ദിവസേന ദശലക്ഷക്കണക്കിന് യാത്രക്കാരാണ് ഇന്ത്യൻ റെയില്‍വേയെ ആശ്രയിക്കുന്നത്. ഭക്ഷണശാലകള്‍, സ്റ്റേഷനറി കടകള്‍, ശൗചാലയങ്ങള്‍, വിശ്രമ മുറികള്‍ തുടങ്ങി നിരവധി സൗകര്യങ്ങള്‍ പ്ലാറ്റ്‌ഫോമുകളില്‍ ലഭ്യമാണ്.

എന്നാല്‍ പലർക്കും ഉണ്ടാകുന്ന ഒരു സംശയമുണ്ട്, എന്തുകൊണ്ടാണ് റെയില്‍വേ സ്റ്റേഷനുകളില്‍ സാധാരണയായി മെഡിക്കല്‍ ഷോപ്പുകള്‍ കാണാത്തത്?

ഒരുകാലത്ത് റെയില്‍വേ പ്ലാറ്റ്‌ഫോമുകളില്‍ കെമിസ്റ്റ് ഷോപ്പുകള്‍ അനുവദിച്ചിരുന്നതാണ്. 2001-ലെ റെയില്‍വേ ബോർഡ് മാർഗ്ഗനിർദേശങ്ങള്‍ പ്രകാരം സ്റ്റേഷനിലെ ഒരു കെമിസ്റ്റ് സ്റ്റാളിന് പരമാവധി 108 ചതുരശ്ര അടി വരെ സ്ഥലം അനുവദിച്ചിരുന്നു. അന്ന് പുസ്തകശാലകള്‍, കെമിസ്റ്റ് സ്റ്റാളുകള്‍, പൊതുവായ സാധനങ്ങള്‍ വില്‍ക്കുന്ന കടകള്‍ എന്നിവയ്ക്ക് പ്ലാറ്റ്‌ഫോമുകളില്‍ സ്ഥാനം ഉണ്ടായിരുന്നു.

എന്നാല്‍ പിന്നീട് റെയില്‍വേ നയങ്ങളില്‍ മാറ്റം വന്നതോടെ ഈ സംവിധാനം പുനഃക്രമീകരിക്കപ്പെട്ടു. നിലവില്‍ മരുന്ന് സ്റ്റാളുകള്‍ക്ക് പകരം മള്‍ട്ടി പർപ്പസ് സ്റ്റാളുകള്‍ (MPS) ആണ് കൂടുതലായി അനുവദിക്കുന്നത്. ഇതിലൂടെ ഒരേ കടയില്‍ വിവിധ ആവശ്യങ്ങളുള്ള സാധനങ്ങള്‍ വില്‍ക്കാനാണ് ലക്ഷ്യമിടുന്നത്.

റെയില്‍വേ സ്റ്റേഷനുകളില്‍ സ്ഥലം വളരെ വിലപ്പെട്ടതാണ്. ഭക്ഷണശാലകള്‍, ടിക്കറ്റ് കൗണ്ടറുകള്‍, വെയിറ്റിംഗ് ഏരിയകള്‍ തുടങ്ങിയ അടിസ്ഥാന സൗകര്യങ്ങള്‍ക്ക് മുൻഗണന നല്‍കുന്നതിനാല്‍ ചെറിയ സ്റ്റേഷനുകളില്‍ പ്രത്യേക മെഡിക്കല്‍ ഷോപ്പുകള്‍ക്ക് സ്ഥലം കണ്ടെത്തുന്നത് ബുദ്ധിമുട്ടാണ്.

ഇതോടൊപ്പം മറ്റൊരു പ്രധാന കാരണവും ഉണ്ട്. മരുന്ന് വില്‍പ്പനയ്ക്ക് പ്രത്യേക ഡ്രഗ് ലൈസൻസും യോഗ്യനായ ഫാർമസിസ്റ്റിന്റെ സേവനവും നിർബന്ധമാണ്. 24 മണിക്കൂറും പ്രവർത്തിക്കുന്ന സ്റ്റേഷനുകളില്‍ ഇത്തരം സംവിധാനം നിലനിർത്തുന്നത് ചെലവേറിയതും പ്രായോഗികമായി ബുദ്ധിമുട്ടുള്ളതുമാണ്.

ചെറിയ സ്റ്റേഷനുകളില്‍ ആവശ്യക്കാർ കുറവായതിനാല്‍ ഇത്തരം ഷോപ്പുകള്‍ എടുക്കാൻ വ്യാപാരികള്‍ താല്‍പര്യം കാണിക്കാത്ത സാഹചര്യവും ഉണ്ട്. എന്നാല്‍ വലിയ സ്റ്റേഷനുകളില്‍ യാത്രക്കാരുടെ എണ്ണം കൂടുതലായതിനാല്‍ ചില സ്ഥലങ്ങളില്‍ മെഡിക്കല്‍ ഷോപ്പുകള്‍ ഇപ്പോഴും പ്രവർത്തിക്കുന്നു.