അദ്ദേഹത്തിന്റെ മികച്ച കരിയർ അതിനുള്ള തെളിവാണ്. എട്ട് ബാലണ്‍ ഡി ഓർ അവാർഡുകള്‍ നേടിയിട്ടുള്ള അർജന്റീനിയൻ ഫുട്ബോള്‍ കളിക്കാരൻ, ആദ്യകാലങ്ങളില്‍ തന്നെ തന്റെ കഴിവുകള്‍ പ്രകടിപ്പിച്ചിട്ടുണ്ട്. 39-ാം വയസ്സിലും അതേ വേഗതയും ചുറുചുറുക്കും പ്രകടനവും കൊണ്ട് ഫുട്ബോള്‍ ആരാധകരെ വിസ്മയിപ്പിക്കുകയാണ് മെസ്സി.

കഠിന പരിശീലനത്തിനൊപ്പം കൃത്യമായ ഭക്ഷണക്രമവും മെസ്സിയുടെ കരിയർ ദീർഘിപ്പിക്കാൻ നിർണായക പങ്കുവഹിക്കുന്നുവെന്നാണ് ആരോഗ്യ-കായിക വിദഗ്ധരുടെ വിലയിരുത്തല്‍. സ്പാനിഷ് മാധ്യമമായ Mundo Deportivoയുടെ റിപ്പോർട്ട് പ്രകാരം, മെസ്സിയുടെ ഡയറ്റീഷ്യനായ Giuliano Poser അഞ്ച് ഭക്ഷണങ്ങളെയാണ് ആരോഗ്യകരമായ ജീവിതത്തിന്റെ അടിത്തറയായി വിശേഷിപ്പിക്കുന്നത്. വെള്ളം, ഒലീവ് ഓയില്‍, മുഴുധാന്യങ്ങള്‍, പുതിയ പഴങ്ങള്‍, പുതിയ പച്ചക്കറികള്‍ എന്നിവയാണ് മെസ്സിയുടെ ഭക്ഷണക്രമത്തിലെ പ്രധാന ഘടകങ്ങള്‍.

ഉയർന്ന നിലവാരമുള്ളതും കീടനാശിനികളുടെ അമിത സാന്നിധ്യമില്ലാത്തതുമായ ഭക്ഷണമാണ് ശരീരത്തിന് ഏറ്റവും മികച്ചതെന്നും പോസർ പറയുന്നു. ശരീരത്തിന് ആവശ്യമായ പോഷകങ്ങളും ഊർജവും ഇവയിലൂടെ ലഭിക്കുമെന്നും അദ്ദേഹം വ്യക്തമാക്കുന്നു.

പഞ്ചസാരയ്ക്ക് നിയന്ത്രണം

മെസ്സിയുടെ ഭക്ഷണക്രമത്തില്‍ ഏറ്റവും കൂടുതല്‍ നിയന്ത്രിച്ചിരിക്കുന്നത് പഞ്ചസാരയാണ്. "പഞ്ചസാര പേശികളുടെ ഏറ്റവും വലിയ ശത്രുവാണ്" എന്നാണ് പോസറിന്റെ വിലയിരുത്തല്‍. അതുപോലെ, മൈദ പോലുള്ള റിഫൈൻഡ് ഫ്ലോർ ഉപയോഗിച്ചുള്ള ഭക്ഷണവും പരമാവധി ഒഴിവാക്കാൻ അദ്ദേഹം നിർദേശിക്കുന്നു. ചുവന്ന മാംസം പൂർണമായും ഒഴിവാക്കിയിട്ടില്ലെങ്കിലും വളരെ മിതമായ അളവിലാണ് മെസ്സി കഴിക്കുന്നത്.

2014 ലോകകപ്പിന് ശേഷം വലിയ മാറ്റം

2014 ഫിഫ ലോകകപ്പിന് ശേഷമാണ് മെസ്സിയുടെ ഭക്ഷണരീതിയില്‍ നിർണായക മാറ്റമുണ്ടായത്. അന്നുമുതല്‍ പ്രോസസ്ഡ് ഫുഡുകള്‍ ഒഴിവാക്കി വിറ്റാമിനുകള്‍, ധാന്യങ്ങള്‍, പച്ചക്കറികള്‍, മത്സ്യം, ഒലീവ് ഓയില്‍ എന്നിവ അടങ്ങിയ ഭക്ഷണത്തിലേക്കാണ് അദ്ദേഹം മാറിയത്. ഇതോടെ കൂടുതല്‍ തീവ്രതയോടെ പരിശീലനം നടത്താനും പരിക്കുകളില്‍ നിന്ന് വേഗത്തില്‍ മുക്തി നേടാനും കഴിഞ്ഞതായി റിപ്പോർട്ടുകള്‍ പറയുന്നു.

ജലാംശത്തിനും പ്രാധാന്യം

ദിവസം മുഴുവൻ ആവശ്യത്തിന് വെള്ളം കുടിക്കുന്നതും മെസ്സിയുടെ ദിനചര്യയിലെ പ്രധാന ഭാഗമാണ്. ശരീരത്തിലെ ജലാംശം നിലനിർത്തുന്നത് പ്രകടനത്തെയും പേശികളുടെ പ്രവർത്തനത്തെയും മെച്ചപ്പെടുത്താൻ സഹായിക്കുമെന്ന് വിദഗ്ധർ ചൂണ്ടിക്കാട്ടുന്നു.

ഇഷ്ടഭക്ഷണങ്ങള്‍ ഉപേക്ഷിച്ചിട്ടില്ല

കൃത്യമായ ഡയറ്റ് പിന്തുടരുന്നുണ്ടെങ്കിലും മെസ്സി തന്റെ പ്രിയപ്പെട്ട ഭക്ഷണങ്ങള്‍ പൂർണമായി ഉപേക്ഷിച്ചിട്ടില്ല. പാസ്ത, മിലാനേസ, റോസ്റ്റ് വിഭവങ്ങള്‍ എന്നിവ ഇപ്പോഴും അദ്ദേഹത്തിന് പ്രിയപ്പെട്ടവയാണ്. കൂടാതെ ചോക്ലേറ്റ്, ഐസ്ക്രീം, ഡുള്‍സെ ഡി ലെച്ചെ, പിസ എന്നിവയും ഇടയ്ക്കൊക്കെ കഴിക്കാറുണ്ടെന്ന് അദ്ദേഹം മുൻപ് അഭിമുഖങ്ങളില്‍ പറഞ്ഞിട്ടുണ്ട്. എന്നാല്‍ എല്ലാം മിതത്വത്തോടെയാണെന്നതാണ് പ്രത്യേകത.

അർജന്റീനയുടെ പരമ്പരാഗത പാനീയമായ യെർബ മാട്ടെ മെസ്സിയുടെ സ്ഥിരം പാനീയമാണ്. പഞ്ചസാര ചേർക്കാതെ കയ്പ്പോടെയാണ് താൻ അത് കുടിക്കാറുള്ളതെന്നും താരം മുൻപ് വെളിപ്പെടുത്തിയിട്ടുണ്ട്.

വിദഗ്ധരുടെ അഭിപ്രായത്തില്‍, മെസ്സിയുടെ ഫിറ്റ്നസിന്റെ രഹസ്യം ഒരു അത്ഭുത ഡയറ്റിലല്ല; സമീകൃത ഭക്ഷണം, പ്രോസസ്ഡ് ഭക്ഷണം കുറയ്ക്കല്‍, മതിയായ വെള്ളം, മിതമായ അളവില്‍ ഇഷ്ടഭക്ഷണങ്ങള്‍ ഉള്‍പ്പെടുത്തല്‍, സ്ഥിരതയുള്ള ജീവിതശൈലി എന്നിവയുടെ സംയോജനമാണ് അദ്ദേഹത്തെ ഇന്നും ലോകത്തിലെ ഏറ്റവും മികച്ച താരങ്ങളില്‍ ഒരാളായി നിലനിർത്തുന്നത്.