'ലബ്ബർ പന്ത്', 'കറുപ്പ്' തുടങ്ങിയ ചിത്രങ്ങളിലെ നടിയുടെ പ്രകടനം ഏറെ ശ്രദ്ധിക്കപ്പെട്ടിരുന്നു. സംവിധായകൻ ശശി ഒരുക്കിയ 'നൂറു സാമി'യാണ് സ്വാസികയുടെ ഏറ്റവും പുതിയ തമിഴ് ചിത്രം. മികച്ച പ്രതികരണമാണ് ചിത്രത്തിന് ലഭിക്കുന്നത്. ഇപ്പോഴിതാ, തമിഴ് പ്രേക്ഷകരുടെ പ്രശംസയ്ക്കും പിന്തുണയ്ക്കും നന്ദി അറിയിച്ചിരിക്കുകയാണ് നടി.

"നമസ്കാരം, എല്ലാ തമിഴ് മക്കള്‍ക്കും എന്റെ വലിയ നന്ദി. നിങ്ങളോടുള്ള നന്ദി എങ്ങനെ പറഞ്ഞറിയിക്കണം എന്ന് എനിക്കറിയില്ല. അത്രയും, സ്നേഹമാണ് എനിക്ക് നിങ്ങള്‍ തരുന്നത്. 'ലബ്ബർ പന്ത്' മുതല്‍ 'നൂറു സാമി' വരെ...നിങ്ങളെങ്ങനെ എന്നെ വിശ്വസിച്ച്‌ തിയേറ്ററില്‍ എത്തി... എങ്ങനെ ശശി സാർ എന്നെ വിശ്വസിച്ച്‌ ഇത്രയും വലിയ ഒരു റോള്‍ തന്നു.. വിജയ് ആന്റണി സാർ അതിനെങ്ങനെ സമ്മതിച്ചു...എല്ലാം ഒരു സ്വപ്നം പോലെ തോന്നുന്നു. ഞാൻ പ്രധാന വേഷത്തില്‍ എത്തുന്നൊരു സിനിമ ഇത്രയും തിയേറ്ററുകളില്‍ പ്രദർശിപ്പിക്കുന്നതും അത് എല്ലാവരും രസിച്ച്‌ കാണുന്നതും സ്വപ്നം കാണാതെ ഒരു നാള്‍ പോലും ഞാൻ ഉറങ്ങിയിട്ടില്ല. ഇന്ന് അതെല്ലാം യാഥാർഥ്യമായിരിക്കുന്നു. തമിഴ് പ്രേക്ഷകർ എനിക്ക് എത്ര വലിയ പിന്തുണയാണ് നല്‍കുന്നത്. എന്റെ ഓക്സിജൻ നിങ്ങളാണ്. നിങ്ങള്‍ തരുന്ന സ്നേഹത്തിന് എല്ലാക്കാലത്തും ഞാൻ കടപ്പെട്ടിരിക്കും. ഉത്തരവാദിത്തതോടെ പടങ്ങള്‍ തിരഞ്ഞെടുക്കും. 'നൂറു സാമി' എനിക്ക് പ്രധാനപ്പെട്ട ചിത്രമാണ്. 'നൂറ് സാമി'ക്ക് ഇനിയും പിന്തുണ നല്‍കണം. എന്നെ ഇതേപോലെ സ്നേഹിക്കൂ. നിങ്ങളെ ഞാൻ നിരാശരാക്കില്ല. നിറയെ നല്ല വേഷങ്ങള്‍ ചെയ്യും. നന്ദി," എന്നാണ് ഇൻസ്റ്റഗ്രാമില്‍ പങ്കുവച്ച വീഡിയോയില്‍ സ്വാസിക പറഞ്ഞത്.