നിലവില്‍ കോംഗോയില്‍ 906 പേർക്ക് എബോള ബാധിച്ചതായി സംശയിക്കുന്നു.

ഒപ്പം ഉഗാണ്ടയില്‍ എബോള പടരുന്നതായി റിപ്പോർട്ടുണ്ട്.

രോഗലക്ഷണങ്ങളോടെ മരണപ്പെട്ട 223 പേരുടെ മരണകാരണം എബോളയാണോ എന്ന് കണ്ടെത്താനുള്ള തീവ്രമായ അന്വേഷണത്തിലാണ് ആരോഗ്യവിദഗ്ദ്ധർ.

എബോളയുടെ 'ബുന്ദിബുഗ്യോ' (Bundibugyo) വകഭേദമാണ് ഇപ്പോള്‍ കോംഗോയില്‍ പടർന്നുപിടിക്കുന്നത്. അയല്‍രാജ്യമായ ഉഗാണ്ടയിലും ഈ രോഗബാധ റിപ്പോർട്ട് ചെയ്തിട്ടുണ്ട്.

ലോകാരോഗ്യ സംഘടന പുറത്തുവിട്ട ഏറ്റവും പുതിയ കണക്കുകള്‍ പ്രകാരം, കോംഗോയില്‍ ഇട്ടൂരി, വടക്കൻ കിവു, തെക്കൻ കിവു എന്നീ പ്രവിശ്യകളിലായി 125 പേർക്ക് എബോള സ്ഥിരീകരിച്ചു. ഇതില്‍ 17 മരണങ്ങള്‍ ഔദ്യോഗികമായി സ്ഥിരീകരിച്ചിട്ടുണ്ട്.

ഉഗാണ്ടയില്‍ ഏഴ് പേർക്ക് രോഗബാധ സ്ഥിരീകരിക്കുകയും ഒരാള്‍ മരണപ്പെടുകയും ചെയ്തു.

എന്നാല്‍, നിലവില്‍ ഇരുരാജ്യങ്ങളിലും എബോളയുടെ സമൂഹവ്യാപനം റിപ്പോർട്ട് ചെയ്യപ്പെട്ടിട്ടില്ല എന്നത് നേരിയ ആശ്വാസം നല്‍കുന്നുണ്ട്.