അങ്കാറയില്‍ നടന്ന നാറ്റോ ഉച്ചകോടിക്ക് ശേഷം യുകെയിലെ ആർഎഎഫ് മില്‍ഡൻഹാള്‍ വ്യോമതാവളത്തില്‍ ഹ്രസ്വമായി ഇറങ്ങിയ ട്രംപ്, ഖത്തർ ഭരണകൂടം തനിക്ക് സമ്മാനിച്ച അത്യാധുനിക ബോയിംഗ് 747-8 വിമാനം ഉപേക്ഷിച്ച്‌ പഴയ എയർഫോഴ്‌സ് വണ്‍ (Air Force One) വിമാനത്തിലാണ് അമേരിക്കയിലേക്ക് മടങ്ങിയത്. പുതുതായി ലഭിച്ച വിമാനത്തിന്റെ സുരക്ഷാ ആശങ്കകളെക്കുറിച്ചുള്ള ചർച്ചകള്‍ക്കിടയിലാണ് ഈ നാടകീയ നീക്കം.

യുഎസും ഇറാനും തമ്മിലുള്ള സൈനിക ഏറ്റുമുട്ടല്‍ ശക്തമായ പശ്ചാത്തലത്തില്‍, യുഎസ് രഹസ്യാന്വേഷണ വിഭാഗത്തിന്റെ (Secret Service) കർശന നിർദ്ദേശപ്രകാരമാണ് ട്രംപ് വിമാനം മാറിയതെന്ന് 'ദി ന്യൂയോർക്ക് ടൈംസ്' റിപ്പോർട്ട് ചെയ്യുന്നു. നിലവിലുള്ള ഔദ്യോഗിക എയർഫോഴ്‌സ് വണ്‍ വിമാനങ്ങളിലുള്ള എല്ലാ അത്യാധുനിക സുരക്ഷാ-പ്രതിരോധ സംവിധാനങ്ങളും ഖത്തർ സമ്മാനിച്ച പുതിയ വിമാനത്തില്‍ ഇതുവരെ പൂർണ്ണമായി ഘടിപ്പിച്ചു കഴിഞ്ഞിട്ടില്ലെന്ന് യുഎസ് ഉദ്യോഗസ്ഥർ സമ്മതിക്കുന്നു. എന്നാല്‍ ഇത് ഒരു നിർദ്ദിഷ്ട ഭീഷണി കാരണമുള്ള നീക്കമല്ലെന്നും ഒരു മുൻകരുതല്‍ നടപടി മാത്രമാണെന്നുമാണ് റിപ്പോർട്ട്.

വൈറ്റ് ഹൗസ് വിശദീകരണവും ട്രംപിന്റെ പ്രതികരണവും

പുതിയ വിമാനം സുരക്ഷിതമല്ലെന്ന വാർത്തകള്‍ വൈറ്റ് ഹൗസ് തള്ളിക്കളഞ്ഞു. വിമാനത്തില്‍ ഉയർന്ന തലത്തിലുള്ള സുരക്ഷാ പ്രോട്ടോക്കോളുകള്‍ ഉണ്ടെന്നും പ്രസിഡന്റിന്റെ സുരക്ഷയ്ക്കായി ശ്രദ്ധ തിരിക്കലും തെറ്റായ വഴിയിലേക്ക് നയിക്കലുമടക്കം (distraction and misdirection) തങ്ങളുടെ പക്കലുള്ള എല്ലാ മാർഗ്ഗങ്ങളും ഉപയോഗിക്കാറുണ്ടെന്നും കമ്മ്യൂണിക്കേഷൻസ് ഡയറക്ടർ സ്റ്റീവൻ ചിയാങ് വ്യക്തമാക്കി.

എന്നാല്‍ സുരക്ഷാ ഭീതി കാരണമാണ് താൻ വിമാനം മാറിയതെന്ന വാർത്തകള്‍ ട്രംപ് തന്നെ നേരിട്ട് നിഷേധിച്ചു. യുകെയില്‍ നിന്നും പുറപ്പെടുന്നതിന് മുൻപ് മാധ്യമപ്രവർത്തകരോട് സംസാരിച്ച അദ്ദേഹം, "എനിക്ക് എപ്പോഴും സുരക്ഷാ ഭീഷണികളുണ്ട്, അവരുടെ ലിസ്റ്റില്‍ ഞാൻ ഒന്നാമനാണ്" എന്ന് പ്രതികരിച്ചു.

'ദി ഇൻഡിപെൻഡന്റ്' റിപ്പോർട്ട് ചെയ്തതനുസരിച്ച്‌, യുകെയിലെ ആർഎഎഫ് മില്‍ഡൻഹാളില്‍ വിമാനം ഇറക്കിയത് അവിടെയുള്ള യുഎസ് സൈനികർക്ക് ഈ പുത്തൻ വിമാനം കാണാനവസരം നല്‍കാനായിരുന്നുവെന്ന് ട്രംപ് പറഞ്ഞു. വിമാനത്തിന് മുന്നില്‍ ഒത്തുകൂടിയ സൈനികരുടെ ചിത്രങ്ങള്‍ പങ്കുവെച്ച അദ്ദേഹം, വിമാനം തികച്ചും അത്ഭുതപ്പെടുത്തുന്നതാണെന്നും അത് കാണാൻ സൈനികർ ആവേശഭരിതരായിരുന്നുവെന്നും കുറിച്ചു.

യാത്രയ്ക്കിടയില്‍ പഴയ ഓർമ്മ പുതുക്കാൻ വേണ്ടിയാണ് താൻ പഴയ എയർഫോഴ്‌സ് വണ്‍ തിരഞ്ഞെടുത്തതെന്നാണ് ട്രംപ് മാധ്യമപ്രവർത്തകരോട് പറഞ്ഞത്. സുരക്ഷാ കാരണങ്ങളാല്‍ വിമാനത്തിലെ ജനലുകളുടെ ബ്ലൈൻഡുകള്‍ അടച്ചിടാൻ മാധ്യമപ്രവർത്തകർക്ക് കർശന നിർദ്ദേശമുണ്ടായിരുന്നു. ഈ നിയന്ത്രണം തന്റെ കമ്പാർട്ടുമെന്റിന് ബാധകമല്ലെന്ന് വ്യക്തമാക്കിയ ട്രംപ്, "ഇവിടെയുള്ള ചില അലവലാതികള്‍ (sleazebags) കാരണമാണ്" ഈ നിയന്ത്രണമെന്നും പറഞ്ഞു. ഇത് ഇറാനെ ലക്ഷ്യം വെച്ചുള്ള പരാമർശമായിരുന്നു.

മിഡില്‍ ഈസ്റ്റില്‍ മിസൈല്‍ പെയ്ത്ത്; സൈറണുകള്‍ മുഴങ്ങി

ഹോർമുസ് കടലിടുക്കില്‍ വാണിജ്യ കപ്പലുകള്‍ക്ക് നേരെ ഇറാൻ ആക്രമണം നടത്തിയെന്ന് ആരോപിച്ച്‌ ഇറാനിയൻ ലക്ഷ്യസ്ഥാനങ്ങള്‍ക്ക് നേരെ യുഎസ് വ്യോമാക്രമണം ശക്തമാക്കിയിരുന്നു. ഇതിന് തൊട്ടുപിന്നാലെയാണ് ട്രംപിന്റെ വിമാനം മാറ്റല്‍. യുഎസ് ആക്രമണത്തിന് തിരിച്ചടിയായി ബഹ്‌റൈൻ, കുവൈറ്റ് എന്നിവിടങ്ങളിലെ യുഎസ് സൈനിക കേന്ദ്രങ്ങള്‍ക്ക് നേരെ ഇറാൻ ശക്തമായ മിസൈല്‍-ഡ്രോണ്‍ ആക്രമണങ്ങള്‍ നടത്തി.

ആക്രമണത്തെ തുടർന്ന് ബഹ്‌റൈൻ, കുവൈറ്റ്, ഖത്തർ എന്നീ രാജ്യങ്ങളിലുടനീളം മിസൈല്‍ മുന്നറിയിപ്പ് സൈറണുകള്‍ മുഴങ്ങി. തങ്ങളുടെ വ്യോമാതിർത്തി ലക്ഷ്യമിട്ടെത്തിയ ഇറാന്റെ മിസൈലുകളും ഡ്രോണുകളും വിജയകരമായി പ്രതിരോധിച്ചതായി കുവൈറ്റ് സൈന്യം ഔദ്യോഗികമായി സ്ഥിരീകരിച്ചിട്ടുണ്ട്.