ന്യൂഡല്ഹി: പസഫിക് സമുദ്രത്തിലെ താപനിലയിലുണ്ടാകുന്ന എല് നിനോ പ്രതിഭാസത്തില് ആശങ്ക വേണ്ടെന്ന് കേന്ദ്ര സർക്കാർ.
ഇന്ത്യൻ കൃഷിയെ ഇത് കാര്യമായി ബാധിക്കില്ലെന്ന് കേന്ദ്ര സർക്കാർ അറിയിച്ചു. മെച്ചപ്പെട്ട ജലസേചന സൗകര്യങ്ങള്, ജലസംഭരണികളിലെ ഉയർന്ന ജലനിരപ്പ്, കർഷകർക്കിടയിലെ വർദ്ധിച്ച അവബോധം എന്നിവ എല് നിനോയെ നേരിടാൻ കരുത്ത് പകരുമെന്നാണ് കൃഷിമന്ത്രി ശിവരാജ് സിങ് ചൗഹാന്റെ അധ്യക്ഷതയില് ചേർന്ന ഉന്നതതല യോഗത്തിലെ വിലയിരുത്തല്. ജൂണില് ആരംഭിക്കുന്ന ഖാരിഫ് കൃഷി സീസണിന് മുന്നോടിയായാണ് ഉന്നതതല യോഗം ചേർന്നത്. മുൻകാലങ്ങളില് എല് നിനോ മൂലമുണ്ടായ ആഘാതങ്ങളേക്കാള് കുറഞ്ഞ നാശനഷ്ടങ്ങള് മാത്രമേ ഇത്തവണ പ്രതീക്ഷിക്കുന്നുള്ളൂവെന്നും മന്ത്രാലയം വ്യക്തമാക്കി.
കേന്ദ്ര കാലാവസ്ഥാ വകുപ്പിന്റെ പ്രവചനപ്രകാരം ഇത്തവണ സാധാരണ ലഭിക്കേണ്ടതിനേക്കാള് കുറഞ്ഞ മഴയായിരിക്കും (ഏകദേശം 92 ശതമാനം) രാജ്യത്ത് ലഭിക്കുക. പസഫിക് സമുദ്രത്തിലെ ഉപരിതല ജലം ചൂടാകുന്ന എല് നിനോ പ്രതിഭാസം തെക്കൻ ഏഷ്യയിലെ മണ്സൂണ് ക്രമത്തെ തെറ്റിക്കാറുണ്ട്. മഴയെ ആശ്രയിച്ചു കഴിയുന്ന പ്രദേശങ്ങളില് ഇത് വരള്ച്ചാ സാധ്യത വർദ്ധിപ്പിക്കുമെങ്കിലും, സർക്കാരിന്റെ കൃത്യമായ തയ്യാറെടുപ്പുകള് ഇതിനെ നേരിടാൻ പ്രാപ്തമാണെന്ന് മന്ത്രി വ്യക്തമാക്കി. മെയ് അവസാനത്തോടെ പുറത്തുവരുന്ന അന്തിമ കാലാവസ്ഥാ പ്രവചനത്തിനായി കാത്തിരിക്കുകയാണ് രാജ്യം.
കർഷകർക്ക് യാതൊരുവിധ ആശങ്കയും വേണ്ട എന്നാണ് കൃഷിമന്ത്രി യോഗത്തില് വ്യക്തമാക്കിയത്. ഗവണ്മെന്റ് പൂർണ്ണമായ തയ്യാറെടുപ്പുകളുമായി മുന്നോട്ട് പോവുകയാണെന്നും അദ്ദേഹം കൂട്ടിച്ചേർത്തു. കാലാവസ്ഥാ വ്യതിയാനങ്ങളെ നേരിടാൻ സജ്ജമായ പുതിയൊരു കൃഷി സംസ്കാരം രാജ്യത്ത് രൂപപ്പെട്ടിട്ടുണ്ടെന്നും യോഗം വിലയിരുത്തി.
സർക്കാരിന്റെ ഈ ആത്മവിശ്വാസത്തിന് പിന്നിലെ പ്രധാന ഘടകം രാജ്യത്തെ ജലസംഭരണികളിലെ നിലവിലെ അവസ്ഥയാണ്. നിലവില് രാജ്യത്തെ പ്രധാന ജലസംഭരണികളില് സാധാരണയുള്ളതിനേക്കാള് 127 ശതമാനം അധികം ജലശേഖരം ഉണ്ടെന്ന് ഉദ്യോഗസ്ഥർ അറിയിച്ചു. കൃഷി സീസണിലുടനീളം ജലസേചന ആവശ്യങ്ങള്ക്കായി ഈ ജലശേഖരം ഒരു വലിയ സുരക്ഷാ കവചമായി പ്രവർത്തിക്കും. മഴ കുറഞ്ഞാലും കൃഷിയെ ബാധിക്കാത്ത തരത്തില് ജലലഭ്യത ഉറപ്പാക്കാൻ ഇതിലൂടെ സാധിക്കുമെന്ന് യോഗം വിലയിരുത്തി.
2000-നും 2016-നും ഇടയിലുണ്ടായ എല് നിനോ കാലഘട്ടങ്ങളില് നിന്ന് രാജ്യം വലിയ പാഠങ്ങള് ഉള്ക്കൊണ്ടിട്ടുണ്ട്. അക്കാലത്ത് കർഷകർ പൂർണ്ണമായും മഴയെ ആശ്രയിച്ചിരുന്നതിനാല് വലിയ തോതില് വിളനാശം സംഭവിച്ചിരുന്നു. എന്നാല് ഇന്ന് മൈക്രോ ഇറിഗേഷൻ ശൃംഖലകള് വ്യാപിപ്പിച്ചതും കാലാവസ്ഥാ വ്യതിയാനങ്ങളെ അതിജീവിക്കുന്ന വിത്തിനങ്ങള് പരിചയപ്പെടുത്തിയതും വലിയ മാറ്റമുണ്ടാക്കി. അതോടൊപ്പം തന്നെ കൃത്യമായ മുന്നറിയിപ്പ് നല്കുന്ന സംവിധാനങ്ങള് ശക്തിപ്പെടുത്തിയതും കാർഷിക മേഖലയുടെ ദുർബലാവസ്ഥ ഗണ്യമായി കുറച്ചിട്ടുണ്ട്.
ഖാരിഫ് വിളകളില് പ്രധാനമായ നെല്ക്കൃഷിക്ക് ഇത്തവണ കൂടുതല് സ്ഥിരത പ്രകടമാണെന്ന് യോഗം വിലയിരുത്തി. മഴ കുറയാൻ സാധ്യതയുള്ള പ്രദേശങ്ങളിലെ മറ്റ് വിളകള്ക്കായി പ്രത്യേക മുൻകരുതല് പദ്ധതികള് തയ്യാറാക്കി വരികയാണ്. വരള്ച്ചയെ പ്രതിരോധിക്കുന്ന വിത്തുകള് പ്രോത്സാഹിപ്പിക്കാനും, മഴ കുറവാണെങ്കില് വിതയ്ക്കുന്നത് വൈകിപ്പിക്കാനുമുള്ള തന്ത്രങ്ങള് ആവിഷ്കരിക്കാൻ സംസ്ഥാന സർക്കാരുകള്ക്ക് മന്ത്രി നിർദ്ദേശം നല്കി. ഏത് അടിയന്തര സാഹചര്യവും നേരിടാൻ ആവശ്യമായ വിത്ത് ശേഖരം ഇപ്പോള് തന്നെ കരുതിയിട്ടുണ്ടെന്നും അദ്ദേഹം വ്യക്തമാക്കി.
ലോകത്തിലെ തന്നെ അരിയുടെയും ഗോതമ്പിന്റെയും രണ്ടാമത്തെ വലിയ ഉല്പാദക രാജ്യമാണ് ഇന്ത്യ. ലക്ഷക്കണക്കിന് ആളുകളുടെ ഉപജീവനമാർഗ്ഗം കൃഷിയായതിനാല്, വിള ഉല്പാദനത്തിലുണ്ടാകുന്ന നേരിയ മാറ്റം പോലും ആഗോള വിപണിയെയും രാജ്യത്തെ സാധാരണക്കാരെയും ബാധിക്കും. ഇത് കണക്കിലെടുത്ത് കേന്ദ്ര-സംസ്ഥാന സർക്കാരുകളുടെ ഏകോപനത്തോടെയുള്ള ഒരു പ്രത്യേക വിള-കാലാവസ്ഥാ നിരീക്ഷണ സംവിധാനം ഇപ്പോള് സജീവമായി പ്രവർത്തിക്കുന്നുണ്ട്. ഏതൊരു പ്രതിസന്ധിയോടും വേഗത്തില് പ്രതികരിക്കാൻ ഈ സംവിധാനം സഹായിക്കുമെന്നും മന്ത്രാലയം പ്രത്യാശ പ്രകടിപ്പിച്ചു.