ബാറില്‍ മദ്യപിക്കാനെത്തിയ യുവതി വാങ്ങിയത് 200 പെഗ് മദ്യം. ഒടുവില്‍ ബില്ലടയ്ക്കാൻ മാർഗമില്ലാതായപ്പോള്‍ ബാർ ജീവനക്കാർ പറഞ്ഞതുപ്രകാരം സ്വന്തം മുടി മുറിച്ചുനല്‍കേണ്ടിവന്നെന്നാണ് റിപ്പോർട്ട്. 60,000 തായ് ബാഹ്ത്, ഏകദേശം 1.73 ലക്ഷം രൂപയായിരുന്നു ബില്‍. പണം നല്‍കാൻ കഴിയാതെ വന്നതോടെയാണ് മുടി മുറിച്ചുനല്‍കാൻ യുവതി സമ്മതിച്ചത്.

ഹോസ്റ്റ് ബാറുകള്‍ക്ക് പ്രശസ്തമാണ് ബാങ്കോക്ക്. പുരുഷ ജീവനക്കാർ ഉപഭോക്താക്കള്‍ക്ക് മദ്യം വിളമ്പുകയും അവരുമായി സൗഹൃദത്തോടെ സംസാരിക്കുകയും ചെയ്യുന്ന രീതിയാണ് ഇത്തരം ബാറുകളുടെ പ്രത്യേകത. ടിക് ടോക്കിലൂടെ പരിചയപ്പെട്ട ഒരു ഹോസ്റ്റ് ബാറിലെ ജീവനക്കാരനെ കാണാനായാണ് 18കാരി ബാറിലെത്തിയത്. ഇയാളുമായി സംസാരിക്കുന്നതിനിടെ യുവതിക്ക് പ്രണയം തോന്നിയെന്നും തുടർന്ന് ഇയാള്‍ക്കും ബാറിലെ മറ്റ് ജീവനക്കാർക്കും മദ്യം വാങ്ങിനല്‍കാൻ തുടങ്ങിയെന്നുമാണ് റിപ്പോർട്ട്.

ഒരു ഗ്ലാസിന് 250 ബാഹ്ത്, ഏകദേശം 720-750 രൂപയായിരുന്നു വില. ഇത്തരത്തില്‍ 200 ഗ്ലാസ് മദ്യം വാങ്ങിയതോടെ ബില്‍ 60,000 ബാഹ്തായി. ബില്‍ വന്നപ്പോഴാണ് തനിക്ക് ഇത്രയും വലിയ തുക നല്‍കാനുണ്ടെന്ന് യുവതി മനസ്സിലാക്കിയത്. തുടർന്ന് പണം കണ്ടെത്താനായി മണിക്കൂറുകളോളം ശ്രമിച്ചെങ്കിലും സാധിച്ചില്ല. ഒടുവില്‍ യുവതി അമ്മയെ വിളിച്ചു. ബാർ ജീവനക്കാരുമായി സംസാരിച്ച അമ്മ, മാസം 3,000 ബാഹ്ത് വീതം അടയ്ക്കാൻ അനുവദിക്കണമെന്ന് ആവശ്യപ്പെട്ടെങ്കിലും ജീവനക്കാർ സമ്മതിച്ചില്ല.

പകരം ബാറിലെ വൃത്തിയാക്കല്‍ ജോലികള്‍ ചെയ്ത് തുക അടയ്ക്കാൻ അവസരം നല്‍കാമെന്ന് ജീവനക്കാർ പറഞ്ഞു. ഇതിനും യുവതി തയ്യാറായില്ല. തുടർന്നാണ് മുടി മുറിച്ച്‌ വിറ്റ് പണം ഈടാക്കാമെന്ന് ജീവനക്കാർ നിർദേശിച്ചത്. അമ്മയും ഇതിന് സമ്മതിച്ചു. മുടിയുടെ നീളം കുറയ്ക്കുക മാത്രമായിരിക്കും ചെയ്യുന്നതെന്നാണ് യുവതി കരുതിയത്. എന്നാല്‍ മുഴുവൻ മുടിയും മുറിക്കണമെന്ന് ജീവനക്കാർ ആവശ്യപ്പെട്ടതോടെ യുവതിക്ക് തല മൊട്ടയടിക്കാൻ സമ്മതിക്കേണ്ടിവന്നു.

മുടി മുറിക്കുന്ന ദൃശ്യങ്ങള്‍ ബാർ ജീവനക്കാർ തന്നെ വീഡിയോയില്‍ പകർത്തി. പിന്നീട് ഈ വീഡിയോ പുറത്തായതോടെയാണ് സംഭവം വാർത്തയായത്.

സംഭവത്തില്‍ യുവതി പൊലീസില്‍ പരാതി നല്‍കി. മുടി മുറിക്കുന്നതിന് മുൻപ് ജീവനക്കാർ തന്നെ പിടിച്ച്‌ തള്ളിയെന്നും ബില്‍ അടച്ചില്ലെങ്കില്‍ പീഡിപ്പിക്കുമെന്ന് ഭീഷണിപ്പെടുത്തിയെന്നും യുവതി പരാതിയില്‍ ആരോപിച്ചു. എന്നാല്‍ ജീവനക്കാർ ഇത്തരത്തില്‍ ഭീഷണിപ്പെടുത്തിയിട്ടില്ലെന്നാണ് ബാർ ഉടമയുടെ വാദം. വീഡിയോ ചോർന്നതാണെന്നും ഉടമ വ്യക്തമാക്കി.

യുവതിക്ക് ഇതിന് മുൻപും സമാനമായ അനുഭവങ്ങള്‍ ഉണ്ടായിട്ടുണ്ടെന്നാണ് റിപ്പോർട്ട്. നേരത്തെ മറ്റൊരു അവസരത്തില്‍ 13,000 ബാഹ്തിന്റെയും, പിന്നീട് 30,000 ബാഹ്തിന്റെയും ബില്‍ വന്നതിനെ തുടർന്ന് യുവതി കുടുങ്ങിയിരുന്നു. അന്ന് പണം നല്‍കി തലയൂരുകയായിരുന്നു. പ്രായപൂർത്തിയാകാത്തതിനാല്‍ ബാറുകളില്‍ പ്രവേശിക്കാൻ തിരിച്ചറിയല്‍ രേഖയില്‍ പ്രായം 20 വയസാക്കി തിരുത്തിയിരുന്നതായും റിപ്പോർട്ടുകളുണ്ട്.