ന്യൂഡല്‍ഹി: പെട്രോളിന്റെയും ഡീസലിന്റെയും വില വീണ്ടും വർധിപ്പിച്ചു. പെട്രോളിന് ലിറ്ററിന് 87 പൈസയും ഡീസലിന് ലിറ്ററിന് 91 പൈസയുമാണ് കൂട്ടിയത്.

ഈ മാസം പതിനഞ്ചാം തീയതി തൊട്ടുള്ള മൂന്നാമത്തെ വിലവർധനയാണിത്. ഇന്നത്തെ വർധനയോടെ ‍ഡല്‍ഹിയില്‍ പെട്രോള്‍ ലിറ്ററിന് 99.51 രൂപയും ഡീസലിന് ലിറ്ററിന് 92.49 രൂപയുമായി. ഡല്‍ഹിയില്‍ സിഎൻജിയുടെ വിലയും വർധിപ്പിച്ചിട്ടുണ്ട്. കിലോയ്ക്ക് ഒരു രൂപയാണ് കൂട്ടിയത്. ഇതോടെ ഡല്‍ഹിയില്‍ സിഎൻജിയുടെ വില 81.09 ആയി.

മേയ് പതിനഞ്ചാം തീയതിയായിരുന്നു ആദ്യ വർധന. അന്ന് മൂന്നുരൂപ വീതമാണ് പെട്രോളിനും ഡീസലിനും കൂട്ടിയത്. പിന്നാലെ മേയ് 19-ന് രണ്ടാമതും വില കൂട്ടി. 90 പൈസ വീതമായിരുന്നു വില വർധിപ്പിച്ചത്. പശ്ചിമേഷ്യൻ സംഘർഷമാണ് വിലവർധനയ്ക്ക് കാരണം.