കൊച്ചി: ദേശീയപാതകളിലെ ടോള് ബൂത്തുകളില് കാഷ് ഇടപാടുകള് കുറയ്ക്കാൻ കേന്ദ്ര സർക്കാർ പുതിയ നീക്കം തുടങ്ങി. ഫാസ്റ്റാഗ് ഇല്ലാത്ത വാഹനങ്ങള്ക്ക് ഇതുവരെ ബാധകമായിരുന്ന ഇരട്ടിപ്പണം ഈടാക്കുന്ന സംവിധാനം മാറ്റിയാണ് പുതിയ തീരുമാനം.
കേന്ദ്ര ഉപരിതല ഗതാഗത മന്ത്രാലയം പുറത്തിറക്കിയ നിർദേശപ്രകാരം, ഏപ്രില് 10 മുതല് ഫാസ്റ്റാഗ് ഇല്ലാതെ ടോള് പ്ലാസയിലേക്ക് എത്തുന്നവർക്ക് UPI വഴി പണമടച്ചാല് സാധാരണ നിരക്കിന് 25 ശതമാനം അധികം നല്കിയാല് മതിയാകും. ഉദാഹരണത്തിന്, ടോള് നിരക്ക് 100 രൂപയായാല് 125 രൂപ നല്കി യാത്ര തുടരാം. നിലവില് ഇതേ സാഹചര്യത്തില് 200 രൂപ വരെ ഈടാക്കുന്ന രീതിയാണ് ഉണ്ടായിരുന്നത്.
ഡിജിറ്റല് ഇടപാടുകള് പ്രോത്സാഹിപ്പിക്കാനും ടോള് പ്ലാസകളിലെ തിരക്ക് കുറയ്ക്കാനും ഗതാഗത സൗകര്യം മെച്ചപ്പെടുത്താനുമാണ് ഈ മാറ്റം ലക്ഷ്യമിടുന്നത്. ഫാസ്റ്റാഗ് ഉപയോഗിക്കാത്തവരെ ഡിജിറ്റല് പേയ്മെന്റിലേക്ക് ആകർഷിക്കാൻ ഇത് സഹായിക്കുമെന്നാണ് വിലയിരുത്തല്.
2008ലെ ദേശീയപാത ടോള് ചട്ടങ്ങളില് ഭേദഗതി വരുത്തിയാണ് ഈ പുതിയ സംവിധാനം നടപ്പിലാക്കുന്നത്. ഏപ്രില് 2ന് ഉത്തരവ് പുറത്തിറക്കിയതായി അധികൃതർ അറിയിച്ചു. രാജ്യത്തുടനീളം ഇത് ഘട്ടംഘട്ടമായി നടപ്പിലാക്കാനാണ് പദ്ധതിയിടുന്നത്.
കാഷ് ഇടപാടുകള് കുറച്ച് ഡിജിറ്റല് ഇന്ത്യയിലേക്ക് മുന്നേറാനുള്ള മറ്റൊരു ചുവടുവെപ്പാണ് ഈ തീരുമാനം. യാത്രക്കാരുടെ സമയം ലാഭിക്കാനും ടോള് സംവിധാനത്തെ കൂടുതല് കാര്യക്ഷമമാക്കാനും ഇത് സഹായകരമാകും.