ഒരു സ്കൂള്‍ കാല പ്രണയചിത്രം. രണ്ടാം ചിത്രം 'സൂപ്പർ ശരണ്യ'യില്‍ അത് കോളേജ് കാലവും പ്രണയവുമായി. 'പ്രേമലു'വും ടീനേജ് റോം കോമായിരുന്നു. 'ബെത്ലഹേം കുടുംബ യൂണിറ്റി'ലും ഗിരീഷ് പ്രണയം വിടുന്നില്ല; നർമവും. നിവിൻ പോളിയേയും മമിത ബൈജുവിനേയും കേന്ദ്ര കഥാപാത്രങ്ങളാക്കി ഒരുക്കിയ ഈ ചിത്രം പ്രായ വ്യത്യാസമുള്ള രണ്ട് പേർ, രണ്ട് അയല്‍ക്കാർ തമ്മിലുള്ള പ്രേമത്തിന്റെ കഥയാണ് പറയുന്നത്. അതിനൊപ്പം ഒരുപിടി നല്ല നർമമുഹൂർത്തങ്ങളും കൂടിയാകുമ്പോള്‍ 'ബെത്ലഹേം' പ്രേക്ഷക‍ർക്ക് ഒരു നല്ല സിംപിള്‍ പടം കണ്ട അനുഭവമാകുന്നു. പൊടിപാറണ ആക്ഷനില്ല, ചെവിതുളയ്ക്കുന്ന ബിജിഎമ്മില്ല. സർവം ഫീല്‍ ഗുഡ് മയം!

ഈ കഥ പലർക്കും റിലേക്ക് ചെയ്യാനാകും. സിനിമയെ ആസ്വാദ്യകരമാക്കുന്നതും അതാണ്. അതുപോലെ കോമഡിക്കായി കോമഡിയുണ്ടാക്കാതെ അതിനെ അതിന്റെ വഴിക്ക് വിടുകയാണ് സംവിധായകൻ. ചിരിയും പ്രേമവും ക്ലാഷ് ആകുന്നില്ല. എന്നാല്‍ വേണ്ടിടത്ത് രണ്ടും ചേ‍ർന്നുവരുന്നുമുണ്ട്. പിന്നെ, ഈ പ്രേമപ്പടം എടുക്കുക എന്ന് പറയുന്നത് വലിയ റിസ്കുള്ള പണിയാണ്. പ്രത്യേകിച്ച്‌ 'ക്രിഞ്ച്' എന്ന വാക്ക് എല്ലാ റൊമാന്റിക് പടങ്ങളുടേയും മുകളില്‍ വാളുപോലിങ്ങനെ തൂങ്ങിയാടുന്ന കാലത്ത്. ആ റിസ്കാണ് കോമഡി കൊണ്ട് ഗിരീഷ് മറികടക്കുന്നത്. പോപ്പ് കള്‍ച്ച‍ർ റെഫറൻസുകള്‍ക്കൊപ്പം നൊസ്റ്റാള്‍ജിയയും കൂടി ചേ‍ർത്താണ് ഗിരീഷിന്റെ എഴുത്ത്. അതുകൊണ്ടു തന്നെ ജനറേഷൻ ഗ്യാപ്പ് എന്ന വെല്ലുവിളിയുമില്ല. 'പ്രേമലു'വില്‍ നമ്മള്‍ അത് കണ്ടതാണ്. അത് ആവ‍ർത്തിക്കുകയാണ് ഗിരീഷ് എഡി.

നിവിൻ പോളി എന്ന നടന് ഈ ഴോണറിന് മേലുള്ള ഗ്രിപ്പും എടുത്തുപറയണം. വരുന്ന ഓരോ ഫ്രെയിമിലും നിവിന്റെ നോട്ടവും ചിരിയും പതർച്ചയും കരച്ചിലും പ്രേക്ഷക‍രുടെ കണ്ണിലുടക്കും. കൂടെ മമിത കൂടിയെത്തുമ്പോള്‍ സിനിമ സ്പോട്ടിഫൈ കാലത്തെ കാസറ്റ് പാട്ടുപോലെയാകുന്നു. ഇതിലെ നായികയുടെ പ്രണയം നാട്ടിലെ ഫേമസ് സിംഗിള്‍ ഏട്ടായിയോടുള്ള ഫാസിനേഷൻ ആയി വ്യാഖ്യാനിക്കപ്പെടാൻ സാധ്യതയുള്ളയൊന്നാണ്. പക്ഷേ, പക്വമായ അഭിനയം കൊണ്ട് മമിത തന്റെ കഥാപാത്രത്തിന് ഒരു ലെയ‍ർ കൂടി ചേ‍ർക്കുന്നു. നിവിനും മമിതയും വരുന്ന രംഗങ്ങളിലെല്ലാം മമിത ഒരുപടി മുകളില്‍ നിന്നു എന്നുപറഞ്ഞാലും തെറ്റില്ല. കൃത്യമായി റിയാക്‌ട് ചെയ്യുക എന്നത് മാത്രമാണ് നിവിന് അവിടെ ചെയ്യാനുള്ളത്. നാണിച്ചുള്ള ചിരികൊണ്ടും ഒളിച്ചുള്ള നോട്ടം കൊണ്ടും കലങ്ങിയ കണ്ണുകൊണ്ടും തന്റേതായ സ്റ്റൈലില്‍ നിവിൻ അത് ഭംഗിയായി ചെയ്യുന്നുമുണ്ട്.