ചിത്രത്തിന്റെ അണിയറപ്രവർത്തകർ തന്നെയാണ് സമൂഹ മാധ്യമങ്ങളിലൂടെ സന്തോഷ വാർത്ത ആരാധകരുമായി പങ്കുവച്ചത്. റായലസീമയിലെ ഷെഡ്യൂള്‍ ആണ് പൂർത്തിയായിരിക്കുന്നത്. സെപ്റ്റംബർ 11നാണ് സിനിമയുടെ ആഗോള റിലീസ് പ്രഖ്യാപിച്ചിരിക്കുന്നത്.

സിനിമയുടെ ചിത്രീകരണത്തിന്റെ അവസാന ദിവസം രശ്മികയും വിജയ്‌യും റായലസീമ പ്രദേശവാസികള്‍ക്ക് നന്ദി അറിയിച്ചു. ഇതിന്റെ ദൃശ്യങ്ങള്‍ ഇപ്പോള്‍ സോഷ്യല്‍ മീഡിയയില്‍ വൈറലാവുകയാണ്. ഷൂട്ടിങ് സമയത്ത് താരദമ്പതികളെ കാണാൻ വലിയ തോതില്‍ ജനങ്ങള്‍ തടിച്ചുകൂടിയിരുന്നു. ഊഷ്മളമായ സ്വീകരണമാണ് ആരാധകർ ഇരുവർക്കും നല്‍കിയത്. ചില ആരാധകർ വിജയ്‌‍‌ക്കായി ബൈക്ക് റാലിയും സംഘടിപ്പിച്ചിരുന്നു.

രാഹുല്‍ സങ്ക്രിത്യനാണ് 'രണബാലി' സംവിധാനം ചെയ്യുന്നത്. മൈത്രി മൂവി മേക്കേഴ്സിന്റെ ബാനറില്‍ നവീൻ യെർനേനിയും വൈ. രവിശങ്കറും ചേർന്ന് നിർമിക്കുന്ന ഈ ബ്രഹ്മാണ്ഡ ചിത്രം ഗുല്‍ഷൻ കുമാർ, ഭുഷൻ കുമാർ, ടി സീരീസ് എന്നിവർ ചേർന്നാണ് അവതരിപ്പിക്കുന്നത്. പിരിയോഡിക് ഡ്രാമയായി എത്തുന്ന ചിത്രത്തില്‍ ഇതുവരെ കാണാത്ത ലുക്കിലാണ് വിജയ് ദേവരകൊണ്ടയും രശ്മികയും എത്തുന്നത്.

'ഗീതാ ഗോവിന്ദം', 'ഡിയർ കോമ്രേഡ്' എന്നീ ചിത്രങ്ങള്‍ക്ക് ശേഷം വിജയ്‌യും രശ്മികയും ഒന്നിക്കുന്ന മൂന്നാമത്തെ ചിത്രമാണിത്. 'ദ മമ്മി' എന്ന ചിത്രത്തിലൂടെ ലോകപ്രശസ്തനായ ഹോളിവുഡ് നടൻ അർനോള്‍ഡ് വോസ്ലൂ ആണ് ചിത്രത്തിലെ പ്രധാന വില്ലൻ. സർ തിയോഡോർ ഹെക്ടർ എന്ന ബ്രിട്ടീഷ് ഉദ്യോഗസ്ഥനായിട്ടാണ് നടൻ വേഷമിടുന്നത്. പാൻ-ഇന്ത്യൻ തലത്തില്‍ പുറത്തിറങ്ങുന്ന 'രണബാലി' ഇന്ത്യൻ സിനിമയിലെ തന്നെ വമ്പൻ പ്രോജക്ടുകളില്‍ ഒന്നായിരിക്കുമെന്നാണ് ഏവരും പ്രതീക്ഷിക്കുന്നത്.