യുകെയില്‍ പ്രോജക്റ്റ് അഡ്മിനിസ്ട്രേറ്ററായി ജോലി ചെയ്ത് കഴിഞ്ഞ നാല് വർഷം കൊണ്ട് ഏകദേശം 70 ലക്ഷം രൂപയോളം സമ്പാദിക്കാൻ തനിക്ക് കഴിഞ്ഞിട്ടുണ്ടെന്നും അദ്ദേഹം വ്യക്തമാക്കുന്നു. ഇന്ത്യയില്‍ തിരികെയെത്തി ഐടി മേഖലയില്‍ പുതിയൊരു തുടക്കം കുറിക്കാൻ ആഗ്രഹിക്കുന്ന തന്റെ തീരുമാനം ഒരു വ്യാമോഹമാണോയെന്ന ചോദ്യത്തോടെയാണ് അദ്ദേഹം സോഷ്യല്‍ മീഡിയയില്‍ തന്റെ ആശങ്കകളും സ്വപ്നങ്ങളും പങ്കുവെച്ചത്.

"ഏകദേശം നാല് വർഷം മുമ്പാണ് ഞാൻ യുകെയിലേക്ക് കുടിയേറിയത്. എന്നാല്‍ അവിടുത്തെ ജീവിതത്തിന്റെ യഥാർത്ഥ അവസ്ഥ അനുഭവിച്ചറിഞ്ഞതോടെ തുടക്കത്തിലുണ്ടായിരുന്ന ആവേശം പൂർണ്ണമായും ഇല്ലാതായി. ഇന്ത്യയില്‍ അത്യാവശ്യം നല്ല രീതിയില്‍ സമ്പാദിക്കാൻ കഴിഞ്ഞാല്‍, അവിടെയും സന്തോഷകരമായ ജീവിതനിലവാരം പുലർത്താൻ കഴിയില്ലേയെന്ന് ഞാൻ ചിന്തിച്ചു തുടങ്ങിയിരിക്കുന്നു," എന്ന് അദ്ദേഹം കുറിച്ചു. ഇന്ത്യയിലേക്ക് മടങ്ങുമ്പോള്‍ അടിസ്ഥാന സൗകര്യങ്ങളുടെ കാര്യത്തില്‍ യുകെയെ അപേക്ഷിച്ച്‌ ചില വിട്ടുവീഴ്ചകള്‍ ചെയ്യേണ്ടി വരുമെങ്കിലും, അതൊന്നും തന്നെ കാര്യമായി ബാധിക്കില്ലെന്നാണ് ഇയാളുടെ പക്ഷം.

തനിക്ക് സാമ്പത്തികമായി ആരെയും സംരക്ഷിക്കേണ്ട ബാധ്യതയില്ലെന്നും നിലവില്‍ ബാധ്യതകളൊന്നുമില്ലാത്ത അവസ്ഥയിലാണെന്നും അദ്ദേഹം പറയുന്നു. "എനിക്ക് ശരിക്കും വേണ്ടത് വളരെ ലളിതമായ കാര്യങ്ങളാണ്: സാമ്പത്തിക ഭദ്രത, ജോലിക്ക് പുറമെ കുറച്ച്‌ ഒഴിവുസമയം, വല്ലപ്പോഴും യാത്ര ചെയ്യാൻ തക്കവണ്ണം മാറ്റിവെക്കാൻ കഴിയുന്ന വരുമാനം. അല്ലാതെ ആർഭാടപൂർവ്വമായ ഒരു ജീവിതശൈലി നയിക്കാൻ ഞാൻ ആഗ്രഹിക്കുന്നില്ല," എന്നും അദ്ദേഹം കൂട്ടിച്ചേർത്തു. കുടുംബത്തിന് തന്റെ സാമ്പത്തിക സഹായം ആവശ്യമില്ലാത്തതിനാല്‍, ഇന്ത്യയില്‍ തുടക്കത്തില്‍ കുറഞ്ഞ ശമ്പളത്തില്‍ ജോലി ചെയ്ത് പതുക്കെ ഉയർന്നുവരാൻ സാധിക്കുമെന്നാണ് ഇയാള്‍ കരുതുന്നത്.

സ്വന്തം തീരുമാനത്തില്‍ സന്തോഷവാനാണെങ്കില്‍ ഇന്ത്യയിലേക്ക് മടങ്ങി ഐടി മേഖലയിലേക്ക് മാറുന്നതില്‍ തെറ്റില്ലെന്ന് സോഷ്യല്‍ മീഡിയയില്‍ പലരും അഭിപ്രായപ്പെട്ടു. "70 ലക്ഷം രൂപയുടെ സമ്പാദ്യത്തില്‍ നിങ്ങള്‍ തൃപ്തനാണെങ്കില്‍ നിങ്ങളുടെ തീരുമാനം തെറ്റല്ല. എന്നാല്‍ തിരിച്ചാണെങ്കില്‍, ഇതൊരു വ്യാമോഹം മാത്രമാണ്. എന്താണ് നിങ്ങളെ സന്തോഷിപ്പിക്കുന്നത് എന്ന് തീരുമാനിക്കേണ്ടത് നിങ്ങളാണ്," എന്നായിരുന്നു ഒരു ഉപയോക്താവിന്റെ കമന്റ്.

അതേസമയം ഇന്ത്യയിലേക്ക് മടങ്ങിവരാനുള്ള ആഗ്രഹം പ്രകടിപ്പിച്ച്‌ നിരവധി പ്രവാസികളാണ് പോസ്റ്റിന് താഴെ തങ്ങളുടെ അനുഭവങ്ങള്‍ പങ്കുവെച്ചത്. "കാനഡയില്‍ 4 വർഷത്തെ മാസ്റ്റേഴ്സ് ബിരുദവും 2 വർഷത്തെ പ്രവൃത്തിപരിചയവും ഉള്ള എനിക്ക് 55 ലക്ഷം രൂപ സമ്പാദ്യമുണ്ട്. ഞാനും തിരികെ വരാൻ പദ്ധതിയിടുന്നു. പ്രവാസത്തിന്റെ ആദ്യത്തെ ആവേശം കഴിഞ്ഞു, ഇവിടെ തുടർന്നാല്‍ ജീവിതം എങ്ങനെയായിരിക്കുമെന്ന് എനിക്കിപ്പോള്‍ മനസ്സിലാകുന്നുണ്ട്," എന്നായിരുന്നു കാനഡയില്‍ നിന്നുള്ള ഒരു 26-കാരന്റെ പ്രതികരണം.