ഒസ്‌ലോ: 1998ന് ശേഷം ആദ്യമായി നോർവേ ലോകകപ്പ് കളിക്കാനിറങ്ങുമ്പോള്‍ ഫുട്ബോള്‍ ലോകം ഉറ്റുനോക്കുന്നത് ഒരേയൊരു പേരാണ്—എർലിങ് ഹാലൻഡ്.

യോഗ്യതാ റൗണ്ടില്‍ എതിരാളികളുടെ വല തുളച്ച്‌ 16 ഗോളുകള്‍ അടിച്ചുകൂട്ടിയ ഹാലൻഡിന്റെ അസാധാരണ ഫോമാണ് നോർവേയുടെ കരുത്ത്. മുൻ ലോക ചാമ്പ്യന്മാരായ ഇറ്റലിയെപ്പോലും അനായാസം അടിച്ചൊതുക്കി ലോകകപ്പ് ടിക്കറ്റെടുത്ത നോർവീജിയൻ പട, ഗ്രൂപ്പ് ഐ-ലെ കടുത്ത പോരാട്ടങ്ങള്‍ക്കായി കോച്ച്‌ സ്റ്റാലെ സോള്‍ബാക്കന് കീഴില്‍ സജ്ജമായിക്കഴിഞ്ഞു.

കഴിഞ്ഞ നവംബറിലാണ് നോർവേ ലോകകപ്പ് ടിക്കറ്റ് ഉറപ്പിച്ചത്. നോർവേ അവസാനമായി ലോകകപ്പ് കളിക്കുമ്പോള്‍ സോള്‍ബാക്കൻ ആ ടീമിലെ മിഡ്ഫീല്‍ഡർ ആയിരുന്നു. ഇപ്പോള്‍ കോച്ചായും അദ്ദേഹം ടീമിനൊപ്പമുണ്ട്. തങ്ങളുടെ രാജ്യം ലോകകപ്പ് കളിക്കുന്നത് കാണാൻ മൂന്ന് പതിറ്റാണ്ടോളം കാത്തിരുന്ന സാധാരണക്കാരായ ആരാധകർക്ക് ഈ നേട്ടം വലിയൊരു ആശ്വാസമാണെന്ന് സോള്‍ബാക്കൻ ഫിഫയോട് പറഞ്ഞു. യോഗ്യത ഉറപ്പിച്ച മത്സരത്തില്‍ മൈനസ് 4 ഡിഗ്രി തണുപ്പിലും തങ്ങളെ സ്വീകരിക്കാൻ അൻപതിനായിരത്തോളം ആരാധകരാണ് തടിച്ചുകൂടിയത്. കരുത്തരായ ഇറ്റലിയെ 3-0 ന് തോല്‍പ്പിച്ചതോടെയാണ് നോർവേയ്ക്ക് യോഗ്യത ഉറപ്പായത്.

നോർവേയുടെ സ്വപ്നതുല്യമായ ഈ കുതിപ്പിന് പിന്നില്‍ മാഞ്ചസ്റ്റർ സിറ്റിയുടെ സൂപ്പർ സ്‌ട്രൈക്കർ എർലിങ് ഹാലൻഡിന്റെ കരുത്തുറ്റ പ്രകടനമായിരുന്നു. യോഗ്യതാ റൗണ്ടില്‍ ആഗോളതലത്തില്‍ തന്നെ ഏറ്റവും കൂടുതല്‍ ഗോളുകള്‍ നേടിയത് ഹാലൻഡ് ആണ്—16 ഗോളുകള്‍. യൂറോപ്പില്‍ ഹാലൻഡിന്റെ തൊട്ടുപിന്നിലുള്ള ഓസ്ട്രിയയുടെ മാർക്കോ അർനൗട്ടോവിച്ച്‌, ഇംഗ്ലണ്ട് ക്യാപ്റ്റൻ ഹാരി കെയ്ൻ, നെതർലൻഡ്സിന്റെ മെംഫിസ് ഡീപേ എന്നിവർക്ക് എട്ട് ഗോളുകള്‍ മാത്രമാണ് നേടാനായത്. ഹാലൻഡ് ഒരു സൂപ്പർസ്റ്റാർ ആണെങ്കിലും ടീമിലെ മറ്റ് കളിക്കാർക്കും സ്റ്റാഫുകള്‍ക്കുമൊപ്പം യാതൊരു ജാഡയുമില്ലാതെ എളുപ്പത്തില്‍ ഒത്തുപോകുന്ന കളിക്കാരനാണെന്ന് കോച്ച്‌ സോള്‍ബാക്കൻ പ്രശംസിച്ചു.

ഹാലൻഡിനൊപ്പം നോർവേ നിരയില്‍ തിളങ്ങിയ മറ്റൊരു താരം അത്ലറ്റിക്കോ മാഡ്രിഡിന്റെ ഫോർവേഡ് അലക്സാണ്ടർ സോർലോട്ടാണ്. ടീമിന്റെ ആവശ്യാനുസരണം വ്യത്യസ്ത പൊസിഷനുകളില്‍ കളിക്കാൻ മടിയില്ലാത്ത സോർലോട്ടിന്റെ കഠിനാധ്വാനത്തെയും കോച്ച്‌ പ്രത്യേകം അഭിനന്ദിച്ചു. ഇവരെ കൂടാതെ ഒരുപറ്റം മികച്ച താരങ്ങളുമായാണ് നോർവേ ലോകകപ്പിനെത്തുന്നത്. സോള്‍ബാക്കന്റെ നിരയിലെ മറ്റ് പ്രധാന താരങ്ങള്‍.

മാർട്ടിൻ ഒഡെഗാർഡ് (മിഡ്ഫീല്‍ഡർ): ടീമിന്റെ നായകനും ക്രിയേറ്റീവ് മാസ്ട്രോയുമായ ഒഡെഗാർഡ് ആണ് മധ്യനിരയിലെ തന്ത്രങ്ങള്‍ മെനയുന്നത്. മികച്ച കളി വീക്ഷണവും, കൃത്യതയാർന്ന പാസുകളും, എതിരാളികളുടെ ശക്തമായ പ്രതിരോധപ്പൂട്ട് പൊളിക്കാനുള്ള കഴിവുമാണ് നോർവേയുടെ ആക്രമണനിരയ്ക്ക് വഴിതുറക്കാൻ അദ്ദേഹത്തെ സഹായിക്കുന്നത്.

ആന്റോണിയോ നുസ (വിങ്ങർ): കണ്ണഞ്ചിക്കുന്ന വേഗതയും മികച്ച ഡ്രിബ്ലിങ് മികവും കൊണ്ട് കളം നിറയുന്ന കൗമാര താരം. ടീമിന്റെ വിങ്ങുകളില്‍ വേഗതയും കളിമികവും പ്രവചനാതീതമായ നീക്കങ്ങളും കൊണ്ടുവരാൻ ഈ യുവതാരത്തിന് സാധിക്കുന്നു.

ഓസ്കാർ ബോബ് (വിങ്ങർ): മികച്ച സാങ്കേതിക തികവുള്ള താരം. കളിസ്ഥലത്ത് സ്വന്തമായി ഇടം കണ്ടെത്താനും, ഡ്രിബ്ലിങ്ങിലൂടെ ഡിഫെൻഡർമാരെ വെട്ടിച്ചു മുന്നേറാനും, ഹാലൻഡ് അടക്കമുള്ള മുന്നേറ്റനിര താരങ്ങള്‍ക്കായി ബോക്സിലേക്ക് കൃത്യതയാർന്ന ക്രോസുകള്‍ എത്തിക്കാനും ബോബ് മിടുക്കനാണ്.

അലക്സാണ്ടർ സോർലോട്ട് (ഫോർവേഡ്): ശാരീരിക കരുത്തും അനുഭവസമ്പത്തുമുള്ള ഫിനിഷർ. മുന്നേറ്റനിരയില്‍ നോർവേയ്ക്ക് കൂടുതല്‍ കരുത്തുറ്റ ഓപ്ഷനുകള്‍ നല്‍കുന്ന താരം. ഹാലൻഡിനൊപ്പം സോർലോട്ട് കൂടി ചേരുന്നതോടെ നോർവേയുടെ ആക്രമണനിരയെ തടയുക എന്നത് എതിരാളികള്‍ക്ക് ഏറെക്കുറെ അസാധ്യമായി മാറുന്നു.

വരാനിരിക്കുന്ന ലോകകപ്പില്‍ കടുത്ത ഗ്രൂപ്പിലാണ് നോർവേ ഇടംപിടിച്ചിരിക്കുന്നത്. ഗ്രൂപ്പ് ഐ-ല്‍ മുൻ ലോക ചാമ്പ്യന്മാരും കഴിഞ്ഞ ലോകകപ്പിലെ റണ്ണേഴ്സ് അപ്പുമായ ഫ്രാൻസ്, ഇറാഖ്, സെനഗല്‍ എന്നിവരാണ് നോർവേയുടെ എതിരാളികള്‍. ഫ്രാൻസ് തന്നെയാണ് ഈ ഗ്രൂപ്പിലെ ഫേവറിറ്റുകള്‍. എങ്കിലും യോഗ്യതാ റൗണ്ടില്‍ കളിച്ച അതേ ആത്മവിശ്വാസത്തോടെ ലോകകപ്പിലും പൊരുതുമെന്ന് സോള്‍ബാക്കൻ വ്യക്തമാക്കി.

പലരും നോർവേയെ ഇത്തവണത്തെ 'ഡാർക്ക് ഹോഴ്സ്' എന്ന് വിശേഷിപ്പിക്കുന്നുണ്ടെങ്കിലും സോള്‍ബാക്കൻ ആ ലേബലിനോട് പൂർണ്ണമായി യോജിക്കുന്നില്ല. തങ്ങളുടെ മികച്ച ദിവസത്തില്‍ ഏത് വമ്പന്മാരെയും തോല്‍പ്പിക്കാൻ നോർവേയ്ക്ക് കരുത്തുണ്ടെന്നും, എന്നാല്‍ ടൂർണമെന്റിലാകെ തങ്ങള്‍ കറുത്ത കുതിരകള്‍ ആണെന്ന് പറയുന്നത് അമിത പ്രതീക്ഷ നല്‍കുമെന്നും അദ്ദേഹം കൂട്ടിച്ചേർത്തു.