തിരുവനന്തപുരം: കേന്ദ്ര ആരോഗ്യ മന്ത്രാലയം പുറത്തുവിട്ട ആറാമത് ദേശീയ കുടുംബാരോഗ്യ സർവേ (NFHS-6) പ്രകാരം മദ്യോപയോഗത്തിന്റെ കാര്യത്തില്‍ കേരളം രാജ്യത്ത് പിന്നിലുള്ള സംസ്ഥാനങ്ങളിലൊന്നായി തുടരുന്നു.

15 വയസ്സിന് മുകളിലുള്ള പുരുഷന്മാരുടെ മദ്യോപയോഗ നിരക്ക് അടിസ്ഥാനമാക്കിയ പട്ടികയില്‍ കേരളം 19-ാം സ്ഥാനത്താണ്.

സർവേ പ്രകാരം 50.5 ശതമാനം നിരക്കോടെ അരുണാചല്‍ പ്രദേശാണ് പട്ടികയില്‍ ഒന്നാമത്. 43.9 ശതമാനവുമായി തെലങ്കാന രണ്ടാം സ്ഥാനത്തും തുടരുന്നു. ദക്ഷിണേന്ത്യൻ സംസ്ഥാനങ്ങളിലായി തമിഴ്നാട് (23.5%), ആന്ധ്രാപ്രദേശ് (23.3%) എന്നിവ കേരളത്തേക്കാള്‍ ഉയർന്ന നിരക്കിലാണ് രേഖപ്പെടുത്തിയിരിക്കുന്നത്. എന്നാല്‍ ദക്ഷിണേന്ത്യയില്‍ ഏറ്റവും കുറഞ്ഞ പുരുഷ മദ്യോപയോഗ നിരക്ക് കേരളത്തിലാണ്, 22.7 ശതമാനം.

ദീർഘകാല കണക്കുകള്‍ പരിശോധിക്കുമ്പോള്‍ സംസ്ഥാനത്ത് മദ്യോപയോഗത്തില്‍ ഗണ്യമായ കുറവ് സംഭവിച്ചതായി കാണാം. 2005-06 കാലഘട്ടത്തില്‍ 45 ശതമാനമായിരുന്ന നിരക്ക് ഇപ്പോള്‍ ഏകദേശം പകുതിയായി കുറഞ്ഞ് 22.7 ശതമാനത്തിലെത്തിയിട്ടുണ്ട്. മുൻ സർവേയായ 2019-20ല്‍ ഇത് 19.9 ശതമാനമായിരുന്നു. പുതിയ കണക്കുകളില്‍ ഗ്രാമീണ മേഖലയില്‍ 23.7 ശതമാനവും നഗര മേഖലയില്‍ 21.5 ശതമാനവും പുരുഷന്മാർ മദ്യം ഉപയോഗിക്കുന്നതായി വ്യക്തമാക്കുന്നു. സ്ത്രീകളില്‍ ഈ നിരക്ക് 0.3 ശതമാനം മാത്രമാണ്.

സർവേ ഫലങ്ങള്‍ക്കും സംസ്ഥാനത്തെ ഔദ്യോഗിക വില്‍പ്പന കണക്കുകള്‍ക്കുമിടയില്‍ ചില വ്യത്യാസങ്ങളും കാണപ്പെടുന്നു. ബെവ്‌കോയുടെ (BEVCO) കണക്കുകള്‍ പ്രകാരം 2019-20ല്‍ 3.35 കോടി കെയ്‌സ് മദ്യമാണ് വില്‍പ്പനയായത്. എന്നാല്‍ 2023-24ല്‍ ഇത് 3.30 കോടി കെയ്‌സായി കുറഞ്ഞതായി രേഖപ്പെടുത്തുന്നു.