ബുധനാഴ്ച രാവിലെ മുതല്‍ കാറ്റിന്റെ ദിശ വടക്കുപടിഞ്ഞാറേക്ക് മാറുന്നതോടെ രാത്രികളിലും അതിരാവിലെയും അനുഭവപ്പെടുന്ന ഈർപ്പത്തിന്റെ അളവില്‍ കാര്യമായ കുറവുണ്ടാകും. വേനല്‍ക്കാലത്തിന്റെ അവസാന ഘട്ടത്തിലേക്ക് കടക്കുന്നതോടെ കാലാവസ്ഥ മെച്ചപ്പെടുമെന്ന് ഗതാഗത, ടെലികമ്മ്യൂണിക്കേഷൻ മന്ത്രാലയത്തിന് കീഴിലുള്ള കാലാവസ്ഥാ ഡയറക്ടറേറ്റ് വ്യക്തമാക്കി.

വാരാന്ത്യം വരെ വടക്കുപടിഞ്ഞാറൻ കാറ്റ് തുടരുമെന്നും, കാറ്റിന്റെ വേഗത വർദ്ധിക്കുന്നത് അന്തരീക്ഷം കൂടുതല്‍ സുഖകരമാക്കാൻ സഹായിക്കുമെന്നും പ്രവചിക്കപ്പെടുന്നു. അതേസമയം കാറ്റ് ശക്തമാകാൻ സാധ്യതയുള്ളതിനാല്‍ കടലില്‍ പോകുന്നവർ ജാഗ്രത പാലിക്കണമെന്ന് മുന്നറിയിപ്പുണ്ട്.

കഴിഞ്ഞ ദിവസങ്ങളില്‍ രാജ്യത്ത് താപനില 45 ഡിഗ്രി സെല്‍ഷ്യസ് വരെ ഉയരുകയും ഈർപ്പം 90 ശതമാനം വരെ എത്തുകയും ചെയ്തിരുന്നു. വരും ദിവസങ്ങളിലും ഉയർന്ന താപനില അനുഭവപ്പെടുമെങ്കിലും കാറ്റ് ശക്തമാകുന്നതോടെ വാരാന്ത്യത്തോടെ താപനില ക്രമേണ കുറഞ്ഞുതുടങ്ങുമെന്നാണ് പ്രതീക്ഷിക്കുന്നത്.