ആലപ്പുഴയിലെ ചെറിയൊരു നെയ്ത്ത് കേന്ദ്രത്തില്‍ നിന്നാരംഭിച്ച്‌ ലോകത്തിലെ ഏറ്റവും പ്രശസ്തമായ ഫാഷൻ വേദികളിലൊന്നായ 'മെറ്റ് ഗാല'യിലേക്ക് വീണ്ടും അഭിമാന നേട്ടവുമായി 'എക്സ്ട്രാ വീവ്'.

നാലാം തവണയും ഈ മലയാളി സ്ഥാപനം നിർമ്മിച്ച പ്രകൃതിദത്ത പരവതാനിയാണ് ഈ ആഗോള വേദിയില്‍ അലങ്കാരമാകുന്നത്.

ചേർത്തലയിലെ 'എക്സ്ട്രാ വീവ്' നിർമ്മിച്ച പ്രകൃതിദത്ത പരവതാനിയാണ് ഇത്തവണയും 'മെറ്റ് ഗാല' യില്‍ ശ്രദ്ധ നേടുന്നത്. പൂന്തോട്ടത്തിന് ഇടയിലൂടെയുള്ള കല്‍പടവുകള്‍ എന്ന ആശയത്തെ ആസ്പദമാക്കി രൂപകല്‍പ്പന ചെയ്തതാണ് ഈ പ്രത്യേക സൃഷ്ടി.

മഡഗാസ്കറില്‍ നിന്നുള്ള സീസൈല്‍ ചെടിയുടെ നാരുകള്‍ ഉപയോഗിച്ച്‌ 6840 ചതുരശ്ര മീറ്റർ വിസ്തൃതിയില്‍ നിർമിച്ച വെള്ള പരവതാനിയാണ് തെരഞ്ഞെടുത്തത്. 57 റോളുകളാക്കി ന്യൂയോർക്കിലേക്ക് അയച്ച ഈ പരവതാനി പിന്നീട് പ്രശസ്ത കലാകാരന്മാർ ചേർന്ന് ഡിസൈൻ പൂർത്തിയാക്കി.

ഈ മഹത്തായ സൃഷ്ടിക്ക് പിന്നില്‍ 480 തൊഴിലാളികളുടെ അധ്വാനമാണ്. ഏകദേശം 90 ദിവസങ്ങള്‍ കൊണ്ടാണ് പരവതാനി നിർമ്മാണം പൂർത്തിയാക്കിയത്. ലോകവേദിയില്‍ ഇന്ത്യൻ നെയ്ത്ത് കഴിവിന്റെ തിളക്കമാർന്ന ഉദാഹരണമായി ഇത് മാറിയിരിക്കുകയാണ്.