ഉപയോക്താക്കളുടെ ഫോണ്‍ നമ്പർ വെളിപ്പെടുത്താതെ ആശയവിനിമയം നടത്താൻ സഹായിക്കുന്ന 'യൂസർനെയിം' (Username) ഫീച്ചറുമായി ബന്ധപ്പെട്ടാണ് കേന്ദ്ര ഐടി മന്ത്രാലയത്തിന്റെ അടിയന്തര ഇടപെടല്‍. ഈ ഫീച്ചറിന്റെ സുരക്ഷാ മാനദണ്ഡങ്ങളെക്കുറിച്ചും ദുരുപയോഗം തടയാൻ സ്വീകരിച്ചിട്ടുള്ള നടപടികളെക്കുറിച്ചും വിശദമായ റിപ്പോർട്ട് സമർപ്പിക്കാനാണ് കമ്പനികളോട് ആവശ്യപ്പെട്ടിരിക്കുന്നത്.

സർക്കാരിന്റെ പ്രധാന ആശങ്കകള്‍
ഫോണ്‍ നമ്പറിന് പകരം യൂസർനെയിം മാത്രം ഉപയോഗിച്ച്‌ അക്കൗണ്ടുകള്‍ നിർമ്മിക്കാൻ സാധിക്കുന്നത് കുറ്റവാളികള്‍ക്ക് കൂടുതല്‍ അജ്ഞാതത്വം (Anonymity) നല്‍കുമെന്നാണ് സർക്കാർ വിലയിരുത്തുന്നത്. ഇത് താഴെ പറയുന്ന പ്രതിസന്ധികള്‍ക്ക് കാരണമാകുമെന്ന് കേന്ദ്രം ഭയക്കുന്നു:

ഓണ്‍ലൈൻ തട്ടിപ്പുകളുടെ വർധനവ്: വ്യക്തിവിവരങ്ങള്‍ മറച്ചുവെച്ച്‌ ആളുകളെ എളുപ്പത്തില്‍ ചതിക്കുഴിയില്‍ വീഴ്ത്താൻ തട്ടിപ്പുകാർക്ക് സാധിക്കും.

ഡിജിറ്റല്‍ അറസ്റ്റ് ഭീഷണി: രാജ്യത്ത് നിലവില്‍ വർധിച്ചുവരുന്ന 'ഡിജിറ്റല്‍ അറസ്റ്റ്' ഉള്‍പ്പെടെയുള്ള ഭീഷണികള്‍ക്ക് ഇത്തരം ഫീച്ചറുകള്‍ കൂടുതല്‍ കരുത്തുപകരുമെന്ന് സർക്കാർ കരുതുന്നു.

കുറ്റകൃത്യങ്ങള്‍ കണ്ടെത്താനുള്ള ബുദ്ധിമുട്ട്: അക്കൗണ്ടിന് പിന്നിലുള്ള യഥാർത്ഥ വ്യക്തിയെ കണ്ടെത്തുന്നത് അന്വേഷണ ഏജൻസികള്‍ക്ക് വലിയ വെല്ലുവിളിയാകും.

അരട്ടൈ ഫീച്ചർ പിൻവലിച്ചു; വാട്സാപ്പിന് സമയപരിധി
കേന്ദ്ര സർക്കാരിന്റെ കർശന നിലപാടിനെത്തുടർന്ന് പ്രമുഖ ഇന്ത്യൻ സോഫ്റ്റ്‌വേർ കമ്പനിയായ സോഹോയുടെ (Zoho) ചാറ്റ് ആപ്ലിക്കേഷനായ 'അരട്ടൈ' (Arattai) തങ്ങളുടെ യൂസർനെയിം ഫീച്ചർ നിർത്തലാക്കിയതായി അറിയിച്ചു. സോഹോ സഹസ്ഥാപകനും ചീഫ് സയന്റിസ്റ്റുമായ ശ്രീധർ വെമ്പുവാണ് ഇക്കാര്യം വ്യക്തമാക്കിയത്.

അതേസമയം, ഉപയോക്തൃ സുരക്ഷ മുൻനിർത്തിയാണ് തങ്ങള്‍ ഈ ഫീച്ചർ കൊണ്ടുവരുന്നതെന്നാണ് വാട്സാപ്പിന്റെ ഉടമസ്ഥരായ മെറ്റായുടെ വാദം. എന്നാല്‍ ഫീച്ചർ നടപ്പിലാക്കുമ്പോള്‍ ഉദ്ദേശിക്കുന്ന സുരക്ഷാ മാറ്റങ്ങളെക്കുറിച്ച്‌ മൂന്ന് ദിവസത്തിനകം വ്യക്തമായ വിശദീകരണം നല്‍കാൻ കേന്ദ്ര സർക്കാർ മെറ്റയ്ക്ക് നേരത്തെ തന്നെ നിർദ്ദേശം നല്‍കിയിട്ടുണ്ട്. അതിന് പിന്നാലെയാണ് ഇപ്പോള്‍ മറ്റ് ആഗോള മെസ്സേജിങ് പ്ലാറ്റ്‌ഫോമുകളിലേക്കും കേന്ദ്രം നിരീക്ഷണം ശക്തമാക്കിയിരിക്കുന്നത്.