ഹോളിവുഡ് താരങ്ങളായ ടോം ഹോളണ്ടിന്റെയും സെൻഡയയുടേയും വിവാഹ വീഡിയോ സമൂഹമാധ്യമങ്ങളില്‍ വൈറലാകുകയാണ്. ഒറിജിനല്‍ അല്ല, 'ihafix' എന്ന ഇൻസ്റ്റഗ്രാം ക്രിയേറ്റർ നിർമിച്ച 46 സെക്കൻഡ് ദൈർഘ്യമുള്ള കേരള സ്റ്റൈല്‍ എഐ കല്യാണ വീഡിയോ!

ടോം ഹോളണ്ടും സെൻഡയയും വിവാഹിതരായി എന്ന റിപ്പോർട്ടുകള്‍ക്കിടയിലാണ് ഈ എഐ വീഡിയോ പുറത്തുവരുന്നത് എന്നത് ശ്രദ്ധേയമാണ്. സെൻഡയയുടെ ഫാഷൻ സ്റ്റൈലിസ്റ്റ് ലോ റോച്ച്‌ ഒരു റെഡ് കാർപെറ്റ് അഭിമുഖത്തിനിടെ "അവരുടെ വിവാഹം കഴിഞ്ഞു" എന്ന് പറഞ്ഞതാണ് അഭ്യൂഹങ്ങള്‍ ശക്തമാക്കിയത്. 'ഒഡീസി', 'സ്പൈഡർ-മാൻ: ബ്രാൻഡ് ന്യൂ ഡേ' സിനിമകളുടെ പ്രൊമോഷൻ പരിപാടികളില്‍ താരങ്ങളും വിവാഹവാർത്ത പരോക്ഷമായി ശരിവച്ചിരുന്നു.

'സ്പൈഡർമാൻ: ഹോംകമിംഗ്' എന്ന ചിത്രത്തിന്റെ സെറ്റില്‍ വച്ചാണ് ടോമും സെൻഡയയും ആദ്യമായി കണ്ടുമുട്ടുന്നത്. ഇരുവരുടെയും കെമിസ്ട്രിയും സൗഹൃദവും ഉടൻ തന്നെ പ്രണയ ഗോസിപ്പുകള്‍ക്ക് വഴിവച്ചു. തങ്ങള്‍ അടുത്ത സുഹൃത്തുക്കള്‍ മാത്രമാണെന്നാണ് ഇരുവരും അന്ന് പ്രതികരിച്ചത്. ഒടുവില്‍ 2021ല്‍ ഇരുവരും തങ്ങളുടെ പ്രണയം ഔദ്യോഗികമായി സ്ഥിരീകരിച്ചു.

അതേസമയം, ടോം ഹോളണ്ടും സെൻഡയയും പ്രധാന വേഷങ്ങളില്‍ എത്തിയ ഏറ്റവും പുതിയ മാർവല്‍ ചിത്രം 'സ്പൈഡർ-മാൻ: ബ്രാൻഡ് ന്യൂ ഡേ' ആഗോളതലത്തില്‍ തരംഗമാകുകയാണ്. റിലീസ് ചെയ്ത് വെറും ആറ് ദിവസത്തിനുള്ളില്‍ ആഗോളതലത്തില്‍ ഒരു ബില്യണ്‍ ഡോളറാണ് ചിത്രം കളക്‌ട് ചെയ്തത്. സിനിമാ ചരിത്രത്തില്‍ ഏറ്റവും വേഗത്തില്‍ ഒരു ബില്യണ്‍ ഡോളർ ക്ലബ്ബില്‍ കയറുന്ന രണ്ടാമത്തെ ചിത്രമെന്ന റെക്കോർഡാണ് ഈ നേട്ടത്തിലൂടെ സ്പൈഡർമാൻ സ്വന്തമാക്കിയത്. 2019ല്‍ പുറത്തിറങ്ങിയ 'അവഞ്ചേഴ്സ്: എൻഡ്ഗെയിം' ആണ് ഒന്നാം സ്ഥാനത്തുള്ളത്.