വാട്സ്ആപ്പിൻ്റെ ഏറ്റവും ഉപയോഗപ്രദമായ ഫീച്ചറുകളിലൊന്നാണ് ഡിസപ്പിയറിങ് മെസ്സേജുകള്. സ്ഥിരമായ ചാറ്റുകള് അവശേഷിക്കാതെ സംഭാഷണങ്ങള് സ്വാഭാവികമായും റിമൂവ് ആയിപ്പോകുന്നതിന് സഹായിക്കുന്ന ഫീച്ചറാണിത്.
വളരെ സെൻസിറ്റീവ് ആയ സംഭാഷങ്ങളോ, പ്രത്യേകിച്ച് കാര്യങ്ങളൊന്നുമില്ലാതെ നടത്തുന്ന കാഷ്വല് ചാറ്റുകളോ അതുമല്ലെങ്കില് ഇൻബോക്സ് നിറഞ്ഞു കിടക്കാതെ സൂക്ഷിക്കുവാനോ ഒക്കെ ഈ ഫീച്ചർ അനുയോജ്യമാണ്.
എന്നാല്, സംഭാഷണത്തിലെ ഒരു പ്രത്യേക വിവരമോ, വിലാസമോ, മീറ്റിംഗ് വിവരങ്ങളോ, ബാക് അപ്പ് ഒടിപിയോ ഒക്കെ വേണ്ടി വരുന്ന ചില അവസരങ്ങളില് ഈ ഫീച്ചർ ഒരു വില്ലനാകുവാനും സാധ്യതയുണ്ട്. അടുത്ത കാലം വരെ ഈ പ്രശ്നം മറികടക്കാൻ ഈ ഫീച്ചർ പൂർണമായും ഓഫ് ആക്കുക എന്നതായിരുന്നു ഏക മാർഗം. എന്നാല് ഇപ്പോള് ഇതിനൊരു പരിഹാരവുമായി എത്തിയിരിക്കുകയാണ് വാട്സ്ആപ്പ്'കെപ്റ്റ് മെസേജസ്'ഫീച്ചറിലൂടെ. ഡിസപ്പിയറിങ് മെസേജ് ഓപ്ഷൻ ഓണ് ആണെങ്കില് പോലും, ആവശ്യമുള്ള സന്ദേശങ്ങള് മാത്രം ചാറ്റില് നിന്ന് അപ്രത്യക്ഷമാകാതെ നിലനിർത്താൻ ഈ ഫീച്ചർ സഹായിക്കും.
ചാറ്റിലെ എല്ലാ സന്ദേശങ്ങളും ഡിലീറ്റ് ആയാലും, ഒരു അഡ്രസ്സോ ഫോണ് നമ്പറോ ഒടിപി വിവരങ്ങളോ പോലെ നിങ്ങള്ക്ക് ആവശ്യമുള്ള ഒരു പ്രത്യേക മെസേജ് മാത്രം സേവ് ചെയ്യാൻ ഇത് നിങ്ങളെ സഹായിക്കും.
ഇതിനായി ചെയ്യേണ്ടത്..
ഡിസപ്പിയറിങ് മെസേജ് ഫീച്ചർ നിലവിലുള്ള ചാറ്റ് ഓപ്പണ് ചെയ്യുക
സേവ് ചെയ്യേണ്ട സന്ദേശത്തില് ലോങ് പ്രസ് (Long Press) ചെയ്യുക.
മുകളിലെ മെനുവില് കാണുന്ന 'Keep' ഐക്കണ് തെരഞ്ഞെടുക്കുക
ഇങ്ങനെ സേവ് ചെയ്യുന്ന സന്ദേശങ്ങള് ചാറ്റില് നിന്ന് അപ്രത്യക്ഷമാകില്ല. സന്ദേശത്തിന് താഴെ കാണുന്ന ചെറിയ ബുക്ക്മാർക്ക് ചിഹ്നം വഴി അത് സേവ് ചെയ്യപ്പെടും. പൂർണമായും സന്ദേശങ്ങള് റിമൂവ് ആയിപ്പോകുന്നതിന് പകരം, ഉപയോക്താക്കള്ക്ക് കൂടുതല് നിയന്ത്രണം നല്കുന്ന ഈ ഫീച്ചർ ഏറെ ഉപകാരപ്രദമാണ്. ആവശ്യമില്ലാത്ത സന്ദേശങ്ങള് ഒഴിവാക്കുന്നതോടൊപ്പം തന്നെ പ്രധാനപ്പെട്ട വിവരങ്ങള് സുരക്ഷിതമായി സൂക്ഷിക്കാനും ഇത് സഹായിക്കുന്നു.