ആവേശകരമായ പ്രീ-ക്വാർട്ടർ പോരാട്ടത്തില് ഇഞ്ചുറി ടൈം ഗോളില് പോർച്ചുഗലിനെ മറികടന്ന് സ്പെയിൻ ക്വാർട്ടർ ഫൈനലിലേക്ക് മുന്നേറി.
സൂപ്പർ സബായി ഇറങ്ങിയ മിക്കേല് മെറീനോയാണ് മത്സരത്തിലെ സ്പെയിനിന്റെ വിജയഗോള് നേടിയത്. ഈ തോല്വിയോടെ ലോകകപ്പ് കിരീടമെന്ന സ്വപ്നം സാക്ഷാത്കരിക്കാനാകാതെ സൂപ്പർ താരം ക്രിസ്റ്റ്യാനോ റൊണാള്ഡോ ലോകകപ്പ് വേദികളോട് വിടപറഞ്ഞു. ഇത് തന്റെ അവസാന ലോകകപ്പായിരിക്കുമെന്ന് റൊണാള്ഡോ നേരത്തെ പ്രഖ്യാപിച്ചിരുന്നു.
ഡാലസ് സ്റ്റേഡിയത്തില് നടന്ന മത്സരത്തില് ഇരു ടീമുകളും തുടക്കം മുതല് മികച്ച മുന്നേറ്റങ്ങള് നടത്തിയെങ്കിലും ആദ്യ പകുതിയില് ഗോള് നേടാൻ ആർക്കും സാധിച്ചില്ല. കളി മുറുകുന്നതിനിടെ പോർച്ചുഗലിന്റെ പ്രതിരോധ താരം നൂനോ മെൻഡസ് പരിക്കേറ്റ് പുറത്തുപോയത് അവർക്ക് തിരിച്ചടിയായി. മത്സരത്തിന്റെ 85-ാം മിനിറ്റില് ഡാനി ഓള്മോയ്ക്ക് പകരക്കാരനായി കളത്തിലെത്തിയ മെറീനോ, ആറ് മിനിറ്റുകള്ക്കകം സ്പെയിനിന്റെ രക്ഷകനായി മാറുകയായിരുന്നു. ഫെറാൻ ടോറസ് നല്കിയ കൃത്യമായ ത്രൂ പാസ് സ്വീകരിച്ച് ഇഞ്ചുറി ടൈമിന്റെ ആദ്യ മിനിറ്റില് മെറീനോ പോർച്ചുഗല് വലകുലുക്കി. ബെല്ജിയം – യുഎസ്എ മത്സരത്തിലെ വിജയികളാണ് ക്വാർട്ടറില് ഇനി സ്പെയിനിന്റെ എതിരാളികള്.