വി. പോള്‍ ആറാമൻ മാർപാപ്പയുടെ ഹൃദയത്തോട് ഏറെ ചേർന്നുനില്‍ക്കുന്നതായിരുന്നു മെയ് മാസം. 1965-ല്‍ പാപ്പ പുറപ്പെടുവിച്ച ചാക്രികലേഖനത്തിന്റെ പേര് 'മെയ് മാസം' (ലാറ്റിൻ ഭാഷയില്‍ 'മെൻസെ മായോ' - Mense Maio) എന്നായിരുന്നു. ഒരു ചാക്രികലേഖനത്തിന് ഇങ്ങനെയൊരു പേര് വരുന്നത് തികച്ചും അപൂർവമാണ്. മെയ് മാസത്തില്‍ വിശ്വാസികള്‍ക്കിടയില്‍ പതിവുള്ള പരമ്പരാഗത ഭക്തിസാധനകളെ പ്രകീർത്തിക്കുന്നതായിരുന്നു ഈ സന്ദേശം.

മറിയത്തോടുള്ള ഭക്തി

ചാക്രികലേഖനത്തിന്റെ തുടക്കത്തില്‍ തന്നെ, മെയ് മാസത്തില്‍ ദൈവമാതാവിനോട് വിശ്വാസികള്‍ കാണിക്കുന്ന ഭക്തിയെ പോള്‍ ആറാമൻ മാർപാപ്പ ഏറെ പ്രശംസിക്കുന്നുണ്ട്:

"വിശ്വാസികളുടെ ഭക്തിയാദരവുകള്‍ ദൈവമാതാവായ മറിയത്തിനായി സമർപ്പിച്ചിരിക്കുന്ന മെയ് മാസം ഇതാ അരികിലെത്തിക്കഴിഞ്ഞു. ലോകത്തിന്റെ ഒട്ടുമിക്ക കോണുകളിലും ഉടൻ തന്നെ സ്വർഗരാജ്ഞിക്ക് അർപ്പിക്കപ്പെടാൻ പോകുന്ന വിശ്വാസത്തിന്റെയും സ്നേഹത്തിന്റെയും ആദരവുകളെ ഓർത്ത് എന്റെ ഹൃദയം സന്തോഷിക്കുന്നു… പരിശുദ്ധ കന്യകയെ ആദരിക്കുകയും ക്രൈസ്തവ ജനതയ്ക്ക് വലിയ അനുഗ്രഹങ്ങള്‍ സമ്മാനിക്കുകയും ചെയ്യുന്ന മെയ് മാസവുമായി ബന്ധപ്പെട്ട ഈ ഭക്തി ഞങ്ങളെ ഏറെ ആനന്ദിപ്പിക്കുകയും ആശ്വസിപ്പിക്കുകയും ചെയ്യുന്നു."

മറിയത്തോടുള്ള ഭക്തി നമ്മെ യേശുവിലേക്ക് കൂടുതല്‍ അടുപ്പിക്കുമെന്നും അദ്ദേഹം അടിവരയിട്ടു പറയുന്നു: "മറിയം ക്രിസ്തുവിലേക്കുള്ള വഴിയാണ്. അതുകൊണ്ടുതന്നെ, മറിയത്തെ കണ്ടുമുട്ടുന്ന ഒരാള്‍ക്ക് ക്രിസ്തുവിനെ കണ്ടുമുട്ടാതിരിക്കാനാവില്ല. മറിയത്തിന്റെ കൈകളിലുള്ള ക്രിസ്തുവിനെ അന്വേഷിക്കാനല്ലാതെ, അവളിലൂടെയും അവളോടൊപ്പവും നമ്മുടെ രക്ഷകനെ കണ്ടെത്താനല്ലാതെ നമ്മള്‍ മറ്റെന്തിനാണ് വീണ്ടും വീണ്ടും മറിയത്തിലേക്ക് തിരിയുന്നത്?"

സമാധാനത്തിനായുള്ള പ്രാർഥന

പരിശുദ്ധ അമ്മയുടെ മാധ്യസ്ഥം തേടിക്കൊണ്ട്, ലോകസമാധാനത്തിനായി മെയ് മാസത്തില്‍ പ്രാർഥിക്കേണ്ടതിന്റെ ആവശ്യകതയെക്കുറിച്ചാണ് ഈ ചാക്രികലേഖനത്തിന്റെ ബാക്കി ഭാഗം സംസാരിക്കുന്നത്. ലോകം വലിയ പ്രതിസന്ധികളെ അഭിമുഖീകരിക്കുമ്പോള്‍ മുൻഗാമികളായ മാർപാപ്പമാർ പ്രാർഥനയ്ക്കായി ഈ മാസം തിരഞ്ഞെടുത്തത് അദ്ദേഹം അനുസ്മരിച്ചു:

"മെയ് മാസം കൂടുതല്‍ തീക്ഷ്ണമായ പ്രാർഥനകള്‍ക്കുള്ള വലിയൊരു പ്രചോദനമാണ്. ഈ മാസത്തില്‍ നമ്മുടെ യാചനകള്‍ അമ്മയുടെ കരുണയുള്ള ഹൃദയത്തിലേക്ക് വളരെ എളുപ്പത്തില്‍ എത്തിച്ചേരും. അതുകൊണ്ടുതന്നെ, സഭയ്ക്ക് എന്തെങ്കിലും ആവശ്യങ്ങളുണ്ടാകുമ്പോഴോ മനുഷ്യരാശിക്ക് എന്തെങ്കിലും വലിയ പ്രതിസന്ധികള്‍ നേരിടേണ്ടി വരുമ്പോഴോ പൊതുപ്രാർഥനകള്‍ നടത്താൻ മറിയത്തിന് സമർപ്പിക്കപ്പെട്ട ഈ മാസം തിരഞ്ഞെടുക്കുന്നത് എന്റെ മുൻഗാമികളുടെ ഒരു പതിവായിരുന്നു."

പാപ്പ ഈ ചാക്രിക ലേഖനം എഴുതുമ്പോള്‍ 1965-ല്‍ വിയറ്റ്‌നാം യുദ്ധം കൊടുമ്പിരിക്കൊണ്ടിരിക്കുകയായിരുന്നു; ഒപ്പം ലോകത്തിന്റെ വിവിധ ഭാഗങ്ങളിലും യുദ്ധങ്ങള്‍ നടക്കുന്നുണ്ടായിരുന്നു. ആ പശ്ചാത്തലത്തിലാണ് സമാധാനത്തിനായുള്ള ഈ ആഹ്വാനം പുറത്തുവന്നത്.

മെയ് മാസത്തെ ഇത്രയധികം സ്നേഹിച്ച പോള്‍ ആറാമൻ മാർപാപ്പയുടെ തിരുനാള്‍ കത്തോലിക്കാ സഭ ആഘോഷിക്കുന്നത് ഇതേ മെയ് മാസത്തിലാണ് എന്നത് തികച്ചും ആകസ്മികവും മനോഹരവുമായ ഒരു കാര്യമാണ്. അദ്ദേഹത്തിന്റെ പൗരോഹിത്യ സ്വീകരണത്തിന്റെ വാർഷിക ദിനമായ മെയ് 29 -നാണ് പോള്‍ ആറാമൻ പാപ്പയുടെ തിരുനാളായി നിശ്ചയിച്ചിരിക്കുന്നത്.