അഹമ്മദാബാദ്: 2026 ഐപിഎല് ഫൈനല് മത്സരത്തിന്റെ ഇന്നിങ്സ് ബ്രേക്കിനിടെ ആകാശത്ത് അരങ്ങേറിയ ഡ്രോണ് ഷോയെച്ചൊല്ലി സോഷ്യല് മീഡിയയില് വലിയ രീതിയിലുള്ള തർക്കവും വിമർശനവും ഉയരുന്നു.
പ്രശസ്ത ഗായകൻ കൈലാഷ് ഖേർ ആലപിച്ച ഭക്തിഗാനത്തിനൊപ്പം ആകാശത്ത് ഡ്രോണുകള് ഉപയോഗിച്ച് മതപരമായ പ്രതീകങ്ങള് ദൃശ്യവല്ക്കരിച്ചതാണ് ഒരു വിഭാഗം കായികപ്രേമികളെ ചൊടിപ്പിച്ചിരിക്കുന്നത്.
അന്താരാഷ്ട്ര നിലവാരമുള്ള ഒരു കായിക മേളയെ കേവലം മതപരമായ ചടങ്ങുകളിലേക്ക് ചുരുക്കാൻ അധികൃതർ ശ്രമിച്ചു എന്നാണ് സോഷ്യല് മീഡിയയില് ഉയരുന്ന പ്രധാന ആക്ഷേപം.
കായികപ്രേമികളുടെ പ്രതികരണങ്ങള്
ഡ്രോണ് ഷോയുടെ ദൃശ്യങ്ങള് പുറത്തുവന്നതിന് പിന്നാലെ കടുത്ത ഭാഷയിലാണ് ആരാധകർ പ്രതികരിക്കുന്നത്. സോഷ്യല് മീഡിയയില് ഉയർന്നുവന്ന ചില പ്രധാന പ്രതികരണങ്ങള് ഇതാണ്:
"ഇതൊരു അന്താരാഷ്ട്ര കായിക മത്സരമായിരുന്നോ അതോ ഏതെങ്കിലും മതപരമായ ചടങ്ങായിരുന്നോ? കളിയെ ഇങ്ങനെ പരിഹസിക്കുന്നത് മുൻപൊരു ടൂർണമെന്റിലും കണ്ടിട്ടില്ല."
"ഇത് ഐപിഎല് കലാശപ്പോരാട്ടമാണോ അതോ ശിവരാത്രി ആഘോഷമാണോ?"
കായികരംഗത്തെയും രാഷ്ട്രീയ-മത ചിന്തകളെയും എപ്പോഴും വെവ്വേറെ നിർത്തണമെന്നും, എല്ലാ വിഭാഗം ജനങ്ങളും ഒരുപോലെ ആസ്വദിക്കുന്ന ക്രിക്കറ്റിലേക്ക് ഇത്തരം പ്രതീകങ്ങള് മനഃപൂർവം കൊണ്ടുവന്നത് അനുചിതമാണെന്നും പലരും ചൂണ്ടിക്കാണിക്കുന്നു. മത്സരത്തിന്റെ ആവേശത്തിനിടയില് ഇത്തരം പ്രകടനങ്ങള് ഉള്പ്പെടുത്തിയ ബിസിസിഐയുടെ (BCCI) തീരുമാനത്തിനെതിരെയും ആരാധകർക്കിടയില് അതൃപ്തി പുകയുന്നുണ്ട്. എന്നാല്, ഈ വിവാദങ്ങളോട് ഐപിഎല് അധികൃതരോ ബിസിസിഐയോ ഇതുവരെ ഔദ്യോഗികമായി പ്രതികരിച്ചിട്ടില്ല.
അനുകൂലിച്ചും ഒരു വിഭാഗം
അതേസമയം, ഈ ഡ്രോണ് ഷോയെ പൂർണ്ണമായി പിന്തുണച്ചും ഒരു വിഭാഗം ആരാധകർ രംഗത്തെത്തിയിട്ടുണ്ട്. ഫൈനല് മത്സരത്തിന് ശിവരാത്രി ആഘോഷങ്ങളുടെ ഭക്തിസാന്ദ്രമായ അനുഭൂതി നല്കാൻ ഇതിന് കഴിഞ്ഞുവെന്നും, ഇത്തരമൊരു ദൃശ്യവിരുന്ന് ഒരുക്കിയതിന് ബിസിസിഐ സെക്രട്ടറി ജയ് ഷായ്ക്ക് നന്ദി അറിയിക്കുന്നു എന്നുമാണ് അനുകൂലിക്കുന്നവരുടെ വാദം. കലാശപ്പോരാട്ടത്തിന്റെ ആവേശം ഇരട്ടിയാക്കാൻ ഈ വ്യത്യസ്തമായ പ്രകടനത്തിന് സാധിച്ചതായും ഇവർ സോഷ്യല് മീഡിയയില് കുറിച്ചു.