ഇറാനുമായുള്ള ആണവ തർക്കത്തില്‍ ചർച്ചകള്‍ മുന്നോട്ട് കൊണ്ടുപോകുന്നതിനായി അമേരിക്ക പുതിയ ഭേദഗതികള്‍ നിർദേശിച്ചു.

ചർച്ചകള്‍ പൂർത്തിയാകുന്നത് വരെ ഇറാൻ തങ്ങളുടെ യുറേനിയം ശേഖരം മാറ്റരുതെന്നും നിലവില്‍ ആക്രമിക്കപ്പെട്ട ആണവ നിലയങ്ങളില്‍ പ്രവർത്തനം പുനരാരംഭിക്കരുത് എന്നുമാണ് പ്രധാന നിർദേശങ്ങള്‍. അമേരിക്കൻ മിഡില്‍ ഈസ്റ്റ് പ്രതിനിധി സ്റ്റീവ് വിറ്റ്കോഫാണ് ഈ ഉപാധികള്‍ മുന്നോട്ട് വെച്ചതെന്നാണ് റിപ്പോർട്ടുകള്‍ സൂചിപ്പിക്കുന്നത്.

അമേരിക്കയുടെ നിർദേശങ്ങള്‍ക്ക് പിന്നാലെ ഇറാൻ തങ്ങളുടെ പുതിയ നിലപാടുകള്‍ വ്യക്തമാക്കിക്കൊണ്ടുള്ള മറുപടി സമർപ്പിച്ചു. പാക്കിസ്ഥാൻ മുഖേനയാണ് ഇറാൻ ഈ നിർദേശങ്ങള്‍ കൈമാറിയത്. യുദ്ധം പൂർണ്ണമായും അവസാനിപ്പിക്കുക എന്നതിനും മേഖലയില്‍ ശാശ്വത സമാധാനം ഉറപ്പാക്കുന്നതിനുമാണ് തങ്ങള്‍ മുൻഗണന നല്‍കുന്നതെന്ന് ഇറാൻ വ്യക്തമാക്കി. സമാധാന നീക്കങ്ങള്‍ക്കായി പുതിയൊരു അധ്യായം തുറക്കാൻ തയ്യാറാണെന്ന സൂചനയും ഇറാൻ നല്‍കുന്നുണ്ട്.

അറുപത് ദിവസത്തിലേറെയായി തുടരുന്ന സംഘർഷത്തിന് അറുതി വരുത്താൻ ലക്ഷ്യമിട്ടുള്ളതാണ് ഈ പുതിയ നയതന്ത്ര നീക്കങ്ങള്‍. എന്നാല്‍, ചർച്ചകള്‍ പുരോഗമിക്കുന്നതിനിടയിലും ഇസ്രയേലിലേക്ക് അമേരിക്ക വൻതോതില്‍ ആയുധങ്ങള്‍ എത്തിക്കുന്നത് ഇറാന്റെ ഭാഗത്ത് നിന്ന് കടുത്ത സംശയങ്ങള്‍ക്ക് ഇടയാക്കിയിട്ടുണ്ട്. ഈ പുതിയ നിർദേശങ്ങള്‍ ഇരുരാജ്യങ്ങളും തമ്മിലുള്ള അവിശ്വാസം കുറയ്ക്കാൻ സഹായിക്കുമോ എന്നാണ് രാജ്യാന്തര സമൂഹം ഉറ്റുനോക്കുന്നത്.