തുരങ്കങ്ങളില്‍ അവശേഷിക്കുന്നവരെ ജീവനോടെ പുറത്തെടുക്കാനുള്ള നിർണായക സമയം അതിവേഗം അവസാനിക്കുകയാണെന്ന ആശങ്ക നിലനില്‍ക്കെ, മലനിരകള്‍ സ്ഫോടകവസ്തുക്കള്‍ ഉപയോഗിച്ച്‌ തകർത്താണ് രക്ഷാപ്രവർത്തകർ മുന്നോട്ട് നീങ്ങുന്നത്. ത്രിശൂലി-3എ പവർ പ്ലാന്റ് സൈറ്റില്‍ നിലവില്‍ കൃത്രിമമായി വായു പമ്പ് ചെയ്യാനുള്ള ശ്രമങ്ങള്‍ ആരംഭിച്ചിട്ടുണ്ട്.

നേപ്പാള്‍-തിബറ്റൻ അതിർത്തിയിലുണ്ടായ ഈ പ്രളയ ദുരന്തത്തില്‍ മരിച്ചവരുടെ എണ്ണം 939 ആയി ഉയർന്നതായി ദുരന്തനിവാരണ അതോറിറ്റി അറിയിച്ചു. കാണാതായവരുടെ എണ്ണം 3,925 ആയി പുതുക്കി നിശ്ചയിച്ചിട്ടുണ്ട്. ഇതില്‍ 592 പേർ വിദേശികളാണ്. കാണാതായവരില്‍ ഏഴില്‍ ഒരാള്‍ വീതം ഹൈഡ്രോപവർ പ്രോജക്ടുകളിലെ തൊഴിലാളികളാണ്. നിലവില്‍ വിവിധ സൈറ്റുകളില്‍ നിന്നായി 279 പേരെ രക്ഷപ്പെടുത്തിയതായി നേപ്പാള്‍ പ്രധാനമന്ത്രി ബാലേന്ദ്ര ഷാ വ്യക്തമാക്കി. ചൈനീസ്, നേപ്പാളി സൈന്യങ്ങളുടെ നേതൃത്വത്തിലുള്ള അന്താരാഷ്ട്ര സംഘമാണ് രക്ഷാപ്രവർത്തനത്തിന് ചുക്കാൻ പിടിക്കുന്നത്. ഇന്ത്യ, കൊറിയ, ഓസ്‌ട്രേലിയ എന്നിവിടങ്ങളില്‍ നിന്നുള്ള വിദഗ്ധരും ഈ സംഘത്തിലുണ്ട്.

കാലതാമസത്തിനെതിരെ പ്രതിഷേധം
തുരങ്കങ്ങള്‍ക്കുള്ളില്‍ ഓക്സിജൻ സംവിധാനമുള്ളതിനാല്‍ പ്രിയപ്പെട്ടവർ ജീവനോടെയുണ്ടാകുമെന്ന 50 ശതമാനമെങ്കിലും പ്രതീക്ഷയുണ്ടെന്ന് തൊഴിലാളികളുടെ കുടുംബങ്ങള്‍ പറയുന്നു. എന്നാല്‍ വായു പമ്പ് ചെയ്യുന്നതടക്കമുള്ള നടപടികള്‍ വൈകിയതില്‍ കുടുംബങ്ങള്‍ക്ക് കടുത്ത അമർഷമുണ്ട്. ഒരു തുരങ്കത്തിനുള്ളില്‍ പ്രവേശിക്കാൻ രക്ഷാപ്രവർത്തകർക്ക് കഴിഞ്ഞെങ്കിലും അവിടെ ആരെയും കണ്ടെത്താനായില്ല.

പ്രളയം സാധാരണ ഒന്നല്ലെന്ന് വ്യക്തമാക്കിയ പ്രധാനമന്ത്രി ബാലേന്ദ്ര ഷാ, ഹിമാലയൻ മേഖലയില്‍ കാലാവസ്ഥാ വ്യതിയാനം ഉയർത്തുന്ന ഭീഷണിയുടെ തെളിവാണിതെന്ന് ഫേസ്ബുക്കില്‍ കുറിച്ചു. രാജ്യം നേരിടുന്ന ഈ പ്രതിസന്ധി അന്താരാഷ്ട്ര സമൂഹത്തിന് മുന്നില്‍ ശക്തമായി ഉന്നയിക്കേണ്ട സമയമാണിതെന്നും അദ്ദേഹം കൂട്ടിച്ചേർത്തു. കുറഞ്ഞത് 11 ജലവൈദ്യുത പദ്ധതികള്‍ക്കെങ്കിലും പ്രളയത്തില്‍ നാശനഷ്ടം സംഭവിച്ചിട്ടുണ്ട്.

തുരങ്കങ്ങളുടെ പ്രവേശന കവാടങ്ങള്‍ പോലും തിരിച്ചറിയാൻ കഴിയാത്ത വിധം കൂറ്റൻ പാറക്കല്ലുകളും മണ്ണും വന്ന് മൂടിയിരിക്കുകയാണ്. വീടുകളേക്കാള്‍ വലിയ പാറകളാണ് രക്ഷാപ്രവർത്തനത്തിന് തടസ്സമാകുന്നത്. അതേസമയം, ഇതുവരെ കണ്ടെടുത്ത മൃതദേഹങ്ങളില്‍ 4 ശതമാനം മാത്രമാണ് തിരിച്ചറിയാൻ സാധിച്ചത്.

നദീതീരങ്ങളില്‍ നൂറുകണക്കിന് മൃതദേഹങ്ങള്‍ അടിഞ്ഞുകൂടിയ ചിത്വാൻ ജില്ലയില്‍ താല്‍ക്കാലികമായി കൂട്ടസംസ്കാരങ്ങള്‍ നടക്കുകയാണ്. മോർച്ചറികളില്‍ സൗകര്യമില്ലാത്തതിനാല്‍ ഡിഎൻഎ സാമ്പിളുകള്‍ ശേഖരിച്ച ശേഷമാണ് മൃതദേഹങ്ങള്‍ അടക്കം ചെയ്യുന്നത്. പിന്നീട് ബന്ധുക്കള്‍ തിരിച്ചറിയുന്ന മുറയ്ക്ക് മൃതദേഹാവശിഷ്ടങ്ങള്‍ വിട്ടുനല്‍കുമെന്ന് അധികൃതർ അറിയിച്ചു. തിബറ്റില്‍ 16 മരണങ്ങളും 546 പേരെ കാണാതാവുകയും ചെയ്തതായി ചൈനീസ് മാധ്യമങ്ങള്‍ റിപ്പോർട്ട് ചെയ്യുന്നു. എന്നാല്‍ ചൈനയില്‍ പ്രളയ ദൃശ്യങ്ങള്‍ക്ക് കടുത്ത സെൻസർഷിപ്പാണ് ഏർപ്പെടുത്തിയിട്ടുള്ളത്. മരണസംഖ്യ മറച്ചുവെക്കുന്നു എന്ന് ഓണ്‍ലൈനില്‍ പ്രചരിപ്പിക്കുന്നവർക്കെതിരെ ചൈനീസ് അധികൃതർ പിഴയും തടവും അടക്കമുള്ള ശിക്ഷകള്‍ നടപ്പാക്കുന്നുണ്ട്. വ്യാജവാർത്തകള്‍ തടയാൻ നേപ്പാളിലും ഓണ്‍ലൈൻ ഉള്ളടക്കങ്ങള്‍ക്ക് കർശന നിയന്ത്രണം ഏർപ്പെടുത്തിയിട്ടുണ്ട്.

Nepal flood disaster: 939 dead, over 3900 missing, hundreds of workers trapped in tunnels; rescue operations complicated