിങ് നിരയിലെ പാളിച്ചകള്‍ കാരണം മത്സരം കൈവിട്ടുപോയി. വിക്കറ്റുകള്‍ വീഴ്ത്തുന്നതില്‍ പഞ്ചാബ് ബൗളർമാർ ഈ സീസണില്‍ പിന്നിലാണ്.

മാർക്കസ് സ്റ്റോയിനിസിന്റെ തകർപ്പൻ ഫോം അവർക്ക് ആശ്വാസമാണ്. രാജസ്ഥാനെതിരെ 22 പന്തില്‍ പുറത്താകാതെ 62 റണ്‍സും ഗുജറാത്തിനെതിരെ 40 റണ്‍സും നേടി സ്റ്റോയിനിസ് കരുത്ത് കാട്ടി. ഈ സീസണില്‍ പവർപ്ലേയില്‍ ഏറ്റവും കൂടുതല്‍ റണ്‍റേറ്റുള്ള (ഓവറില്‍ 12.40 റണ്‍സ്) ടീമാണ് പഞ്ചാബ് കിങ്‌സ്. ഓപ്പണർമാരായ പ്രഭ്‌സിമ്രാൻ സിംഗും (361 റണ്‍സ്) പ്രിയാൻഷ് ആര്യയും നല്‍കുന്ന വെടിക്കെട്ട് തുടക്കം മത്സരത്തിന്റെ തുടക്കത്തില്‍ തന്നെ ആധിപത്യം ഉറപ്പിക്കാൻ ടീമിനെ സഹായിക്കുന്നു.

ശ്രേയസ് അയ്യർ, നേഹല്‍ വധേര, ശശാങ്ക് സിംഗ് എന്നിവരടങ്ങുന്ന കരുത്തുറ്റ ഇന്ത്യൻ ബാറ്റിംഗ് നിര ടീമിന് വലിയ മുതല്‍ക്കൂട്ടാണ്. മൂന്നാം നമ്പറിലിറങ്ങുന്ന ശ്രേയസ് അയ്യർ ഇന്നിംഗ്‌സിന് സ്ഥിരത നല്‍കുമ്പോള്‍ വധേരയും ശശാങ്കും മിഡില്‍ ഓർഡറില്‍ മികച്ച പിന്തുണ നല്‍കുന്നു. തിരിച്ചുവരവില്‍ 29 പന്തില്‍ 57 റണ്‍സ് നേടിയ സൂര്യൻഷ് ഷെഡ്‌ഗെയും മധ്യനിരയില്‍ തിളങ്ങുന്നു. ഇന്ന് വിജയിക്കാനായാല്‍ പഞ്ചാബിന് ഒന്നാം സ്ഥാനം ഉറപ്പിക്കാം, എന്നാല്‍ തോറ്റാല്‍ ഹൈദരാബാദ് അവരെ മറികടന്ന് ഒന്നാമതെത്തും.