ന്യൂഡല്ഹി: പ്രതിരോധ കയറ്റുമതി രംഗത്ത് വൻ കുതിച്ചുചാട്ടത്തിനൊരുങ്ങി ഇന്ത്യ. ലോകത്തിലെ ഏറ്റവും വേഗതയേറിയ സൂപ്പർസോണിക് ക്രൂസ് മിസൈലായ 'ബ്രഹ്മോസ്' സ്വന്തമാക്കാൻ വിയറ്റ്നാമും ഇന്തൊനീഷ്യയും ഒരുങ്ങുന്നതായി റിപ്പോർട്ടുകള്.
വിയറ്റ്നാം ഇതിനകം തന്നെ കരാറില് ഒപ്പുവെച്ചതായും ഇന്തൊനീഷ്യയുമായുള്ള ചർച്ചകള് അവസാന ഘട്ടത്തിലാണെന്നും പ്രതിരോധ സെക്രട്ടറി രാജേഷ് കുമാർ സിങ് വ്യക്തമാക്കി. സിങ്കപ്പൂരില് നടന്ന ഷാങ്ഗ്രി ലാ സുരക്ഷാ ഉച്ചകോടിയിലാണ് അദ്ദേഹം ഇക്കാര്യം സൂചിപ്പിച്ചത്. എന്നാല്, വിയറ്റ്നാമുമായുള്ള കരാറിന്റെ ഔദ്യോഗിക പ്രഖ്യാപനം ഇതുവരെ പുറത്തുവന്നിട്ടില്ല.
5800 കോടി ഡോളറിന്റെ വമ്പൻ കരാർ
ഏകദേശം 5800 കോടി ഡോളർ മൂല്യം വരുന്നതാണ് വിയറ്റ്നാമുമായുള്ള പ്രതിരോധ കരാറെന്നാണ് സൂചന.
ഉള്പ്പെടുന്നവ: കോസ്റ്റല് ഡിഫൻസ് മിസൈല് ബാറ്ററികള്, ബ്രഹ്മോസ് മിസൈലുകള്, സാങ്കേതിക പരിശീലനം, ലോജിസ്റ്റിക്സ് പിന്തുണ.
ഭാവി പദ്ധതികള്: കപ്പലുകളില് നിന്നും കരയില് നിന്നും വിക്ഷേപിക്കാവുന്ന മിസൈലുകള്ക്ക് പുറമെ, ഭാവിയില് ആകാശത്തുനിന്ന് വിക്ഷേപിക്കാവുന്ന (Air-launched) ബ്രഹ്മോസ് മിസൈലുകളും വാങ്ങാൻ വിയറ്റ്നാമിന് പദ്ധതിയുണ്ട്.
ഇന്ത്യയില് നിന്ന് ബ്രഹ്മോസ് മിസൈലുകള് വാങ്ങുന്ന ആദ്യ വിദേശ രാജ്യം ഫിലിപ്പീൻസാണ്. ഇതിന് പിന്നാലെയാണ് ഇപ്പോള് മറ്റ് തെക്കുകിഴക്കൻ ഏഷ്യൻ രാജ്യങ്ങളും ഇന്ത്യൻ മിസൈലുകളിലേക്ക് തിരിയുന്നത്.
ലക്ഷ്യം ചൈനീസ് പ്രതിരോധം; തെക്കൻ ചൈനാക്കടലില് കളിമാറും
തെക്കൻ ചൈനാക്കടലില് ചൈനയുടെ കടന്നുകയറ്റവും ആധിപത്യ ശ്രമങ്ങളും ശക്തമാകുന്ന പശ്ചാത്തലത്തിലാണ് വിയറ്റ്നാം, ഇന്തൊനീഷ്യ, ഫിലിപ്പീൻസ് എന്നീ രാജ്യങ്ങളുടെ ഈ നിർണായക നീക്കം. ശബ്ദത്തേക്കാള് മൂന്നിരട്ടി വേഗതയില് സഞ്ചരിക്കുന്ന ബ്രഹ്മോസ് മിസൈലുകള് ഈ രാജ്യങ്ങളുടെ പ്രതിരോധ നിരയുടെ ഭാഗമാകുന്നതോടെ മേഖലയില് ചൈനയ്ക്കുമേല് ശക്തമായ സമ്മർദ്ദം ചെലുത്താൻ സാധിക്കുമെന്നാണ് വിലയിരുത്തല്.