ന്യൂഡല്ഹി: കോണ്ഗ്രസ് നേതാവ് സോണിയ ഗാന്ധിയുടെ ആത്മകഥയായ 'ബിലോങ്ങിങ്: എ ജേർണി ഓഫ് ലവ്' ഇന്ത്യയില് പ്രസിദ്ധീകരിക്കുന്നതില് നിന്ന് പെൻഗ്വിൻ റാൻഡം ഹൗസ് ഇന്ത്യ പിന്മാറിയതായി റിപ്പോർട്ട്.
പുസ്തകത്തിലെ ചില ഭാഗങ്ങളില് എഡിറ്റോറിയല് മാറ്റങ്ങളും ഒഴിവാക്കലുകളും വേണമെന്ന പ്രസാധകരുടെ നിർദേശം സോണിയ ഗാന്ധി അംഗീകരിക്കാതിരുന്നതാണ് പിന്മാറ്റത്തിന് കാരണമെന്നാണ് വിവരം.
പുസ്തകത്തില് നിർദേശിച്ച മാറ്റങ്ങള് വരുത്താൻ തയ്യാറല്ലെന്ന് സോണിയ ഗാന്ധി നിലപാട് വ്യക്തമാക്കിയതായാണ് റിപ്പോർട്ട്. ഇതോടെയാണ് ഇന്ത്യയിലെ പ്രസിദ്ധീകരണ ചുമതലയില് നിന്ന് പെൻഗ്വിൻ റാൻഡം ഹൗസ് ഇന്ത്യ പിന്മാറിയത്.
നവംബർ 10നാണ് സോണിയ ഗാന്ധിയുടെ ആത്മകഥ വിപണിയിലെത്തുമെന്ന് നേരത്തെ പ്രഖ്യാപിച്ചിരുന്നത്. അമേരിക്കൻ പ്രസാധകരായ പെൻഗ്വിൻ റാൻഡം ഹൗസിന്റെ ഭാഗമായ ആല്ഫ്രഡ് എ. നോഫ് ആയിരുന്നു പുസ്തകത്തിന്റെ പ്രസിദ്ധീകരണം നേരത്തെ പ്രഖ്യാപിച്ചത്.
അതേസമയം, പെൻഗ്വിൻ റാൻഡം ഹൗസ് ഇന്ത്യ പിന്മാറിയ സാഹചര്യത്തില് മറ്റൊരു പ്രമുഖ പ്രസാധകരായ ഹാർപ്പർ കോളിൻസ് പുസ്തകം ഇന്ത്യൻ വിപണിയില് പുറത്തിറക്കാനുള്ള സാധ്യതയുണ്ടെന്നാണ് റിപ്പോർട്ടുകള്. ഇക്കാര്യത്തില് ഔദ്യോഗിക സ്ഥിരീകരണം ലഭിച്ചിട്ടില്ല.
സോണിയ ഗാന്ധിയുടെ രാഷ്ട്രീയ ജീവിതവും വ്യക്തിജീവിതവുമായി ബന്ധപ്പെട്ട നിർണായക സംഭവങ്ങളും ഉള്പ്പെടുന്ന ആത്മകഥയെന്ന നിലയില് പുസ്തകത്തിന്റെ പ്രസിദ്ധീകരണം ഏറെ ശ്രദ്ധ നേടിയിരുന്നു.