സംഭവത്തില്‍ ആർക്കും പരിക്കേറ്റിട്ടില്ല. ഒമാനിലെ ലിമയ്ക്ക് സമീപം തെക്കോട്ട് സഞ്ചരിക്കുകയായിരുന്ന കപ്പലിന് നേരെയാണ് ആക്രമണമുണ്ടായത്. രണ്ട് വാണിജ്യ കപ്പലുകള്‍ക്ക് നേരെ ഇറാൻ സൈന്യം മിസൈല്‍ തൊടുത്തുവിട്ടതായി യുഎസ് ഉദ്യോഗസ്ഥർ ആരോപിച്ചു. ആക്രമണത്തിന്റെ പശ്ചാത്തലത്തില്‍ ഇറാനെതിരെ ശക്തമായ പ്രത്യാക്രമണം നടത്താൻ അമേരിക്ക ആലോചിക്കുന്നതായാണ് റിപ്പോർട്ടുകള്‍.

ഇറാനും അമേരിക്കയും തമ്മിലുണ്ടായിരുന്ന ഒരാഴ്ചത്തെ താല്‍ക്കാലിക വെടിനിർത്തല്‍ കരാർ അവസാനിച്ചതിന് തൊട്ടുപിന്നാലെയാണ് ഈ ആക്രമണം നടന്നിരിക്കുന്നത്. ഫെബ്രുവരിയില്‍ യുഎസ്-ഇസ്രയേല്‍ സംയുക്ത ആക്രമണത്തില്‍ കൊല്ലപ്പെട്ട ഇറാന്റെ മുൻ പരമോന്നത നേതാവ് ആയത്തുള്ള അലി ഖമനേയിയുടെ വിലാപ ചടങ്ങുകള്‍ പ്രമാണിച്ചായിരുന്നു ഈ താല്‍ക്കാലിക ഇടവേള.

ഹോർമുസ് കടലിടുക്കിലൂടെയുള്ള കപ്പല്‍ ഗതാഗതം സുഗമമാക്കുന്നതിനായി ദോഹയില്‍ നടന്ന സമാധാന ചർച്ചകളില്‍ പുരോഗതി ഉണ്ടാകാത്തതും വെടിനിർത്തല്‍ അവസാനിച്ചതുമാണ് മേഖലയെ വീണ്ടും സംഘർഷത്തിലേക്ക് തള്ളിവിട്ടത്. ലോകത്തിലെ എണ്ണ വിതരണത്തിന്റെ അഞ്ചിലൊന്നും കടന്നുപോകുന്ന ഏറ്റവും നിർണായകമായ ഈ പാതയിലെ പുതിയ സംഭവവികാസങ്ങള്‍ ആഗോള ഊർജ്ജ വിപണിയെയും എണ്ണവിലയെയും വരും ദിവസങ്ങളില്‍ ദോഷകരമായി ബാധിച്ചേക്കുമെന്ന ആശങ്ക ശക്തമാണ്.