ന്യൂഡല്‍ഹി: ദക്ഷിണ ഡല്‍ഹിയെ നടുക്കിയ ഫ്ലറിഷ് സ്റ്റേ ഹോട്ടല്‍ തീപിടിത്ത ദുരന്തത്തില്‍ ഒളിവില്‍ കഴിഞ്ഞിരുന്ന ഹോട്ടലുടമ ലോകേഷ് ബജാജിനെ പൊലീസ് അറസ്റ്റ് ചെയ്തു.
ലുക്കൗട്ട് സർക്കുലർ പുറപ്പെടുവിച്ച്‌ ഇയാളുടെ വീടുകളടക്കം വിവിധയിടങ്ങളില്‍ നടത്തിയ വ്യാപക റെയ്ഡിനൊടുവിലാണ് പ്രതി പിടിയിലാകുന്നത്.
ബുധനാഴ്ച രാവിലെയാണ് 21 പേരുടെ ദാരുണാന്ത്യത്തിന് ഇടയാക്കിയ വൻ തീപിടിത്തമുണ്ടായത്. ഹോട്ടല്‍ പൂർണ്ണമായും നിയമങ്ങള്‍ ലംഘിച്ചാണ് പ്രവർത്തിച്ചിരുന്നതെന്ന് പോലീസ് പരിശോധനയില്‍ കണ്ടെത്തി.
അനുമതി 6 മുറികള്‍ക്ക്; പ്രവർത്തിപ്പിച്ചത് 25 മുറികള്‍!
ഡല്‍ഹി സർക്കാരിന്റെ 'ബെഡ് ആൻഡ് ബ്രേക്ക്ഫാസ്റ്റ്' പദ്ധതി പ്രകാരം വെറും ആറ് മുറികള്‍ പ്രവർത്തിപ്പിക്കാൻ മാത്രം അനുമതിയുള്ള കെട്ടിടത്തിലാണ് കടുത്ത നിയമലംഘനം നടത്തി 25 മുറികള്‍ ഒരുക്കിയിരുന്നത്. കെട്ടിടത്തിന്റെ ബേസ്മെന്റിലും മുറികള്‍ നിർമിച്ചിരുന്നു. ഇതിനുപുറമേ, അഗ്നിശമന സേനയുടെ യാതൊരുവിധ ഫയർ സേഫ്റ്റി ക്ലിയറൻസും (Fire Safety Clearance) ഹോട്ടലിന് ഉണ്ടായിരുന്നില്ലെന്ന് ഉദ്യോഗസ്ഥർ സ്ഥിരീകരിച്ചു. അധികൃതരെ അറിയിക്കാതെ അനധികൃതമായി കൂടുതല്‍ നിലകളും ഇവിടെ പണിതുയർത്തിയിരുന്നു.
രക്ഷപ്പെടാൻ കുഞ്ഞുമായി മൂന്നാം നിലയില്‍ നിന്ന് ചാടി; ഞെട്ടിക്കുന്ന ദൃശ്യങ്ങള്‍ പുറത്ത്
ദുരന്തസമയത്ത് നാല്‍പതിലധികം അതിഥികളാണ് ഹോട്ടലില്‍ ഉണ്ടായിരുന്നത്. ഇവരില്‍ ഭൂരിഭാഗം പേരും ഉറക്കത്തിലായിരുന്ന സമയത്താണ് തീ പടർന്നത്. രക്ഷപ്പെടാനായി ഒരു യുവതി തന്റെ കുഞ്ഞുമായി ഹോട്ടലിന്റെ മൂന്നാം നിലയില്‍ നിന്നും താഴേക്ക് ചാടുന്നതിന്റെ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്. വീഴ്ചയില്‍ പരുക്കേറ്റ ഇരുവരും നിലവില്‍ ആശുപത്രിയില്‍ ചികിത്സയിലാണ്. ഹോട്ടലിന്റെ അഞ്ചാം നിലയിലെ തൂണിലൂടെ ഒരു വിദേശി സാഹസികമായി താഴേക്ക് ഇറങ്ങാൻ ശ്രമിക്കുന്ന ദൃശ്യങ്ങളും പുറത്തുവന്നിട്ടുണ്ട്. ഹൗസ് റാണിയിലെ അതീവ ഇടുങ്ങിയ പ്രദേശത്താണ് ഹോട്ടല്‍ സ്ഥിതി ചെയ്യുന്നത് എന്നതിനാല്‍ രക്ഷാപ്രവർത്തനവും ദുഷ്കരമായിരുന്നു.
മരിച്ചവരില്‍ ഭൂരിഭാഗവും വിദേശികള്‍; എംബസികളുമായി ബന്ധപ്പെട്ട് കേന്ദ്രം
പ്രമുഖ സ്വകാര്യ ആശുപത്രികള്‍ക്ക് സമീപമുള്ള ഹോട്ടലായതിനാല്‍ ചികിത്സയ്ക്കായി ഡല്‍ഹിയിലെത്തിയ നിരവധി വിദേശികളാണ് ഇവിടെ താമസിച്ചിരുന്നത്. അപകടത്തില്‍ മരിച്ചവരില്‍ ഏറെയും വിദേശ പൗരന്മാരാണ്.
മരിച്ച വിദേശികളുടെ രാജ്യങ്ങളുമായി ബന്ധപ്പെട്ട് ആവശ്യമായ തുടർനടപടികള്‍ സ്വീകരിച്ചു വരികയാണെന്ന് കേന്ദ്ര സർക്കാർ അറിയിച്ചു. ദുരന്തത്തില്‍ വിദേശകാര്യ മന്ത്രി എസ്. ജയ്ശങ്കർ അനുശോചനം രേഖപ്പെടുത്തി. വിവിധ രാജ്യങ്ങളുടെ എംബസികളുമായി നിരന്തരം സമ്പർക്കം പുലർത്തുന്നുണ്ടെന്ന് അദ്ദേഹം എക്സിലൂടെ (X) വ്യക്തമാക്കി.