ഗൊഡ്ഡ ജില്ലയില്‍ വോട്ടർ പട്ടികയില്‍ ഉള്‍പ്പെട്ട നിരവധി പേരെ ഒഴിവാക്കണമെന്ന് ആവശ്യപ്പെട്ട് ബിജെപി ബൂത്ത് ലെവല്‍ ഏജന്റുമാർ കൂട്ടത്തോടെ ഫോറം 7 സമർപ്പിച്ചതായി റിപ്പോർട്ട്. ഇവയില്‍ ഭൂരിഭാഗവും ന്യൂനപക്ഷ വിഭാഗത്തില്‍പ്പെട്ട വോട്ടർമാരുടെ പേരുകളാണെന്നാണ് ഇന്ത്യൻ എക്സ്പ്രസ് റിപ്പോർട്ട് ചെയ്തു.

ഓഗസ്റ്റ് 5ന് കരട് വോട്ടർപട്ടിക പ്രസിദ്ധീകരിച്ചതിന് പിന്നാലെ കഴിഞ്ഞ ഒരു മാസമായി ഗൊഡ്ഡ ജില്ലയിലെ വിവിധ ബൂത്തുകളില്‍ സമാനമായ രീതിയിലുള്ള സംഭവങ്ങളാണ് റിപ്പോർട്ട് ചെയ്യപ്പെടുന്നത്. അബ്ദുല്‍ മന്നാൻ ഖാൻ, മുഹമ്മദ് നൗഷാദ്, മുഹമ്മദ് ഷഫീഖ്, ബീബി ബസിലാൻ, മുഹമ്മദ് അസ്ലം തുടങ്ങിയവരുടെ പേരുകള്‍ വോട്ടർ പട്ടികയില്‍ നിന്ന് നീക്കണമെന്ന് ആവശ്യപ്പെട്ടാണ് ഫോറങ്ങള്‍ സമർപ്പിച്ചതെന്നാണ് റിപ്പോർട്ട്.

ഗൊഡ്ഡയിലെ കുറഞ്ഞത് നാല് ബൂത്തുകളില്‍ ബൂത്ത് ലെവല്‍ ഓഫീസർമാർ (BLO) ഇത്തരം അപേക്ഷകള്‍ സ്വീകരിക്കാൻ വിസമ്മതിച്ചതായും റിപ്പോർട്ടുണ്ട്. അപേക്ഷകള്‍ യഥാർഥമല്ലെന്നും നടപടിക്രമങ്ങള്‍ പാലിച്ചിട്ടില്ലെന്നും ചൂണ്ടിക്കാട്ടിയാണ് ബിഎല്‍ഒമാർ അവ സ്വീകരിക്കാതിരുന്നത്. അതേസമയം, ഫോറങ്ങള്‍ സ്വീകരിക്കാത്തത് ബിഎല്‍ഒമാരുടെ വീഴ്ചയാണെന്ന് ബിജെപി ആരോപിച്ചു. ഇതോടെ തെരഞ്ഞെടുപ്പ് ഉദ്യോഗസ്ഥരും ബിജെപി പ്രവർത്തകരും തമ്മിലുള്ള തർക്കം രൂക്ഷമാവുകയും വിഷയം ചീഫ് ഇലക്ടറല്‍ ഓഫീസറുടെ പരിഗണനയിലെത്തുകയും ചെയ്തു.

വോട്ടർ പട്ടികയില്‍ നിന്ന് നീക്കം ചെയ്യാൻ ലക്ഷ്യമിട്ട ചിലരുമായി നടത്തിയ അന്വേഷണത്തില്‍, ഇവരില്‍ പലരും തലമുറകളായി അതേ ഗ്രാമങ്ങളില്‍ താമസിക്കുന്നവരാണെന്നും കണ്ടെത്തിയതായി റിപ്പോർട്ടുണ്ട്. 2003ലെ തീവ്ര വോട്ടർപട്ടിക പുതുക്കലിലും ഇവരില്‍ പലരുടെയും പേരുകള്‍ നേരത്തെ തന്നെ പരിശോധിച്ച്‌ രേഖപ്പെടുത്തിയിട്ടുണ്ടെന്നും റിപ്പോർട്ടില്‍ പറയുന്നു. തെരഞ്ഞെടുപ്പ് കമ്മീഷന്റെ നിലവിലെ മാനദണ്ഡങ്ങള്‍ പ്രകാരം 2003ലെ പട്ടികയില്‍ പേരുകള്‍ കണ്ടെത്തുന്നത് പുതിയ SIR നടപടിയില്‍ അവരുടെ ഉള്‍പ്പെടുത്തലിന് സഹായകരമാകേണ്ടതാണ്.

മഹേഷ്തിക്രി ഗ്രാമത്തിലെ ബൂത്ത് നമ്പർ 9ല്‍ മാത്രം ബിജെപി ബൂത്ത് ലെവല്‍ ഏജന്റ് സഞ്ജീവ് കുമാർ റോഷൻ 25 പേരുടെ പേരുകള്‍ ഒഴിവാക്കണമെന്ന് ആവശ്യപ്പെട്ട് ഫോറം 7 സമർപ്പിച്ചതായാണ് റിപ്പോർട്ട്. ഇവരില്‍ എട്ട് പേരുമായി സംസാരിച്ചപ്പോള്‍, വോട്ടവകാശം നഷ്ടപ്പെടുമോ എന്ന ആശങ്കയും സർക്കാർ ക്ഷേമപദ്ധതികളില്‍ നിന്ന് പുറത്താകുമോ എന്ന ഭയവും അവർ പ്രകടിപ്പിച്ചതായി റിപ്പോർട്ടുണ്ട്.

അടുത്തുള്ള മറ്റൊരു ബൂത്തില്‍ ഒരു ബിജെപി ബൂത്ത് ഏജന്റ് 75 ഫോറം 7കളുമായി എത്തിയതായും റിപ്പോർട്ടുണ്ട്. എന്നാല്‍ ഇവ സംബന്ധിച്ച്‌ ബിഎല്‍ഒമാർ ചോദ്യം ചെയ്തതോടെ ആ വ്യക്തി ഫോറങ്ങള്‍ അവിടെവെച്ച്‌ കത്തിച്ചുകളഞ്ഞതായി ബിഎല്‍ഒമാർ വ്യക്തമാക്കിയതായി റിപ്പോർട്ട് പറയുന്നു.

ബസൻത്രായി ബ്ലോക്കിന്റെ ബ്ലോക്ക് ഡെവലപ്‌മെന്റ് ഓഫീസറും ബന്ധപ്പെട്ട തെരഞ്ഞെടുപ്പ് രജിസ്ട്രേഷൻ ഓഫീസറുമായ ശ്രീമൻ മറാണ്ടിക്ക് മഹേഷ്തിക്രി, പചുവ കിത, ലോച്നി, ബഘാകോള്‍ എന്നീ നാല് ബൂത്തുകളില്‍ നിന്ന് പരാതികള്‍ ലഭിച്ചതായി റിപ്പോർട്ടുണ്ട്. സ്ഥലത്ത് പരിശോധന നടത്തിയ ശേഷം അന്വേഷണ റിപ്പോർട്ട് സമർപ്പിക്കുമെന്നും അദ്ദേഹം അറിയിച്ചു.

ഫോറങ്ങളുടെ ഉറവിടം സംബന്ധിച്ച്‌ വ്യക്തതയില്ലാത്തതിനാല്‍ അവയില്‍ നടപടി സ്വീകരിക്കരുതെന്ന് ബിഎല്‍ഒമാർക്ക് നിർദേശം നല്‍കിയിരുന്നുവെന്നും മറാണ്ടി പറഞ്ഞു. ആദ്യം ബിജെപി ബൂത്ത് ഏജന്റുമാർ സബ് ഡിവിഷണല്‍ ഓഫീസർക്കോ, തനിക്കോ എഴുത്തു പരാതി നല്‍കി അന്വേഷണം ആവശ്യപ്പെടേണ്ടിയിരുന്നുവെന്നും അദ്ദേഹം വ്യക്തമാക്കി.

അതേസമയം, ഇത്തരം നടപടികള്‍ക്ക് പിന്നില്‍ രാഷ്ട്രീയ ലക്ഷ്യമുണ്ടോ എന്നതും പരിശോധിക്കപ്പെടുകയാണ്. ഗൊഡ്ഡ എംഎല്‍എയും ആർജെഡി നേതാവുമായ സഞ്ജയ് പ്രസാദ് യാദവ് വിഷയത്തില്‍ മറാണ്ടിയുമായി സംസാരിച്ചിട്ടുണ്ടെന്നും നടപടികള്‍ സ്വീകരിച്ചുവരികയാണെന്ന് അദ്ദേഹം പറഞ്ഞു.

അതേസമയം ജാർഖണ്ഡില്‍ ജൂണ്‍ 30നാണ് SIR നടപടികള്‍ ആരംഭിച്ചത്. ഓഗസ്റ്റ് 5ന് പ്രസിദ്ധീകരിച്ച കരട് പട്ടികയില്‍ ഏകദേശം 43 ലക്ഷം വോട്ടർമാരുടെ പേരുകള്‍ നീക്കം ചെയ്തിരുന്നു. ആകെ വോട്ടർമാരുടെ ഏകദേശം 16.48 ശതമാനം വരും ഇത്. നിലവില്‍ അവകാശവാദങ്ങളും ആക്ഷേപങ്ങളും സമർപ്പിക്കുന്ന ഘട്ടമാണ്. സെപ്റ്റംബർ 4 വരെയാണ് ഇതിനുള്ള സമയം.

വോട്ടർ പട്ടികയില്‍ നിന്ന് ഒരു പേര് നീക്കം ചെയ്യുന്നതിനായി ഉപയോഗിക്കുന്ന പ്രധാന രേഖയാണ് ഫോറം 7. വോട്ടർ സ്ഥിരമായി താമസം മാറ്റിയത്, മരിച്ചത്, ഒരേ പേരില്‍ ഒന്നിലധികം എൻട്രികള്‍ ഉള്ളത്, ഇന്ത്യൻ പൗരനല്ലാത്തത് തുടങ്ങിയ വിവിധ കാരണങ്ങള്‍ ചൂണ്ടിക്കാട്ടി ഈ ഫോറം വഴി പേര് നീക്കം ചെയ്യാൻ അപേക്ഷിക്കാം.

ഫോറം സമർപ്പിക്കുന്നയാള്‍ പ്രത്യേക തെളിവുകള്‍ നല്‍കേണ്ടതില്ലെങ്കിലും, താൻ നല്‍കുന്ന വിവരങ്ങള്‍ ശരിയാണെന്ന് പ്രഖ്യാപിച്ച്‌ ഒപ്പിടേണ്ടതുണ്ട്. തെറ്റായ വിവരങ്ങളോ, വ്യാജ പ്രഖ്യാപനങ്ങളോ നല്‍കുന്നത് ശിക്ഷാർഹമാണെന്നും ഫോറത്തിലെ പ്രഖ്യാപനത്തില്‍ വ്യക്തമാക്കുന്നു. മഹേഷ്തിക്രി ബൂത്തിലെ ബിഎല്‍ഒ അനീഷ ബാനോയുടെ മൊഴിപ്രകാരം, ബിജെപി ബൂത്ത് ഏജന്റ് ഏകദേശം 25 ഫോറങ്ങളുമായി തന്നെ സമീപിച്ചു. അവ ഔദ്യോഗികമായി ലഭിച്ച യഥാർഥ ഫോറങ്ങളല്ലെന്നായിരുന്നു അവരുടെ ആരോപണം. ഗ്രാമത്തില്‍ താമസിക്കുന്നില്ലാത്തവരുടെ പേരുകള്‍ നീക്കം ചെയ്യുന്നതിനുള്ള ഫോറങ്ങളാണിതെന്ന് ഏജന്റ് പറഞ്ഞതായും ബാനോ വ്യക്തമാക്കി. പിന്നീട് 50 ഫോറങ്ങള്‍ കൂടി കൊണ്ടുവരുമെന്നും ഇയാള്‍ പറഞ്ഞതായി അവർ ആരോപിച്ചു.

ഈ 25 ഫോറങ്ങള്‍ ആദ്യം സ്വീകരിച്ചെങ്കിലും പിന്നീട് ബ്ലോക്ക് ഓഫീസറുടെ നിർദേശത്തെ തുടർന്ന് സമാനമായ മറ്റ് ഫോറങ്ങള്‍ സ്വീകരിക്കുന്നത് നിർത്തിയതായും ബാനോ പറഞ്ഞു. ഫോറങ്ങളില്‍ പരാമർശിച്ചിരുന്ന വോട്ടർമാരുടെ പേരുകള്‍ 2003ലെ വോട്ടർപട്ടികയുമായി ബന്ധിപ്പിച്ച്‌ സ്ഥിരീകരിച്ചിട്ടുണ്ടെന്നും അവർ വ്യക്തമാക്കി.

പചുവ കിതയിലെ BLO മുഖ്താറിന്റെ മൊഴിയിലും സമാനമായ ആരോപണമുണ്ട്. ഏകദേശം 75 ഫോറം 7കളുമായി ഒരു ബിജെപി ബൂത്ത് ഏജന്റ് എത്തിയെങ്കിലും, ബ്ലോക്ക് ഓഫീസില്‍ നിന്ന് ഔദ്യോഗികമായി ലഭിച്ച ഫോറങ്ങളുമായി അവയ്ക്ക് വ്യത്യാസമുണ്ടായിരുന്നുവെന്ന് മുഖ്താർ പറഞ്ഞു. ഫോറത്തിന്റെ ഉദ്ദേശ്യം സംബന്ധിച്ച്‌ ചോദിച്ചപ്പോള്‍ പേരുകള്‍ ചേർക്കുന്നതിനുള്ള ഫോറമാണെന്നാണ് ഏജന്റ് ആദ്യം പറഞ്ഞതെന്നും പിന്നീട് അത് വോട്ടർമാരുടെ പേരുകള്‍ നീക്കം ചെയ്യുന്നതിനുള്ള അപേക്ഷയാണെന്ന് താൻ വ്യക്തമാക്കിയെന്നും മുഖ്താർ പറഞ്ഞു.

75 പേരുകളില്‍ ഭൂരിഭാഗവും മുസ്ലിം വിഭാഗത്തില്‍പ്പെട്ടവരായിരുന്നുവെന്നും അവരില്‍ പലരുടെയും പേരുകള്‍ 2003ലെ വോട്ടർപട്ടികയിലും ഉണ്ടായിരുന്നുവെന്നും മുഖ്താർ ആരോപിച്ചു. തുടർന്ന് ആ ഫോറങ്ങളുമായി എത്തിയ ബൂത്ത് ഏജന്റ് അവയെല്ലാം കത്തിച്ചുകളഞ്ഞതായും അദ്ദേഹം പറഞ്ഞു.

അതേസമയം, ആരോപണങ്ങളില്‍ ബിജെപിയുടെ ഔദ്യോഗിക വിശദീകരണം നിർണായകമാണ്. വോട്ടർ പട്ടികയില്‍ നിന്ന് പേരുകള്‍ നീക്കം ചെയ്യാൻ സമർപ്പിച്ച അപേക്ഷകള്‍ യഥാർഥമാണോ?, അവ നിയമാനുസൃത നടപടിക്രമങ്ങള്‍ പാലിച്ചാണോ നല്‍കിയതെന്ന് അന്വേഷണത്തിലൂടെയാകും വ്യക്തമാകുക. നിലവില്‍ BLOമാർ ഉന്നയിച്ച ആരോപണങ്ങളും ബിജെപിയുടെ പരാതികളും അധികൃതർ പരിശോധിച്ചുവരികയാണ്.