അതേസമയം, ഇന്നലെ നടന്ന മത്സരത്തില്‍ രാജസ്ഥാനെതിരെ തകർപ്പൻ ജയവുമായി സെമി സാധ്യതകള്‍ സജീവമാക്കിയിരിക്കുകയാണ് ഡല്‍ഹി. കെ എല്‍ രാഹുലിന്റെയും പതും നിസ്സങ്കയുടെയും തകർപ്പൻ ബാറ്റിംഗ് മികവില്‍ രാജസ്ഥാൻ ഉയർത്തിയ കൂറ്റൻ ലക്ഷ്യം മറികടന്ന് ഡല്‍ഹി ക്യാപിറ്റല്‍സ് സീസണിലെ തകർപ്പൻ ജയം സ്വന്തമാക്കി. ഏഴ് വിക്കറ്റിനാണ് ഡല്‍ഹി ജയ്പൂരില്‍ വിജയിച്ചുകയറിയത്.

സീസണിലെ മോശം ഫോമിനും ഡഗ് ഔട്ടിലെ വിവാദങ്ങള്‍ക്കും മറുപടിയുമായി 50 പന്തില്‍ 90 റണ്‍സടിച്ച റിയാൻ പരാഗാണ് രാജസ്ഥാനെ 225 എന്ന മികച്ച സ്കോറിലെത്തിച്ചത്. 32 പന്തില്‍ അർദ്ധ സെഞ്ച്വറി തികച്ച താരം ജാമിസണെയും സ്റ്റാർക്കിനെയും കണക്കിന് പ്രഹരിച്ചു. എന്നാല്‍ ഫീല്‍ഡിംഗിനിടെ ഹാംസ്ട്രിംഗ് പരിക്ക് അലട്ടിയ പരാഗ് രണ്ടാം ഇന്നിംഗ്സില്‍ ഭൂരിഭാഗം സമയവും പുറത്തിരുന്നു. പരാഗിന് പകരം യശസ്വി ജയ്‌സ്വാളാണ് ടീമിനെ നയിച്ചത്.

226 റണ്‍സ് വിജയലക്ഷ്യം പിന്തുടർന്ന ഡല്‍ഹിക്ക് വേണ്ടി രാഹുലും (75) നിസ്സങ്കയും (62) ചേർന്ന് വെടിക്കെട്ട് തുടക്കമാണ് നല്‍കിയത്. വെറും 9.3 ഓവറില്‍ ഇരുവരും ചേർന്ന് 102 റണ്‍സ് ഓപ്പണിംഗ് കൂട്ടുകെട്ടുണ്ടാക്കി. 27 പന്തില്‍ രാഹുല്‍ അർദ്ധ സെഞ്ച്വറി തികച്ചപ്പോള്‍ നിസ്സങ്ക 23 പന്തിലാണ് 50 കടന്നത്. രാഹുല്‍ മൈതാനത്തിന്റെ എല്ലാ കോണിലേക്കും ഷോട്ടുകള്‍ പായിച്ചപ്പോള്‍, നിസ്സങ്ക പുള്‍ ഷോട്ടുകളിലൂടെ മൂന്ന് സിക്സറുകള്‍ നേടി കാണികളെ ആവേശത്തിലാക്കി.

രാഹുലും നിതീഷ് റാണയും (33) പുറത്തായതോടെ അവസാന 26 പന്തില്‍ 49 റണ്‍സ് വേണമെന്ന നിലയിലായി ഡല്‍ഹി. എന്നാല്‍ അശുതോഷ് ശർമ്മയും ട്രിസ്റ്റൻ സ്റ്റബ്സും ചേർന്ന് പതറാതെ കളിച്ച്‌ ഡല്‍ഹിയെ വിജയതീരത്ത് എത്തിച്ചു. ഐപിഎല്‍ ചരിത്രത്തിലെ ഡല്‍ഹിയുടെ ഏറ്റവും വലിയ റണ്‍ ചേസാണിത്. ഈ വിജയത്തോടെ 8 പോയിന്റുമായി ഡല്‍ഹി ക്യാപിറ്റല്‍സ് ആറാം സ്ഥാനത്തേക്ക് ഉയർന്നു. തോറ്റെങ്കിലും 12 പോയിന്റുള്ള രാജസ്ഥാൻ റോയല്‍സ് പട്ടികയില്‍ നാലാം സ്ഥാനത്ത് തുടരുന്നു.

രാജസ്ഥാൻ റോയല്‍സ്: 225/6 (20 ഓവർ) - റിയാൻ പരാഗ് 90, ഫെരേര 47, സ്റ്റാർക്ക് 3/40.

ഡല്‍ഹി ക്യാപിറ്റല്‍സ്: 226/3 (19.4 ഓവർ) - കെ എല്‍ രാഹുല്‍ 75, പതും നിസ്സങ്ക 62.