ഹാംസ്ട്രിങ് (Hamstring) പരിക്കില്‍ നിന്ന് പൂർണ്ണമായി മുക്തനാകാത്ത താരം നോർവേക്കെതിരെയുള്ള നിർണായക മത്സരത്തിന് മുന്നോടിയായുള്ള ടീമിന്റെ പ്രധാന പരിശീലന സെഷനുകളില്‍ നിന്നും വിട്ടുനിന്നു. താരം നിലവില്‍ പ്രത്യേക റീഹാബിലിറ്റേഷൻ പ്രോഗ്രാമിലൂടെ കടന്നുപോവുകയാണ്.

ഗ്രൂപ്പ് ഘട്ടത്തില്‍ ഘാനയ്‌ക്കെതിരായ മത്സരത്തിനിടയിലാണ് ചെല്‍സി ക്യാപ്റ്റൻ കൂടിയായ റീസ് ജെയിംസിന് പരിക്കേറ്റത്. തുടർന്ന് നടന്ന പാനമ, ഡി.ആർ കോംഗോ, മെക്സിക്കോ എന്നീ മത്സരങ്ങള്‍ താരത്തിന് നഷ്ടമായിരുന്നു. നോർവേക്കെതിരായ ക്വാർട്ടർ ഫൈനലിന് മുൻപ് ജെയിംസ് ടീമിനൊപ്പം ചേരുമെന്ന് പരിശീലകൻ തോമസ് ടുഹെല്‍ പ്രത്യാശ പ്രകടിപ്പിച്ചിരുന്നെങ്കിലും താരം ഇതുവരെ ടീം ട്രെയിനിംഗിലേക്ക് തിരിച്ചെത്തിയിട്ടില്ല.

ലോകകപ്പ് ആരംഭിക്കുന്നതിന് തൊട്ടുമുൻപ് മറ്റൊരു റൈറ്റ്-ബാക്ക് താരമായ ടിനോ ലിവ്‌റമെന്റോയ്ക്ക് പരിക്കേറ്റ് പുറത്തുപോകേണ്ടി വന്നിരുന്നു. ഇതിന് പിന്നാലെ റീസ് ജെയിംസിനും പരിക്കേറ്റത് ഇംഗ്ലണ്ടിന്റെ പ്രതിരോധ നിരയെ, പ്രത്യേകിച്ച്‌ റൈറ്റ്-ബാക്ക് പൊസിഷനെ കടുത്ത പ്രതിസന്ധിയിലാക്കിയിരിക്കുകയാണ്. മെക്സിക്കോക്കെതിരായ മത്സരത്തില്‍ ചുവപ്പ് കാർഡ് കണ്ട ഡിഫെൻഡർ ജാരെല്‍ ക്വാൻസയ്ക്കും അടുത്ത മത്സരത്തില്‍ വിലക്കുള്ളതിനാല്‍ നോർവേക്കെതിരെ ഡിഫെൻസ് ലൈൻ എങ്ങനെ അണിനിരത്തണമെന്ന ചിന്തയിലാണ് ഇംഗ്ലണ്ട് കോച്ച്‌ തോമസ് ടുഹെല്‍.