മലപ്പുറത്ത് ജില്ലാ വിഭജനം വീണ്ടും ചർച്ചയാക്കി യൂത്ത് ലീഗ്. മലപ്പുറം ജില്ല വിഭജിച്ച് തിരൂരങ്ങാടി ആസ്ഥാനമാക്കി പുതിയ ജില്ല രൂപീകരിക്കണമെന്നാണ് ആവശ്യം.
തിരൂരങ്ങാടി മണ്ഡലം മുസ്ലിം യൂത്ത് ലീഗ് പ്രതിനിധി സമ്മേളനത്തിലാണ് വിഷയം പ്രമേയമായി അവതരിപ്പിച്ചത്. ഏറനാട്, പെരിന്തല്മണ്ണ, നിലമ്പൂർ താലൂക്കുകള് ഉള്പ്പെടുത്തി "മലപ്പുറം" എന്ന പേരില് ഒരു ജില്ല രൂപീകരിച്ച് മലപ്പുറം നഗരത്തെ ആസ്ഥാനമാക്കണം.
തിരൂർ, പൊന്നാനി, തിരൂരങ്ങാടി, കൊണ്ടോട്ടി താലൂക്കുകള് ഉള്പ്പെടുത്തി "തിരൂരങ്ങാടി" എന്ന പേരില് പുതിയ ജില്ല രൂപീകരിച്ച് തിരൂരങ്ങാടിയെ ആസ്ഥാനമാക്കണം. വലിയ ജനസംഖ്യയുള്ള ജില്ലകളെ ചെറിയ, കാര്യക്ഷമ ജില്ലകളാക്കി പുനഃസംഘടിപ്പിക്കുന്നത് കാലഘട്ടത്തിന്റെ ആവശ്യമാണെന്നും യൂത്ത് ലീഗ് ആവശ്യപ്പെട്ടു.എന്നാല് മുസ്ലിം ലീഗ് സംസ്ഥാന നേതൃത്വം ഇത്തരത്തിലൊരു തീരുമാനമെടുത്തിട്ടില്ല. ഇക്കാര്യത്തില് സംസ്ഥാന നേതൃത്വം എന്ത് തീരുമാനമെടുക്കുമെന്നതാണ് ഉയരുന്ന ചോദ്യം.
വിഭജനത്തിലൂടെലഭിക്കുന്നപ്രധാനനേട്ടങ്ങളെന്ന്യൂത്ത്ലീഗ്ചൂണ്ടികാണിക്കുന്നവ
- ഭരണ കാര്യക്ഷമത വർധിക്കും.
- സർക്കാർ സേവനങ്ങള് ജനങ്ങളിലേക്ക് വേഗത്തില് എത്തും.
- പ്രദേശിക വികസന അസമത്വം കുറയും
- പുതിയ ഇൻഫ്രാസ്ട്രക്ചർ വികസനവും തൊഴില് അവസരങ്ങളും ഉണ്ടാകും.
- തീരപ്രദേശവും മലനാടും നഗരമേഖലയും ഉള്പ്പെടുന്ന പ്രദേശങ്ങള്ക്ക് പ്രത്യേക വികസന നയങ്ങള് നടപ്പാക്കാൻ സാധിക്കും