കോഴിക്കോട് ജില്ലയിലെ മുക്കം മാമ്പൊയില്‍ സ്വദേശിയായ സന്തോഷിന്റെ വീടിന് സമീപത്താണ് ഇര വിഴുങ്ങിയ നിലയില്‍ പെരുമ്പാമ്പിനെ കണ്ടെത്തിയത്. അസാധാരണ വലിപ്പമുള്ള പാമ്പിനെ കണ്ടതോടെ പ്രദേശവാസികള്‍ ഭീതിയിലാവുകയും വിവരം ഉടൻ തന്നെ അധികൃതരെയും സ്‌നേക്ക് റെസ്‌ക്യൂ പ്രവർത്തകരെയും അറിയിക്കുകയുമായിരുന്നു.

വീട്ടുകാർ നല്‍കിയ വിവരത്തെ തുടർന്ന് സ്‌നേക്ക് റെസ്‌ക്യൂ വളണ്ടിയറായ ബാബു വെള്ളങ്ങൻ സ്ഥലത്തെത്തി. ഇര വിഴുങ്ങിയതിനാല്‍ പാമ്പിന് ചലനശേഷി കുറവായിരുന്നെങ്കിലും അതിന്റെ വലിപ്പവും ഭാരവും രക്ഷാപ്രവർത്തനം ദുഷ്‌കരമാക്കി. ഏറെ നേരം നീണ്ട പരിശ്രമത്തിനൊടുവിലാണ് പെരുമ്പാമ്പിനെ സുരക്ഷിതമായി നിയന്ത്രണവിധേയമാക്കി പിടികൂടാൻ കഴിഞ്ഞത്.

ജനവാസ മേഖലയോട് ചേർന്ന പ്രദേശത്ത് ഇത്രയും വലിയ പെരുമ്പാമ്പിനെ കണ്ടെത്തിയത് നാട്ടുകാരില്‍ ആശങ്കയ്ക്കിടയാക്കി. സമീപ പ്രദേശങ്ങളിലെ വളർത്തുമൃഗങ്ങളെയോ ചെറുജീവികളെയോ ഇരയാക്കിയ ശേഷമായിരിക്കാം പാമ്പ് ഇവിടെ എത്തിയതെന്നാണ് പ്രാഥമിക നിഗമനം.

പിടികൂടിയ പെരുമ്പാമ്പിനെ തുടർന്ന് വനംവകുപ്പ് അധികൃതർക്ക് കൈമാറി. ആരോഗ്യനില പരിശോധിച്ച ശേഷം വനപാലകർ ഇതിനെ സുരക്ഷിതമായ ഉള്‍വന മേഖലയിലേക്ക് തുറന്നുവിടുമെന്ന് സ്‌നേക്ക് റെസ്‌ക്യൂവർ ബാബു വെള്ളങ്ങൻ അറിയിച്ചു.