മേപ്പാടി: വയനാട് കള്ളാടിയിലെ മണ്ണിടിച്ചില്‍ ദുരന്തത്തില്‍ ഇന്ന് രണ്ട് പേരുടെ മൃതദേഹങ്ങള്‍ കൂടി കണ്ടെത്തി. ബിഹാർ സ്വദേശിയും എക്‌സ്‌കവേറ്റർ ഓപ്പറേറ്ററുമായ മുഹമ്മദ് ഇമ്രാനും ഹിമാചല്‍ പ്രദേശ് സ്വദേശിയും എൻജിനിയറുമായ രാഹുല്‍ ശർമയുടെയും മൃതദേഹങ്ങളാണ് സോണ്‍ ഒന്നില്‍ നിന്ന് കണ്ടെത്തിയത്.
ഇതോടെ ദുരന്തത്തില്‍ മരിച്ചവരുടെ എണ്ണം അഞ്ചായി. ഇനി മൂന്ന് പേർക്കായുള്ള തിരച്ചില്‍ തുടരുകയാണ്.
മധ്യപ്രദേശ് സ്വദേശിയായ ഹിറ്റാച്ചി ഓപ്പറേറ്റർ ചന്ദ്രബാൻ പാല്‍ (37), ബിഹാർ സ്വദേശി ഫോർമാൻ ബികാസ് കുമാർ സിങ് (40), ഝാർഖണ്ഡ് സ്വദേശി അൻമോല്‍ ദൊഡരായ് (25) എന്നിവരുടെ മൃതദേഹങ്ങളാണ് നേരത്തെ കണ്ടെത്തിയത്.
ഹിമാചല്‍ പ്രദേശ് സ്വദേശി കണ്‍സ്ട്രക്ഷൻ മാനേജർ വിക്രം റാണ, പശ്ചിമ ബംഗാള്‍ സ്വദേശി സർവേയർ രാകേഷ് ഗുച്ചൈത്, ഉത്തർപ്രദേശ് സ്വദേശി സർവേയർ അസ്ഹറുദ്ദീൻ അൻസാരി എന്നിവർക്കായുള്ള തെരച്ചില്‍ തുടരുകയാണ്. ഒന്നും രണ്ടും സോണുകള്‍ കേന്ദ്രീകരിച്ചാണ് ഇന്നത്തെ രക്ഷാപ്രവർത്തനമെന്ന് മന്ത്രി എ.പി. അനില്‍കുമാർ അറിയിച്ചു.
രാഹുല്‍ ശർമയുടെ മൃതദേഹം കണ്ടെത്തിയതോടെ ഭാര്യ കല്പനയുടെ കാത്തിരിപ്പും കണ്ണീരിലാണ്ടു. ഭർത്താവ് ജീവനോടെ തിരിച്ചെത്തുമെന്ന പ്രതീക്ഷയില്‍ ചെമ്പ്ര റോഡിലെ വാടകവീട്ടില്‍ കഴിഞ്ഞിരുന്ന കല്‍പനയ്ക്ക് ഒടുവില്‍ ദുഃഖവാർത്തയാണ് ലഭിച്ചത്. ഹിമാചല്‍ പ്രദേശിലെ മണ്ടി സ്വദേശിയായ രാഹുലും കല്‍പനയും ഈ വർഷം ഫെബ്രുവരി 21-നാണ് വിവാഹിതരായത്. തുരങ്കപാത നിർമാണത്തിന്റെ കരാറെടുത്ത കമ്പനിയുടെ ഉദ്യോഗസ്ഥരാണ് അപകടവിവരം ബന്ധുക്കളെ അറിയിച്ചത്. തുടർന്ന് രാഹുലിന്റെ പിതാവ് രൂപ്‌ദേവ് ശർമ, അമ്മാവൻ രാംവീർ ശർമ, ദുബായില്‍ ഷെഫായി ജോലി ചെയ്യുന്ന സഹോദരൻ എന്നിവർ വയനാട്ടിലെത്തി.
അതേസമയം, കള്ളാടി ദുരന്തഭൂമി പ്രതിപക്ഷ നേതാവ് Pinarayi Vijayan സന്ദർശിച്ചു. സിപിഎം സംസ്ഥാന സെക്രട്ടറി എം.വി. ഗോവിന്ദൻ, മുതിർന്ന നേതാവ് എം.വി. ജയരാജൻ, മുൻ എംഎല്‍എ ശശി എന്നിവരും അദ്ദേഹത്തോടൊപ്പമുണ്ടായിരുന്നു. റവന്യൂ മന്ത്രി എ.പി. അനില്‍കുമാറും ദുരന്തസ്ഥലം സന്ദർശിച്ചു.