തിരുവനന്തപുരം: സംസ്ഥാനത്ത് വരും ദിവസങ്ങളില് ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ നിരീക്ഷണ കേന്ദ്രം.
വേനല്ചൂടിന് ഇടയില് ആശ്വാസമായി എത്തുന്ന മഴ ചില മേഖലകളില് ശക്തമാകാൻ സാധ്യതയുള്ളതിനാല് ജാഗ്രത നിർദേശങ്ങളും പുറപ്പെടുവിച്ചിട്ടുണ്ട്.
പത്തനംതിട്ട, ഇടുക്കി, എറണാകുളം, തൃശ്ശൂർ, കോഴിക്കോട്, വയനാട് എന്നീ ജില്ലകളിലാണ് യെല്ലോ അലർട്ട് പ്രഖ്യാപിച്ചിരിക്കുന്നത്. ഈ പ്രദേശങ്ങളില് ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചനം.
അടുത്ത നാല് ദിവസത്തേക്ക് സംസ്ഥാനത്ത് മഴ ശക്തമായി തുടരാനാണ് സാധ്യത. പ്രത്യേകിച്ച് ശനിയാഴ്ചയോടെ തെക്കൻ കേരളത്തില് കൂടുതല് ശക്തമായ മഴ ലഭിക്കുമെന്ന് കാലാവസ്ഥാ വകുപ്പ് വ്യക്തമാക്കുന്നു. ഇടിമിന്നലോടുകൂടിയ മഴയ്ക്കും സാധ്യതയുള്ളതിനാല് ജനങ്ങള് അതീവ ജാഗ്രത പാലിക്കണമെന്ന് നിർദേശം നല്കിയിട്ടുണ്ട്.