ഫഹദ് ഫാസിലും ദിലീഷ് പോത്തനും ഒരുമിച്ച ഹിറ്റ് ചിത്രമായ ജോജിക്ക് സ്വീഡിഷ് ഇന്റര്നാഷണല് ഫിലിം ഫെസ്റ്റിവലില് (SIFF) 'ബെസ്റ്റ് ഇന്റര്നാഷണല് ഫീച്ചര് ഫിലിം' പുരസ്ക്കാരം.
ചിത്രത്തിന്റെ നിര്മ്മാതാക്കളായ ഭാവനാ സ്റ്റുഡിയോസ് ആണ് ഇക്കാര്യം ഫേസ്ബുക്ക് പേജിലൂടെ പങ്കുവച്ചത്. സംവിധായകന് ദിലീഷ് പോത്തനും ഇത് ഷെയര് ചെയ്തിട്ടുണ്ട്. 2021ലെ സ്വീഡിഷ് അന്താരാഷ്ട്ര ചലച്ചിത്ര മേളയിലേക്കാണ് ജോജി തിരഞ്ഞെടുക്കപ്പെട്ടത്.
ഏപ്രില് ഏഴിനാണ് ആമസോണ് പ്രൈമിലൂടെ(amazon prime) ജോജി റിലീസ് ചെയ്തത്. ചിത്രത്തിന് വന് സ്വീകാര്യതയായിരുന്നു ലഭിച്ചിരുന്നത്. ചിത്രത്തിലെ ഓരോ കഥാപാത്രങ്ങളെ കുറിച്ചും സോഷ്യല് മീഡിയയില് പലരും എഴുത്തുകാരന് കണ്ടതിനപ്പുറമുള്ള നിഗമനങ്ങളും എഴുതിയിരുന്നു. ദേശീയ അന്തര്ദേശീയ തലത്തിലും ചിത്രം ചര്ച്ച ചെയ്യപ്പെട്ടു.
മലയാള സിനിമയിലെ ട്രെന്ഡ് സെറ്ററുകള് ആയിരുന്ന മഹേഷിന്റെ പ്രതികാരം, തൊണ്ടിമുതലും ദൃക്സാക്ഷിയും എന്നീ സിനിമകള്ക്കുശേഷം ദിലീഷും ഫഹദും ഒന്നിക്കുന്ന ചിത്രം കൂടിയാണിത്.'ദൃശ്യം 2'നു ശേഷം ആമസോണ് പ്രൈം ഡയറക്ട് റിലീസ് ചെയ്ത മലയാളചിത്രവുമാണ് ഇത്. ശ്യാം പുഷ്കരനാണ് ചിത്രത്തിന്റെ തിരക്കഥ. വില്യം ഷേക്സ്പിയറിന്റെ വിഖ്യാത നാടകം 'മാക്ബത്തി'ല് നിന്ന് പ്രചോദനം ഉള്ക്കൊണ്ടാണ് ശ്യാം രചന നിര്വ്വഹിച്ചിരിക്കുന്നത്. നേരത്തെ മഹേഷിന്റെ പ്രതികാരത്തിന്റെ തിരക്കഥയും ശ്യാം പുഷ്കരന്റേത് ആയിരുന്നു.